《台語荒漠甘泉（全羅版）》

 | | | 轉寄

"Sìn só͘ kiû ê"

作者 陳清俊 翻譯 2008.02.17

listen

Jī ge̍h tsa̍p-tshit (Jī ge̍h tsa̍p-tshit ji̍t)

"taⁿ lí tio̍h khí-lâi, ... khì Guá só͘ siúⁿ-sù Í-sik-lia̍t ê tuē." (Iok-su-a 1:2)

Tī tsit ê king-bûn, sī kóng tāi-tsì má-siōng beh huat-sing ê, m̄-sī kóng tsiong-lâi ē huat-sing, sī hiān-tshú-sî teh tsìn-hîng ê tāi-tsì. Kim-ji̍t, I hō͘ lí kim-ji̍t ê só͘-kiû, lâi tshì lí ê sìn-sim. Tng lí pîng sìn-sim kiû, Siōng-tè tsiū put-tuān beh hō͘ lí. Ká-sú lí it-bī thìng-hāu, ǹg-bāng, tshē-kiû, tse m̄-sī sìn-sim. Jia̍t-tshiat ê ǹg-bāng, sī bô kàu-gia̍h, m̄-sī sìn-sim. In-uī "Sìn tsiū-sī só͘ ǹg-bāng ê ê si̍t-tsāi, kap bē khuàⁿ-kìⁿ ê sū ê pîn-tsún." (Hi-pik-lâi 11:1) Tsú ài lán pîng sìn-sim ê kî-tó sī án-ni, "Kìⁿ-nā lín só͘ kî-tó lâi kiû ê, tio̍h sìn sī í-king tit-tio̍h, tsiū beh kā lín tsiâⁿ." (Má-khó 11:24) Lán hiān-tsāi ài sìn sī í-king tit-tio̍h lah. Lán beh kap Siōng-tè tī íng-uán ê Hiān-tsāi saⁿ tú-tio̍h, lán ū tsuè kàu án-ni mah? --- tuì "Iok-su-a" A.B. Simpson tù-tsok
Tsin-si̍t ê sìn-sim sī khò Siōng-tè, iā iáu buē huat-sing tsiū sìn ū. Tong-jiân lán siông-siông su-iàu ū tsìng-kù tsai lán ê só͘ kiû ū siū ìng-ún, tsiah beh siong-sìn. Tsóng-sī lán sī "in-uī guán teh kiâⁿ, sī tuì sìn" (Ṳ Ko-lîm-to 5:7) bô su-iàu tsìng-kù, kan-taⁿ su-iàu Siōng-tè ê uē-gú tsiū kàu-gia̍h. I bat kóng, lán siong-sìn, tāi-tsì tsiū án-ni beh tsiâⁿ. Sīm-tsì, tng khuân-kíng kap sū-tsîng teh huat-sing lóng tshin-tshiūⁿ kap Siōng-tè só͘ kóng ê, teh siong-huán, tsin-si̍t ê sìn-sim beh kian-kò͘ pīng tsi-tshî lán.
Si-jîn kóng, "Guá nā m̄-sìn tī ua̍h-lâng ê tuē tit-tio̍h khuàⁿ-kìⁿ Iâ-hô-hua ê un-huī, tsiū tik-khak tsua̍t-bāng." (Si-phian 27:13) Si-jîn pīng bô kìⁿ-tio̍h i ê kî-tó siū ìng-ún, tān-sī i kian-sìn it-tīng uē, i ê sìn kian-kò͘ i.
Ū it-tīng uē tit-tio̍h ê sìn-sim, uē pó-siú lán bô sit-táⁿ. Lán beh tshiò kóng, he sī bô khó-lîng ê sū, tī Âng-hái tiong beh khui tsi̍t tiâu lō͘. Tsóng-sī Siōng-tè ū án-ni tsuè lah. Tī lâng só͘ khuàⁿ tsuè bô khó-lîng ê khuân-kíng ē, tse sī giâm-keh sìn-sim ê khó-giām, sī īng lâi hō͘ sìn-sim ê tióng-tuā, kap ka-kiông.
Hām-lo̍h tī kan-lân tiong, kè liáu tn̂g-tn̂g ê o͘-àm-mî, kap tshau-huân ê ji̍t-sî, teh thìng-hāu Siōng-tè uē tāng-kang, beh tam-sim I kiám m̄ tshap á mah? Giâ khí lí ê thâu, khui-tshuì o-ló I, tsín-kiù tsiū hiòng lí lâi lah. --- tuì "O-ló ê sing-ua̍h"

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw