《台語荒漠甘泉（全羅版）》

 | | | 轉寄

Tú-tio̍h huān-lān

作者 陳清俊 翻譯 2006.11.19

listen




Tsa̍p-it ge̍h tsa̍p-káu ji̍t

"Lí sī hō͘ guán li̍k-kè tsuē-tsuē tuā huān-lān ê, Lí beh hō͘ guán koh-tsài ua̍h." (Si-phian 71:20)

Siōng-tè hō͘ lí king-li̍k tio̍h "guî-hiám huān-lān," ū-sî sī lí ê kàu-io̍k ê tsi̍t pō͘-hūn, lí "beh hām-lo̍h tī tuē-ē tshim ê só͘-tsāi" (Si-phian 63:9), king-kè tē-ē thong-tō, tó tī sí-lâng tiong-kan, tsóng-sī lí kap Siōng-tè ê kau-thong, liân-lo̍k bô kàu tn̂g ê tē-pō͘. Kàu-bé I beh hō͘ lí tuì tē-ē "koh-ua̍h."

Íng bô huâi-gî Siōng-tè! Bo̍h-tit kóng I pàng-sat lí, buē-kì-tit lí, á-sī bô tông-tsîng lí. I beh "hō͘ lí koh-ua̍h," put-kuán lō͘-tô͘ sī khi-khu uan-khiau, lóng uē ū pîⁿ-pîⁿ ti̍t-ti̍t ê tsi̍t-tuāⁿ. Siōng tn̂g ê ji̍t iā ū ji̍t-lo̍h ê sî, Tang-thiⁿ ê seh tsûn tsin tn̂g iā ū iûⁿ-uân ê sî.

Ài kian-tīng put-î, kian-kò͘ bô iô-tsuah, "in-uī tsai lín tī Tsú tio̍h-buâ ê m̄-sī khang-khang." (I Ko-lîm-to 15:58) I uē ua̍t-tńg-sin lâi an-uì lí. Tng I án-ni tsuè, lí ê sim suah m̄-tsai beh án-tsuáⁿ kám-siā tshiùⁿ-kua o-ló I, tshin-tshiūⁿ si-jîn kóng, "Guá ê tsi̍h beh tuā-siaⁿ gîm-si o-ló Lí ê gī." (Si-phian 51:14)

Hō͘ lo̍h, hong tshe,
Hân-líng tang-thiⁿ tē,
O͘-hûn ná lâi ná tsuē,
Hio̍h la̍k, jua̍h-thiⁿ kè.

Ba̍k-tsiu tsù-sîn hong-thai-thiⁿ,
Sim pîng-tsīng ná jua̍h-thiⁿ-sî,
Guān-ì tsiap-siū Tsú só͘ si,
Put-kuán sī sím-mi̍h.

Tng kám-kak líng, tsiū kóng "I siúⁿ-sù,"
Tsai I ê hong tshe tuà lâi hó-tshù,
Só͘ khiàm-īng I kiòng-ìng bô tiu-tû,
Sui líng-hong tshe, sim-läi iáu un-luán kú-kú.

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw