《台語荒漠甘泉（全羅版）》

 | | | 轉寄

"Sin-uan"

作者 陳清俊 翻譯 2008.02.10

listen

Jī ge̍h tshue-tsa̍p (Jī ge̍h tsa̍p ji̍t)

"bo̍h-tit ka-kī sin-uan," (Lô-má 12:19)
Ū tsin tsuē sî-tsūn, beh pó-tshî tsīng-tsīng m̄ kóng uē, pí jīm-hô ê hîng-tōng, sī su-iàu koh khah tuā ê gē-li̍k kap ióng-khì. Pó-tshî pîng-tsīng, bô siū guā-lâi ê íng-hióng sī siōng tuā li̍k-liōng ê piáu-hiān. Tsú Iâ-so͘, tng tú-tio̍h siōng ok-to̍k, siōng tì-miā kong-kik ê sî, I pó-tshî tsīng-tsīng, m̄ kóng tsi̍t-kù uē. I ê an-tsīng só͘ huat-tshut ê li̍k-liōng, hō͘ tāi-tsiòng, kap khòng-kò ê, lóng khí kiaⁿ. I tuì ki̍k-tuā ê lîng-tī, siōng tsân-jím ê tuì-thāi, lóng sī bô puàⁿ siaⁿ, pó-tshî tiām-tiām. Kìⁿ-nā siū kè bô kong-pîⁿ ê khòng-kò, put-pîng ê thāi-gū ê lâng, lóng tsai pó-tshî an-tsīng bô tshut siaⁿ, hō͘ Siōng-tè khì sin-uan, sī su-iàu ki̍k-tuā ê gē-li̍k.

Lâng beh gō͘-huē,
Tshē khang-phāng teh hue,
Kóng lí tshò kàu té;
Pó tiām-tsīng bô huê,
Sím-phuàⁿ-kuaⁿ sī Ki-tok, m̄-sī in teh tsuè,
Bo̍h-tit kiaⁿ, kian-kiông sī pó-puè.

Sù-tô͘ Pó-lô kóng, "Nā-sī guá bô lia̍h sìⁿ-miā tsuè iàu-kín," (Sù-tô͘ hīng-tuān 20:24) tsiū-sī "bô tsi̍t hāng sū uē kā guá iô-tāng". I bô kóng "bô tsi̍t hāng sū uē hō͘ guá siong-sim." Siong-sim kap bô iô-tāng sī ū tuā-tuā ê tsing-tsha. Sìng-king kì-tsāi, Pó-lô īng un-jiû ê sim lâu ba̍k-sái, ( Sù-tô͘ hīng-tuān 20:19, 31) ing-hiông bô khin-ī lâu ba̍k-sái. Sìng-king iā kóng, "Iâ-so͘ lâu ba̍k-sái." (Iok-hān hok-im 11:35) I sī iú-sú í-lâi siōng kian-kiông ê lâng.
Pó-lô tuì tsuè tāi-tsì bô lia̍h sìⁿ-miā tsuè iàu-kín, bô khuàⁿ sè-kan ê mi̍h tsuè pó-puè, iā m̄-kiaⁿ tàⁿ juā tāng. Tsí-ū tsi̍t hāng i kuan-sim tsiū-sī tuì Ki-tok tiong-sim, só͘ tsuè lâi hō͘ Ki-tok huaⁿ-hí. Pó-lô pí jīm-hô tsi̍t lâng, khah thé-giām tio̍h, tsuè Ki-tok ê kang sī i tē-tsiūⁿ ê pò-siúⁿ, tit-tio̍h Ki-tok ê huaⁿ-hí tsiah sī i thiⁿ-ni̍h ê pò-siúⁿ. --- Margaret Bottome

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw