《台語荒漠甘泉（全羅版）》

 | | | 轉寄

"Siū-khó͘ ê kè-ta̍t"

作者 陳清俊 翻譯 2013.06.02

listen


La̍k ge̍h tshue-jī (La̍k ge̍h jī ji̍t)

"A-pik-la̍h-hán tī bô thang ǹg-bāng ê tiong-kan, tuì ǹg-bāng lâi sìn, ... i ê sìn bô nńg-tsiáⁿ;" (Lô-má 4:18-19)

Guá íng-uán buē buē-kì-tit tuā sìn-sim Siōng-tè ê po̍k-jîn Mu-lá (George Mueller) só͘ kóng ê tsi̍t kù uē. Ū lâng mn̄g i án-tsuáⁿ pó-tshî kian-kiông ê sìn-sim, i án-ni huê-tap kóng, “Î-it beh pó-tshî sìn-sim ê hong-huat sī ài jím-siū tuā ê khó-giām. Guá o̍h tio̍h sìn-sim sī khiā tiâu tī giâm-keh ê tshì-thàm.”

Tsin tio̍h! Tng kî-thaⁿ lóng sit-khì lah, lí pit-su sìn-khò Siōng-tè.

Tshin-ài ê lîng-hûn ah, lí khó-lîng iáu buē liáu-kái lí hiān-tsāi ê kè-ta̍t. Nā-sī lí tsit-sî tú-tú siū tio̍h tuā khó͘-thàng, lí sī khiā tī tuā sìn-sim ê guân-thâu. Siōng-tè īng o͘-àm ê khuân-kíng kà-sī lí án-tsuáⁿ khîⁿ tiâu I ê pó-tsō, tsí-iàu lí guān-ì uá-khò I.

“Bo̍h-tit kiaⁿ, tsí ū tio̍h sìn.” (Má-khó 5:36) Ká-sú lí uē kiaⁿ, tsiū giâ thâu gióng-bōng kóng, “Guá tī kiaⁿ-hiâⁿ ê sî, guá beh uá-khò Lí.” (Si-phian 56:3) Jiân-āu lí uē kám-siā Siōng-tè īng pi-siong lâi hùn-liān lí, hō͘ lí ê sìn-sim tit sîng-tióng. --- A. B. Simpson

Tuā sìn-sim sī tuì siū-kè tuā tshì-giām lâi sán-sing ê.

Siōng-tè siōng tuā ê un-sù sī thong-kè tuā khùn-khó͘ lâi tit ê. Tī lîng-sìng siōng á-sī tsū-jiân-kài, nā bô king-kè tuā ê lô-khó͘, ló͘-li̍k, lâu ba̍k-sái, lí kiám uē tit-tio̍h sím-mi̍h kè-ta̍t ê mi̍h mah? Jīm-hô tuā kái-kik, tuā huat-kiàn, tuā lîng-hûn ê kak-tshíⁿ, hok-hing, nā bô king-kè jīn-tsin ló͘-li̍k, lâu-kuāⁿ lâu-huih lâi phah-piàⁿ kiám uē tit-tio̍h? Tsiah ê lâng hù-tshut khó͘-lān ê tāi-kè, tshin-tshiūⁿ sing-sán ê tīn-thiàⁿ. Uī-tio̍h khí sìng-tiān, Tāi-pi̍t uē jím-siū kiông-lia̍t ê thòng-khó͘. Uī-tio̍h tuì Iû-thài thuân-thóng thuân-tshut un-tián ê hok-im, Pó-lô it-sing tsiū jím-siū kú-kú tn̂g-tn̂g ê khó͘-lān.

Ià-siān, tāng-tàⁿ ê sim lâi kàu Lí ê si̍p-jī-kè tsîng,
Tuì siōng tuā ê sún-sit beh tsiâⁿ siōng tuā ê siu-sîng.
Hi-sing, hō͘ lí ná ko-kuì, ná sîn-sìng.
Tsiâⁿ tshing tsiâⁿ bān ê hue-luí tsiah liān tshut tsit tih phang-tsing.

In-uī hong-thai tshe, khí tuā íng,
Hái-tsuí ná piàn tshing,
Khong-tiong siōng suí kíng-tì bô tī tiong-tàu huat-sing,
Luî-tân, sih-ná sih, hong-hō͘ āu, thiⁿ tsiah tshut tshái-khīng.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org