《台語荒漠甘泉（全羅版）》

 | | | 轉寄

"Liû-sim kuan-tshat thìng-hāu"

作者 陳清俊 翻譯 2008.04.06

listen

Sì ge̍h tshue-la̍k (Sì ge̍h la̍k ji̍t)

"Guá beh khiā tsiú-kiⁿ-lâu, khiā tī iâⁿ-tsē kuan-khuàⁿ, khuàⁿ I tuì guá kóng sím-mi̍h uē." (Hap-pa-kok 2:1)

Lán nā bô liû-sim kuan-khuàⁿ ǹg-bāng, kan-ta thìng-hāu Thiⁿ-pē ê pang-tsān, ū sím-mi̍h ì-gī? Bô ǹg-bāng, tsiū buē tit-tio̍h pang-tsān. Nā-sī lán bô tuì Pē Siōng-tè hia tit-tio̍h li̍k-liōng kap pó-iū, sī in-uī lán bô khì tshē-kiû. Tuì thiⁿ lâi ê pang-tsān sī suî-sî ū, lán nā bô khì tsù-ì, liû-sim, I uē khin-khin-á tuì lán ê sin-piⁿ liu khì. Lán sit-khì ki-huē, sī in-uī lán bô tī tsiú-kiⁿ-lâu hn̄g-hn̄g tsù-ì khuàⁿ i lâi ê hûn-jiah. Lán bô ki̍p-sî phah khui lán ê sim-mn̂g, lāi-sim bô khǹg ǹg-bāng. Bô kíng-síng siú-bāng ê lâng, sī tit buē tio̍h pang-tsān. Tī lí it-sing bô-lūn tuā-tuā suè-suè ê sū, lóng ài tsuan-sim siú-bāng Siōng-tè.
Sio̍k-gú kóng, “Tsù-ì thìng-hāu Siōng-tè un-tián ê lâng, íng-uán buē bô tit-tio̍h I un-tián ê ki-huē. Lán nā huán-bīn lâi kóng, “M̄-bat tsù-ì thìng-hāu Siōng-tè un-tián ê lâng, íng-uán kìⁿ buē tio̍h Siōng-tè ê un-tián. Lo̍h hō͘ ê sî, nā bô tsiong tsuí-tháng hē tī guā-bīn sîn hō͘, tsiū íng-uán khioh buē-tio̍h hō͘-tsuí.
Lán ài Siōng-tè si̍t-hiān I ê ìng-ún, pit-su ka-pē jīn-tsin tsù-ì, buē sái tshín-tshín tshái-tshái. Ká-sú ū tsi̍t ê lâng khì gûn-hâng, khì tsin-tsuē pái, the̍h tsi-phiò kàu thang-á-kháu, beh hō͘ gûn-hâng ê tshut-la̍p-uân, ka-kī koh siu tò-tńg-lâi, bô beh khì tuī-hiān hiān-kim, gûn-hâng jîn-uân khó-lîng uē tshiáⁿ I tshut-khì.
Lâng kàu gûn-hâng it-tīng ū sū beh pān, in the̍h tshut tsi-phiò tuì-uāⁿ hiān-kim, si̍t-si̍t tsāi-tsāi tsiong sū pān uân, tsiū lī-khui. In nā bô beh tsiong tsi-phiò the̍h hō͘ kuī-tâi jîn-uân, kan-ta teh thó-lūn tsi̍t ê tshiam-jī juā tsiâⁿ suí, tsi-phiò tíng-bīn ê tô͘-iūⁿ juā tsiâⁿ hó khuàⁿ, tse sī lōng-huì tshut-la̍p-uân ê sî-kan, gûn-hâng sī bô huan-gîng tsit tsióng lâng. In ing-kai sī tsiong tsi-phiò lâi uāⁿ hiān-kim, bô the̍h tio̍h tsîⁿ buē lī-khui, kín-kín pān-sū, pān uân tsiū kín-kín lī-khui, tsit tsióng lâng tsiah sī gûn-hâng só͘ huan-gîng ê.
Tsin put-hīng, tsin-tsuē lâng tī kî-tó ê thāi-tō͘ sī bô jīn-tsin, sim-tiong pīng bô kî-thāi Siōng-tè ê huê-tap, tsit tsióng ê kî-tó sī lōng-huì sî-kan. Lán ê Thiⁿ-pē sī ài lán tshiat-tshiat si̍t-si̍t jīn-tsin kap I kau-puê. --- Tsarles H. Spurgeon
“Lí ê ǹg-bāng iā buē-uē tuān-tsua̍t.” (Tsim-giân 23:18)
附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw