《台語荒漠甘泉（全羅版）》

 | | | 轉寄

Tshiau-kè lán só͘ kiû só͘ siūⁿ ê un-sù

作者 陳清俊 翻譯 2007.11.25

listen
Tsa̍p-it ge̍h jī-gō͘ (Tsa̍p-it ge̍h jī-tsa̍p-gō͘ ji̍t)

"Kia̍h hiah ê tsìⁿ, ... phah tuē. I phah saⁿ-pái tsiū suah. Siōng-tè ê lô͘-po̍k siū-khì i kóng, Lí hit-tia̍p tio̍h phah gō͘-la̍k pái." (Ṳ Lia̍t-ông-kì 13:18-19)

Tsit kuí kù uē só͘ thuân ê sìn-sit sī juā-tsiâⁿ siū tsù-ì koh ū-la̍t! Í-sik-lia̍t ông Iok-a-si "phah saⁿ-pái tsiū thîng" í-king tsuè kàu tsin hó lah. Tuì i kóng, í-king piáu-sī i ti̍k-pia̍t ū sìn-sim ê hîng-uî lah. Tsóng-sī Iâ-hô-hua ê sian-ti Í-lī-sa tsin sit-bāng, in-uī ông phah tsi̍t-puàⁿ tsiū thîng-tsí.

Sī, Ông khak-si̍t ū tit-tio̍h tsi̍t kuá ìng-ún, sū-si̍t-siōng, Siōng-tè só͘ hō͘ i ê iā buē tsió. Tān-sī Iok-a-si pīng bô tit-tio̍h Í-lī-sa phah-sǹg hō͘ i á-sī Iâ-hô-hua só͘ beh hō͘ i ê it-tshè. I bô bîng-pi̍k Siōng-tè ìng-ún ê tuā pō͘-hūn ì-gī kap sù-hok ê hong-hù. I khak-si̍t tit-tio̍h pí jīm-hô sè-kan lâng khah tsuē ê mi̍h, tsóng-sī bô tit-tio̍h Siōng-tè siōng-hó ê un-sù. --- A.B. Simpson

"Siōng-tè uē kiâⁿ-tsuè puâⁿ-kè tī lán it-tshè só͘ kiû só͘ siūⁿ ê, tsiū-sī tsiàu I só͘ ūn-hîng tī lán ê kuân-lîng, guān tī kàu-huē kap tī Ki-tok Iâ-so͘ îng-kng kui I kàu bān sè, tāi-tāi bô suah." (Í-hut-só͘ 3:20-21)

Sù-tô͘ Pó-lô bô tī pa̍t só͘-tsāi īng-kè tsit ê jī-kù kóng,"puâⁿ-kè tī lán it-tshè só͘ kiû só͘ siūⁿ." Muí tsi̍t jī tshiong-muá Siōng-tè bû-tsīn ê thiàⁿ kap uī I ê khíng kî-kiû ê sìn-tô͘ "sîng-tsiū" ê lîng-li̍k. Tsóng-sī ū ē-bīn ê tsit ê hān-tsè: "tsiàu I só͘ ūn-hîng tī lán ê kuân-lîng." I uē sîng-tsiū lán tsí-ū kàu tī lán só͘ ài ê sîng-tsiū. Siâng tsit ê li̍k-liōng, I tsín-kiù lán, īng I ê pó-huih sué lán tshing-khì, īng I ê lîng tshiong-muá lán, pó-hō͘ lán bô siū iú-hi̍k, uē uī lán ìng-hù muí tsi̍t ê kín-kip tsōng-hóng, muí ê guî-ki, muí ê khuân-kíng, kap muí tsi̍t ê ti̍k-jîn. --- tuì "Suan-tō-huē pò"


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw