《台語荒漠甘泉（全羅版）》

 | | | 轉寄

An-tsīng ê Li̍k-liōng

作者 陳清俊 翻譯 2007.10.28

listen

Tsa̍p ge̍h jī-pueh (Tsa̍p ge̍h jī-tsa̍p-pueh ji̍t)

"Siōng-tè ê lîn-bín tsin hong-sīng, uī-tio̍h I thiàⁿ lán ê tuā jîn-ài, tng lán tuì kè-sit í-king sí ê sî, tsiū hō͘ lán kap Ki-tok tâng-ua̍h. Iā hō͘ lán tī Ki-tok Iâ-so͘ kap I tâng khí-lâi, tâng tsē tī thiⁿ-nih." (Í-hut-só͘ 2:4-6)

Tse sī tio̍h ê só͘-tsāi, "kap Ki-tok tâng tsē tī thiⁿ-nih" an-tsīng tsē tī hia. Tsóng-sī tsin khó-sioh, tsin tsió lâng ū tsit khuán ê king-giām. Sū-si̍t-siōng, tuā pō͘-hūn ê lâng siong-sìn tse sī bô khó-lîng ê, tsi̍t hong-bīn sing-ua̍h tī tsit ê huân-tsa̍p ê sè-kài, koh tsi̍t hong-bīn an-tsīng tsē tī thiⁿ-nih.

Ū lâng kóng, tī lé-pài ji̍t, á-sī ū sî-tsūn, kàu lé-pài-tn̂g ū lîng-sìng ê kiông-tiāu, ū o-ló ê khì-hun, tsiū ná tshin-tshiūⁿ "an-tsīng tsē tī thiⁿ-nih," tse sī khó-lîng, nā-sī kóng kui-kang, muí tsi̍t kang "tsē" tī hia, tsiū uân-tsuân bô siâng-khuán. Tsóng-sī sìng-king bîng-bîng kóng, m̄-sī kan-nā tī Tsú-ji̍t, sī muí-tsi̍t ji̍t ê sū.

Tng lán tī guā-bīn ua̍h-tāng ê sî, ū pîng-tsīng ê sim-lîng sī bô-kè tsi pó. Bô ū sím-mi̍h pí sim-sîn put-an, á-sī iu-lū huân-ló koh-khah uē hóng-gāi tio̍h Siōng-tè khuàⁿ-buē-tio̍h sim-lîng ê li̍k-liōng, in-uī lán lóng sī khò tse lâi tit-tio̍h sîng-kong.

An-tsīng sī ū tsin tuā ê li̍k-liōng. Tsi̍t ê uí-tāi ê sìn-tô͘ kóng, "Huân-nā tsai án-tsuáⁿ khò Siōng-tè kap pó-tshî an-tsīng ê lâng, só͘ tsuè ê sū lóng sūn-lī." Lán nā uē tsai tsit ê ì-sù, tsiū uē tsìng-khak liáu-kái, an-tsīng thang tuā-tuā kái-piàn lán ê kang-tsok hong-sik. Bô su-iàu kè-sio̍k ka-kī sim-sîn put-an, ló͘-li̍k tsing-tsat, lāi-sim thang "tsē" tī Tsú ê bīn-tsîng, hō͘ Sìng-lîng sio̍k thiⁿ ê li̍k-liōng an-tsīng uī lán tsuè kang, uân-sîng lán ê bo̍k-piau kap ǹg-bāng.

Lí khó-lîng khuàⁿ buē tshut, iā kám-kak buē tio̍h tsit ê Siōng-tè tsīng-tsīng ê luē-tsāi li̍k-liōng, tsóng-sī tse sī it-ti̍t teh kang-tsok, tsí-iàu lí an-tsīng lí ê sim hō͘ tsit ê tsīng-tsīng ê la̍t tuà lí hiòng tsîng. --- Hannah Whitall Smith

Hong-thai ê tiong-sim tsin ò-biāu pîng-tsīng,
Suè-hàn gín-ná bô tio̍h kiaⁿ, khùn tsīng-tsīng,
Liân thâu-mn̂g mā pó-tshî guân-hîng,
Tī tuā tńg-se̍h suân-o tiong ū kî-biāu ê an-lîng.

Tī jīm-hô ê khuân-kíng tiong, tì-ì ha̍k-si̍p tī Siōng-tè lāi ê pîng-tsīng kap an-siông.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw