《台語荒漠甘泉（全羅版）》

 | | | 轉寄

"Pik-tshiat kî-tó"

作者 陳清俊 翻譯 2012.12.30

listen


Tsa̍p-jī ge̍h saⁿ-tsa̍p (Tsa̍p-jī ge̍h saⁿ-tsa̍p ji̍t)

"Tuì án-ni Pí-tik lâu tī kaⁿ-ni̍h; to̍k-to̍k kàu-huē thuè i tshiat-tshiat kiû Siōng-tè." (Sù-tô͘ hîng-tuān 12:5)

Pí-tik tī kaⁿ-nih thìng-hāu siū tshù sí, kàu-huē tī lâng ê hong-bīn bô lîng-li̍k, á-sī íng-hióng-la̍t lâi kiù i. Tē tsiūⁿ bô pang-tsān i ê hong-huat, tān-sī pang-tsān thang tuì thiⁿ nih lâi tit-tio̍h. Kàu-huē uī i hé-jia̍t khún-kiû ê kî-tó. Siōng-tè phài tsi̍t ê thiⁿ-sài, "thiⁿ-sài tah Pí-tik ê hia̍p-ē, kiò i tshíⁿ." (Sù-tô͘ hîng-tuān 12:7) Jiân-āu thiⁿ-sài tshuā i "king-kè tē it kap tē jī kò͘-siú ê só͘-tsāi, kàu thàu siâⁿ ê thih mn̂g; hit ê mn̂g uī-tio̍h in ka-kī khui;" (Sù-tô͘ hîng-tuān 12:10) Pí-tik tit-tio̍h tsū-iû.

Tī lí ê sìⁿ-miā khó-lîng ū bó͘-tsióng ê thih-mn̂g tòng lí ê lō͘. Tshin-tshiūⁿ tī lâng-á lāi ê tsiáu siông-siông tsing lâng-á kuaiⁿ, tse m̄-nā buē kái-kuat būn-tê, huán-tńg hō͘ lí phî-lô ià-siān. Tī tsia lí thang o̍h ê pì-kuat, tsiū-sī siong-sìn kî-tó. Tán lí kiâⁿ kàu thih-mn̂g piⁿ ê sî, uē tshin-tshiūⁿ Pí-tik tsi̍t-iūⁿ, thih-mn̂g tsū-tōng ka-kī khui lah.

Lí nā o̍h tio̍h tsá-kî kàu-huē hit-iūⁿ tī "lâu-tíng pâng" nih ê kî-tó, lí beh tsat-síng tsin-tsuē ê tsing-li̍k, kap tsuē-tsuē ê kan-khó͘ sit-bāng. Lí nā o̍h tio̍h tse kî-tó, sī īng Siōng-tè ê sìn-sim m̄-sī īng lí ê sìn-sim lâi kî-tó, buē thang khik-ho̍k ê khùn-lân uē siau-sit, gi̍k-kíng piàn sūn-kíng. Lí ê tsin-tsuē tshin-lâng í-king hō͘ Sat-tàn khún-pa̍k tī kaⁿ-nih tsin-tsuē nî ah, in teh thìng-hāu thih-mn̂g khui, tng lí pîng sìn-sim khiân-sîng put-tuān ǹg Siōng-tè kî-tó, in beh tī Ki-tok ê lāi-bīn tit tháu-pàng. --- C.H.P.

Tú-tio̍h kín-kip ê tsōng-hóng su-iàu jia̍t-tshiat ê kî-tó. Tng kî-tó ê lâng pún-sin tsiâⁿ tsuè kî-tó ê sî, Sím-mi̍h to tsó͘-tòng i buē tiâu. Í-lī-a tī Ka-bi̍t suaⁿ phak tī thô͘-kha, bīn giap tī kha-thâu-u tiong, i tsiâⁿ-tsuè kî-tó.

Kî-tó bô it-tīng ài tshut siaⁿ, jia̍t-tshiat ê kî-tó, bô it-tīng uē thang īng gú-giân lâi piáu-ta̍t. Īng Í-lī-a ê tsōng-hóng, i kui ê lâng kap Siōng-tè tsiap-tshiok, kap Siōng-tè liâm tsuè tsi̍t thé, liân-ha̍p tí-ti̍k ok sè-li̍k. Í-lī-a ê tuì-ti̍k tsiū tòng buē-tiâu tsit tsióng ê kî-tó lâng. Hiān-kim ti̍k-pia̍t su-iàu tsit tsióng lâng. --- tuì "Kuī-lo̍h ê sî-khik"

"Kóng buē tshut ê thó͘-khuì" (Lô-má 8:26) siông-siông sī Siōng-tè só͘ buē-thang kū-tsua̍t ê. --- Tsarles H. Spurgeon


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org