《台語荒漠甘泉（全羅版）》

 | | | 轉寄

"Siū-khó͘ ha̍k-hāu"

作者 陳清俊 翻譯 2012.09.02

listen


Káu ge̍h tshue-jī (Káu ge̍h jī ji̍t)

"In-uī í-king siúⁿ-sù lín, ... koh uī-tio̍h I siū khó͘." (Hui-li̍p-pí 1:29)

Siōng-tè kuán-lí tsi̍t-king tsin kuì ê ha̍k-hāu, tī i ê kong-khò sī īng lâu ba̍k-sái lâi o̍h ê. Tsa̍p-tshit sè-kí tshing-kàu-tô͘ bo̍k-su, Ba̍k-su-tē (Ritsard Baxter) án-ni kóng, "Kám-siā Lí gō͘-tsa̍p-pueh nî lâi tī guá tsit ê sin-thé ê kuán-kàu." I tong-jiân m̄-sī î-it uē huà khùn-lân tsuè sìng-lī ê lâng.

Lán Thiⁿ-pē tsit king ha̍k-hāu tuì lán lâi kóng sī tsin kín beh kiat-sok. Ha̍k-kî bé, tsi̍t-kang tsi̍t-kang tsiap-kūn. Guān lán bô tô-phiah kan-lân ê kong-khò, iā bô siám-khui kuán-kàu ê kuáiⁿ. Lán nā uē khuài-lo̍k kian-tshî kàu-té, lán ê bián-liû beh koh-khah kong-hui, thian-kok koh-khah tiⁿ-bi̍t. Án-ni lán thang kong-îng, kiau-ngō͘ lâi pit-gia̍p. ---Theodore L. Cuyler

Sè-kài siōng bí-lē ê huî-khì, siōng-tsió ài tī iô-nih sio saⁿ pái. Ū-ê ài sio koh-khah tsuē pái. Dresden só͘ tshut-sán ê kuì-tiōng huî-á lóng it-tīng sio saⁿ pái. Uī-sím-mi̍h pit-su king-li̍k tsiah-nih kuâiⁿ jia̍t neh? Sio tsi̍t-pái, á-sī nn̄g-pái kiám buē sái mah? Buē īng-tit, hó ê huî it-tīng ài sio saⁿ-pái, án-ni hō͘ kim-sik, âng-sik kok-tsióng sik-tì kìng-ka iáⁿ-ba̍k bí-lē, koh buē thè-sik.

Lán sī tsiàu tsit ê guân-lí lâi liap-tsō ê, jîn-luī sing-ua̍h tiong ê buâ-liān, ná tshin-tshiūⁿ hé put-tuān ê sio-liān lán. Tuì Siōng-tè ê un-tián bí-lē ê sik-tshái tī lán lāi-bīn hîng-sîng, íng-uán tshàn-lān bô thè. --- Cortland Myers

Sè-tsiūⁿ siōng suí ê hue bô khui tī ū ji̍t ê pîⁿ-iûⁿ,
Sī tī kip-piàn tē phuà-lia̍t ê tsio̍h-phāng tsiūⁿ.
Siū-siong tī hong-hō͘, hé-tsai, hé-suaⁿ hu,
Siōng-tè suè-suè siaⁿ i-tī só͘ ū.
Tuì tshim-ian, tsio̍h-phāng piak-khui,
Lâu tshut ua̍h-tsuí,
Àm-sî thiⁿ-sài sù un-jiû lō͘-tsuí,
Tshing-tsá, Jîn-tsú lâi tshái hue-luí.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org