《台語荒漠甘泉（全羅版）》

 | | | 轉寄

"Guá ê un-tián kàu-gia̍h lí īng"

作者 陳清俊 翻譯 2007.08.05

listen


Pueh ge̍h tshue-gō͘ (Pueh ge̍h gō͘ ji̍t)

"Ū guá ê un, lí tsiū kàu-gia̍h." (Ṳ Ko-lîm-to 12:9)

Siōng-tè “huaⁿ-hí” (I Ko-lîm-to 1:21) tsiong guá ê siōng suè-hàn ê kiáⁿ-jî tuà lī-khui tsit ê sè-kài. Tsit ê giâm-tiōng ê khó-giām hō͘ guá tsin thòng-khó͘. Guá tsiong suè-suè ê si-thé hē ji̍p tī bōng ni̍h í-āu, tuì kàu-tn̂g ê bōng-tē tńg-lâi ê sî, ū tsi̍t ê li̍k-liōng ài guá ǹg huē-tsiòng suan-kóng siū khó͘-lān ê ì-gī.

Guá huat-kiàn āu ê lé-pài-ji̍t tsú-ji̍t-o̍h ê khò-tê sī “Guá ê un, kàu-gia̍h lí īng” Guá tsiū īng i tsuè tê-ba̍k, sī Tsú tuì huē-tsiòng tuì guá ê sìn-sit. Tsóng-sī guá tsún-pī káng-tsiuⁿ ê sî, huat-kiàn guá pīng bô tsin-tsiàⁿ tsit-tsióng ê sing-ua̍h thé-giām. Guá kuī-lo̍h, kiû Tsú hō͘ I ê un-tián tuì guá ū kàu-gia̍h īng. Guá teh kiû ê sî, ba̍k-tsiu phah-khui tsi̍t-ē khuàⁿ, tsit kù king-bûn í-king tsng-khing kuà tī piah-tíng. Sī guá ê lāu-bú nn̄g-saⁿ kang tsîng hō͘ guá ê. Hit-sî guá iáu sī tī sit-khì kiáⁿ tō͘-kà ê só͘-tsāi, lâng bô tī tshù ni̍h. Guá tshiáⁿ lâng kā i kuà khí-lâi, tān-sī bô tsù-ì tio̍h tíng-bīn ê jī. Tsit-sî guá giâ thâu tsi̍t-ē khuàⁿ, hiah ê jī tsiū tī gán-tsîng. “Guá ê un-tián sī kàu-gia̍h lí īng.”

“Sī” sī īng bîng-hián ê li̍k-sik siá, “guá ê” kap “lí” koh īng līng-guā tsi̍t sik piau tshut-lâi. Ū tsi̍t ê sìn-sit má-siōng ji̍p guá ê sim-lîng lāi. Ná tshin-tshiūⁿ tsik-pī guá uī-sím-mi̍h iau-kiû Tsú “hō͘ lí ê un-tián kàu-gia̍h guá īng”, guá tsha-put-to thang thiaⁿ-kìⁿ I ê tap-hok: “Lí thài uē iau-kiû í-king “sī” ê mi̍h-kiāⁿ neh?” Guá buē hō͘ guá ê un-tián pí guá í-king hō͘ lí ê khah tshiong-tsiok. Khí-lâi, sìn i. Lí uē huat-hiān tse sī tsin-tsin si̍t-si̍t ê sing-ua̍h king-giām.

Tsú ê uē kóng tit tsin kán-tan. “Guá ê un-tián sī, (“m̄-sī tsiong-lâi, á-sī khó-lîng”), kàu-gia̍h lí īng” Hit-sî khí, “guá ê” “lí” kap “sī” tsit saⁿ jī tsiū íng-uán khik tī guá ê sim-lāi, buē bô khì. Kám-siā Tsú, tuì hit kang khí, guá it-ti̍t ló͘-li̍k sing-ua̍h tī hit ê tsin-lí ê si̍t-tsāi ni̍h.

Tsit-ê king-giām hō͘ guá kap guá só͘ siūⁿ beh thuân-ta̍t hō͘ lâng ê kà-sī sī: Bo̍h-tit tsiong Siōng-tè í-king si̍t-hîng ê sū iáu teh hi-bōng, iáu teh kiû. Ing-kai sóng-sóng khuài-khuài tsiap-siū tsit ê hiān-si̍t. Lí tsiū uē huat-hiān tsí-iàu lí siong-sìn, Siōng-tè ê un-tián kàu-gia̍h lí īng. --- H.W. Webb Peplue

Tàⁿ ná tāng, un-tián ná tit the̍h,
Kang lú tsuè, li̍k-liōng lú ke,
Thòng-khó͘ tsing-ka, lîn-bín khah tsuē,
Tshì-liān ka-pē, pîng-an iā ka-pē.

Tng jím-nāi kàu hān-tō͘, buē tòng,
Tng li̍k-liōng puàⁿ-kang tsiū bô lō͘-iōng,
Tng só͘-ū tsu-guân īng kàu tsīn-pōng.
Thiⁿ-pē hong-hù ê siúⁿ-sù tsiah khai-sí hîng-tōng.

I ê thiàⁿ bô hān-liōng, koh ū buē tshik-to̍k ê un,
I sù lâng bû-hān li̍k-liōng tn̂g-tn̂g kú-kú,
Tī Iâ-so͘ lāi, bû-kiông ê hong-hù,
I siúⁿ-sù, koh siúⁿ-sù, tsài siúⁿ-sù.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw