《台語荒漠甘泉（全羅版）》

 | | | 轉寄

"Tshiùⁿ-kua o-ló"

作者 陳清俊 翻譯 2013.05.05

listen

Gō͘ ge̍h tshue-gō͘ (Gō͘ ge̍h gō͘ ji̍t)

"In tú-á tshiùⁿ-kua o-ló ê sî, Iâ-hô-hua tsiū phài bâi-ho̍k ê ping kong-kik hiah ê lâi kong-kik Iû-tāi ê A-bûn, Mô͘-ap, kap Se-jíⁿ suaⁿ ê lâng; in tsiū siū-phah." (Ṳ Li̍k-tāi-tsì-lio̍k 20:22)

Ah, lán nā uē hiáu khah tsió uī-tio̍h ka-kī ê būn-tê huân-ló, khah tsuē ê o-ló tshiùⁿ-kua sī juā-tsiâⁿ hó! Lán nā tsai án-tsuáⁿ tsuè, tsiū uē tsiong tîⁿ-puàⁿ lán tshing-tshing bān-bān ê sū huà-tsuè ga̍k-khì. Tshì-siūⁿ uī-tio̍h sing-ua̍h teh siūⁿ, teh kè-uē, teh kè-kàu ê lâng, á-sī put-tuān teh gián-kiù thiⁿ-ni̍h ê ò-pì, sǹg-miā ê lâng, uī-hô in siū tsiah-nih tāng ê ap-li̍k, tuì sì-bīn pat-hong lâi ê huán-tuì kap tsing-tsiàn. Nā-sī in uē-hiáu tû-khì tsū-ngó͘ tiong-sim, tsiong ji̍t-siông ê king-li̍k kau-thok Siōng-tè, o-ló I, in ê sing-ua̍h beh ū juā-tsiâⁿ tuā ê bô siâng, beh ū tuā-tuā ê khuài-lo̍k.

Īng tshiùⁿ-kua lâi kái-iu, pí īng su-lū lâi kái-iu iông-ī tsin tsuē ah. Uī-hô bô tī tshing-tsá lâi tshiùⁿ kua? Tsiáu-á thàu-tsá tsiū sing tshiùⁿ-kua, in ê iu-tshiû pí kî-thaⁿ ê siū-tsō-bu̍t lóng khah tsió. Iā m̄-thang buē-kì-tit tī hông-hun ê sî tshiùⁿ-kua, tsiáu-á in tsuè uân tsi̍t-ji̍t ê kang-tsok, pe uân tsuè-āu ê lú-iû, tsia̍h tsuè-āu tsi̍t tshuì mi̍h liáu-āu, tsiū tī tshiū-tíng koh tshiùⁿ-kua o-ló.

Ah, lán thang tī tsá-sî tshiùⁿ-kua o-ló, tī àm-sî iā tshiùⁿ-kua o-ló, īng o-ló ê kua-siaⁿ tsi̍t-siú tsi̍t-siú lâi tshiùⁿ-tshut!

Kua-siaⁿ sī lí sing-ua̍h só͘ su-iàu,
Sui-bóng ū sî tī sió-tiāu,
Tsin kín tsiū beh huê kàu tsú-tiāu.

Sui-jiân ìm-iáⁿ jia-khàm sing-ua̍h,
Ji̍t-thâu tsiām-sî bô khuàⁿ,
Tsin kín tsiū uē hue-hok, lí nā kè-sio̍k tshiùⁿ-kua.

M̄ thang hō͘ kua-siaⁿ lī-khui lí ê sing-ua̍h,
Sui-jiân sī tsáu-im sit-siaⁿ ê kua,
Lí ê lîng iáu teh tshiùⁿ teh tuâⁿ.

M̄ thang hō͘ kua-siaⁿ lī-khui lí ê sing-ua̍h,
Tsāi-sè, sim-lîng lâi tuâⁿ tióng-tuā,
Kè-óng, iā beh tè lí kàu līng-guā sè-kài bô suah.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org