《台語荒漠甘泉（全羅版）》

 | | | 轉寄

"Ià-siān"

作者 陳清俊 翻譯 2012.12.23

listen


Tsa̍p-jī ge̍h jī-saⁿ (Tsa̍p-jī ge̍h jī-tsa̍p-saⁿ ji̍t)

"Khí-lâi tsia̍h ah, in-uī lō͘ tsin hn̄g; lí kiâⁿ bô huat-tit. " (I Lia̍t-ông-kì 19:7)

Siōng-tè án-tsuáⁿ tuì-thāi ià-siān ê lô-po̍k Í-lī-a? I hō͘ i khùn, koh hō͘ i tsia̍h. Í-lī-a tsuè tsin tsuē tāi-tsì, "tī A-hap ê thâu-tsîng tsáu kàu Iâ-su-lia̍t ê siâⁿ-mn̂g." (I Lia̍t-ông-kì 18:46) In-uī i tsáu tsin tsuē lō͘, īng liáu tsin tsuē thé-la̍t, suah hō͘ i sit-tsì, ì-tsì siau-tîm lo̍h khì. Tī tsit tsióng tsîng-hîng hā, lâng sī su-iàu hioh-khùn, sin-thé su-iàu tiâu-ióng, Í-lī-a ê sin-thé iā-sī án-ni.

Ū tsin tsuē uí-tāi ê lâng, in lóng kap Í-lī-a ū siâng-khuán ê tsîng-hîng, īng khì-liáu tsin tsuē thé-la̍t, "kàu tsi̍t tsâng lô-tîng-tshiū kha," (I Lia̍t-ông-kì 19:4) tsiū ì-tsì siau-tîm. Tsú ê uē tsin an-uì lâi kóng, "khí-lâi tsia̍h ah, lō͘-tô͘ iáu tsin hn̄g." Uāⁿ uē kóng, "Guá beh hō͘ lí hue-hok thé-la̍t."

Lán m̄-thang tsiong sin-thé ê ià-siān kap sim-lîng ê luán-jio̍k khuàⁿ tsuè siâng-khuán lâi tuì-thāi.

Guá ià-siān buē tàng sìn-khò, buē tàng kî-tó,
Thé-la̍t īng kè-thâu, suah pua̍h-tó,
Tsi̍t-hāng guá siūⁿ beh tsò,
Tsiū-sī pàng-hē it-tshè khì bîn-tshn̂g tó.

Lí siūⁿ Siōng-tè uē guân-liōng?
Guá tshin-tshiūⁿ iⁿ-á khùn an-siông,
I bô mn̄g guá sī-m̄-sī ū li̍k-liōng,
Thái-uē liân uá-khò kî-tó iā bô iōng?

Tshin-ài ê, Siōng-tè uē guân-liōng mah? Siūⁿ khuàⁿ-māi.
Tī lí iáu buē-hiáu kóng-uē ê sî-tāi,
Lí ê lāu-bú kiám m̄-sī án-ni kā lí khuán-thāi,
Á-sī tsiong lí phō tī I sim-huâi?

Lí bô kiû, I kiám hō͘ lí khiàm-īng,
I kiám hō͘ I ê kiáⁿ tsuè buē-lâi ê sū-tsîng?
Á-sī tsiong lí un-jiû phō tī I hing-tsîng,
Kò͘-siú lí an-bîn, pîng-tsīng.

Lāu-bú ê thiàⁿ-sim hō͘ I ū tsâi-tiāu,
Tsai iⁿ-á bô ì-sik ê su-iàu,
Tī lí siān kàu liân sìn-khò kî-tó iā buē-hiáu,
Tng lí kè-thâu īng thé-la̍t oh uan-khiau.

Pàng-hē it-tshè, an-hioh lâi,
Tshin-tshiūⁿ an-siông tī lāu-bú huâi-lāi,
Tsú tsai it-tshè, tshin-ài ê Tsú liáu-kái,
Ná iⁿ-á khùn kah lóng m̄-tsai.

M̄-bián mn̄g ē-sái á buē-sái,
I tsai I ê kiáⁿ-jî siān kàu kî-tó buē lâi,
I bô īng tshut-siaⁿ kî-tó tsuè kuat-sài,
I bîng-pi̍k sím-mi̍h sî lí su-iàu jîn-ài.

I tsai lí uē kî-tó, uē sìn-khò,
Tsai luán-jio̍k sin-thé tuì thô͘ tsō,
Ah, Ki-tok hô-tíng ê kuan-huâi koh khó-khò,
Tī puàⁿ-mî lâi kā ha̍k-sing so.

I tuì in kóng, an-sim khùn,
Tú sī tī I siū tsuân jîn-luī ê tsuē tîⁿ-khún
Tsiong lí ê sìⁿ-miā kau-thok I siōng an-ún,
M̄-bián kiaⁿ, an-sim hó-khùn pîng-sūn.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org