《台語荒漠甘泉（全羅版）》

 | | | 轉寄

Siū khó͘

作者 陳清俊 翻譯 2007.12.02

listen

Tsa̍p-jī ge̍h tshue-jī (Tsa̍p-jī ge̍h jī ji̍t)

"tuì khó͘-lān lâi tsiâⁿ uân-tsuân." (Hi-pik-lâi 2:10)

Guá bat thiaⁿ kè kóng, Ū tsi̍t ê lāu-bú tshuā tio̍h tsi̍t ê khiau-ku koh páiⁿ-kha ê gín-ná lâi kap i ê kiáⁿ tsuè phuāⁿ. I ti̍k-pia̍t kíng-kò kiáⁿ kóng, m̄-thang thê-khí hit ê gín-ná ê kî-hîng, koh-iūⁿ, in-uī i tuì tse tsin bín-kám. I iā kó͘-lē kiáⁿ kap tsit ê gín-ná tsuè-hé tshit-thô, tshin-tshiūⁿ tsi̍t ê phó͘-thong ê gín-ná. Tsóng-sī nn̄g ê gín-ná sńg bô juā kú, lāu-bú thiaⁿ tio̍h kiáⁿ mn̄g hit ê gín-ná kóng, "Lí tsai lí ê ka-tshiah-phiaⁿ pē sím-mi̍h mi̍h-kiāⁿ?" Hit ê gín-ná kám-kak tsin uî-lân, iáu buē huê-tap tsi̍t ê būn-tê tsìn-tsîng, kiáⁿ í-king thè gín-ná huê-tap kóng, "Sī tsi̍t ê pó-a̍h, lāi-bīn hē lí ê tsi̍t-tuì si̍t, ū tsi̍t ji̍t Siōng-tè uē phah-khui i, lí tsiū tshin-tshiūⁿ thiⁿ-sài uē pe khí-lâi."

Ū tsi̍t kang, Siōng-tè uē hō͘ muí tsi̍t ê ki-tok-tô͘ bîng-pi̍k hiān-tsāi in só͘ huán-tuì ê, tsiàⁿ-sī Siōng-tè īng lâi hō͘ in uân-tsuân, lia̍p-tsō in tsuè kng-ku̍t ê ua̍h-tsio̍h tī thian-kok nih. --- Cortland Myers

Siū-khó͘ sī puê-ióng phín-keh ê sîn-kî puî-liāu. Lán it-sing ê bo̍k-piau sī lia̍p-tsō lán ê phín-keh, phín-keh sī lán thang tuà-ji̍p íng-sing î-it ê mi̍h. Ko-sióng ê phín-keh sī lán siū tshì-liān, siū buâ-liān ê bo̍k-tik. --- Austin Phelps

Beh ta̍t-kàu īⁿ-siōng ê suaⁿ, bô pa̍t lō͘, tsí-ū tshì-phè ê lō͘ thang kiâⁿ.

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw