《台語荒漠甘泉（全羅版）》

 | | | 轉寄

"Siōng-tè ê ìng-ún"

作者 陳清俊 翻譯 2007.08.12

listen


Pueh ge̍h tsa̍p-jī (Pueh ge̍h tsa̍p-jī ji̍t)

"í-king ū pó-puè kap ki̍k tuā ê ìng-ún siúⁿ-sù lán." (Ṳ Pí-tik 1:4)

Tsō tsûn ê lâng tsō hó tsi̍t tsiah tsûn, i kiám tsí-sī kā i khǹg tī tsûn-khò͘ nih? Tong-jiân m̄-sī; i tsō tsûn sī beh hō͘ tsûn thang khì hâng-hái, khì kiâⁿ tī hái-siōng bīn-tuì hong-íng. Sū-si̍t-siōng, i tsō-tsûn ê sî, nā bô kè-uē tsûn uē tí-tng, ū kàu ióng tòng uē-tiâu kông-hong tuā-íng, i tsiū bô kàu tsu-keh tsō tsûn.

Siâng-khuán, Siōng-tè puê-iúⁿ lí tsuè sìn-tô͘, I it-tīng beh tshì-giām lí. I sù hō͘ lí ìng-ún, kiò lí siong-sìn, I hi-bāng lí tsià-tio̍h tsiah ê ìng-ún khì ìng-hù jîn-sing tiong ê po̍k-hong hái-tô. Lí kiám siūⁿ I ê ìng-ún sī ké ê, ná tshin-tshiūⁿ tsi̍t niá kiù-sing-i, tī siong-tiàm lāi tsin hó khuàⁿ, the̍h kàu tī tsuí-tíng khiok bô lō͘-īng mah?

Lán ū khuàⁿ tio̍h tsing-bí ê kiàm, tsóng-sī buē thang tsuè sio-thâi lâi īng, iā kìⁿ kè tsuè tsong-sik ê uê, buē thang tsuè kiâⁿ lō͘ īng. Tān-sī Siōng-tè ê uê sī īng thih, īng tâng tsuè ê, lán thang tshīng i, tsi̍t lō͘ kiâⁿ kàu thian-tông iā buē buâ-ui khì. Lán tshīng I ê kiù-sing-i thang tī Tuā-se-iûⁿ siû-tsuí tsi̍t tshing pái iā m̄-kiaⁿ tîm lo̍h-khì. I ê ìng-ún ê uē sī ài lí khì tshì, khì īng.

Ki-tok siōng bô huaⁿ-hí lâng kong-khai sìn I, khiok bô īng I. I huaⁿ-hí lán kā I sú-iōng, in-uī I kap lâng ê li̍p-iok sī sù-hok-khì ê, m̄-sī beh hō͘ lâng him-sióng ê, khuàⁿ ê, sī ài lán kā īng. Tsú Iâ-so͘ ê siúⁿ-sù sī beh hō͘ lán hiān-tsāi tsiū kā i sú-iōng, lí sī-m̄-sī tsīn tsik-jīm lâi sú-iōng ah?

Ah, Tshin-ài ê pîng-iú, guá kiû lí m̄-thang tsiong Siōng-tè ê ìng-ún tòng-tsuè khǹg tī phok-bu̍t-kuán ê pó-puè mi̍h, ài kā i sú-iōng, tsiâⁿ-tsuè ji̍t-siông an-ia̍t sing-ua̍h ê tsu-guân. Bô lūn sím-mi̍h sî lí su-iàu, tsiū sìn-khò Siōng-tè. --- Tsarles H. Spurgeon

Kàu Siōng-tè ìng-ún ê tshim-tshù,
Tsīn lí só͘ ài khì tshú,
I ê sù-hok sī hong-hù,
I só͘ kóng ê uē it-tīng si̍t-hiān muí tsi̍t kù.

Siōng-tè thái-uē tuì I só͘ ìng-ún ê tāi-tsì kóng m̄ neh?


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw