《台語荒漠甘泉（全羅版）》

 | | | 轉寄

Tsuè ông ê kang

作者 陳清俊 翻譯 2006.11.12

listen



Tsa̍p-it ge̍h tsa̍p-jī ji̍t

"Tsiah ê lâng lóng sī sio-huî sai-hū, sī Nî-tha-ìng kap Ki-te-la̍h khiā-khí ê peh-sìⁿ; in tī-hia kap ông khiā-khí, tsuè ông ê kang." (I Li̍k-tāi-tsì-lio̍k 4:23)

Lán thang tī jīm-hô ê só͘-tsāi "kap ông khiā-khí, tsuè ông ê kang." Lán khó-lîng siū-tiàu khì siōng bô khó-lîng ê só͘-tsāi, tī siōng kan-lân ê tsîng-hîng uī Tsú tsuè kang. Khó-lîng tī tsng-kha, kap Ông ê tsin-tsuē siâⁿ-lāi ê ua̍h-tāng keh-lī. Iā khó-lîng tī "hue-hn̂g, kap lî-pa tshiū ê tiong-kan" ū tsin-tsuē tsó͘-tòng kap that-gāi uî teh. Iā lán khó-lîng sī sio-huî sai-hū, tshiú nih ū kok-tsióng ê huî-á thô͘-phe, lâi uân-sîng lán muí-ji̍t ê kang-tsok.

Tī tó-uī lóng bô kuan-hē, Ông an-pâi lán tī hia, I uē lâi kap lán tsuè-hé. Lî-pa, tsó͘-gāi tuì lán iā ū lī-ik, nā-bô I tsá tsiū kā in suá-khui loh. Kìⁿ-nā tsó͘-tòng lán ê mi̍h-kiāⁿ, khó-lîng iā sī kā lán pó-hō͘, tse kiám m̄-sī tsin ha̍p-lí ê mah? Huî-á phe, he sī I jīm-uî sik-ha̍p hē tī lán tshiú tiong ê mi̍h, sik-ha̍p hiān-tsāi ê "uī ông tsuè-kang." --- Frances Ridley Havergal

Tshin-ài ê, kàu lí ê hn̂g tsuè-kang,
Kàu ji̍t lo̍h suaⁿ tsiah pàng,
Khún tshiū-tîn, pa̍k hue-tsâng,
Kàu Tsú-lâng kiò tsiū khin-sang.

Tsīn lí ê la̍t jīn-tsin tsuè tshing-khì,
Tsuè-kang m̄-sī lí ka-kī,
Khó-lîng tī keh-piah hn̂g tsuè-kang ê i,
Siu-tsíng i ê hn̂g, khuàⁿ tio̍h lí.

Ji̍t-lo̍h, sik-iông to-tshái, lia̍p-lia̍p-sih ê thiⁿ-tshiⁿ, uí-tāi ê kuâiⁿ-suaⁿ, huàn-iáⁿ kng ê hái-kíng, phang-bī muá sì-kuè ê tshân-iá, sin-sian iām-lē ê hue, lóng buē thang pí tsi̍t ê thiàⁿ Tsú ho̍k-bū sū-hōng Iâ-so͘ ê phó͘-thong-lâng koh khah bí-lē, koh-khah suí. --- Frederick William Faber

Siōng suí siōng sîn-sìng ê lîng-hûn sī siáⁿ-khuán? M̄-sī ū tshut-miâ ê, ū sū-gia̍p, kong-lô, lâu hō͘ lâng tui-su ê lâng. Sī tsi̍t ê kè pîng-tsīng, sìng-kiat sing-ua̍h ê lâng, tiām-tiām khui phang-phang ê hue bô ài lâng tsai, tshin-tshiūⁿ iu-kok bô lâng kàu tshing-tshing sió-khue piⁿ khui ê pik-ha̍p-hue. --- Kenelm Digby

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw