《台語荒漠甘泉（全羅版）》

 | | | 轉寄

"Thiⁿ-pē ê lō͘"

作者 陳清俊 翻譯 2008.03.30

listen
Saⁿ ge̍h saⁿ-tsa̍p (Saⁿ ge̍h saⁿ-tsa̍p ji̍t)

"Khuàⁿ ah, huān-nā lín tiám-hé, īng hé-pé uî ka-kī--ê, thang lâi kiâⁿ tī lín ê hé-iām lāi, kap lín só͘ tiám ê hé-pé tiong. Tse sī Guá ê tshiú só͘ tiāⁿ tio̍h ê; lín beh tó tī kan-khó͘ ê tiong-kan." (Í-sài-a 50:11)

"Tse sī kā kiâⁿ tī o͘-àm tiong, ka-kī teh tshē kng ê lâng kū-thé ê kìng-kò. In beh tshin-tshiūⁿ tiám to̍h ê hé, hé-tshiⁿ ǹg sì-bīn siā tshut-lâi. Tse sī sím-mi̍h ì-sù?
Ì-sù sī, lán kiâⁿ tī o͘-àm tiong, siū ín-iú bô khì sìn-khò Tsú, bô uá-khò I, khiok uá-khò ka-kī khì tshē tshut-lō͘. Lán bô hō͘ Thiⁿ-pē lâi pang-tsān, huán-tńg khò ka-kī ê li̍k-liōng. Lán tsiàu tsū-jiân ê hong-huat khì tshē kng, khì tshíng-kàu pîng-iú, hō͘ lán pún-sin tit kiat-lūn, siū gō͘-tō tshuā tī uai-lō͘, pīng bô tshē-kiû Siōng-tè ê tsiàⁿ-lō͘.
Lán só͘ khuàⁿ-tio̍h ê kng, tsin khó-lîng sī ka-kī só͘ tiám-to̍h ê hé-kng, iā khó-lîng sī kiâⁿ ǹg guî-hiám àm-tsio̍h ê ké ting-thah. Siōng-tè hō͘ tsiah-ê hu-ké ê hé-tshiⁿ lâi tsiò lō͘, kiat-kó sī pi-siong tshiⁿ-tshám ê.
Tshin-ài ê pîng-iú, tû-liáu tī Pē Siōng-tè só͘ tiāⁿ-tio̍h ê sî-kan kap tsiàu I ê hong-sik, tsua̍t-tuì m̄-thang siūⁿ beh khò ka-kī kiâⁿ tshut o͘-àm. Lí tú-tio̍h khùn-lân, hām-lo̍h tī o͘-àm tiong, sī ài lí tit-tio̍h tsi̍t kuá kín-kip su-iàu ê kà-sī á kong-khò. Kè-thâu tsá ê tsín-kiù khó-lîng uē hông-gāi tio̍h Siōng-tè ê un-tián tī lí sin-tsiūⁿ ê ūn-tsok. Uân-tsuân kau-thok Tsú, kam-sim tī o͘-àm tiong thìng-hāu, khak-si̍t tsai, ū I kap lán tông-tsāi.
Tshiáⁿ kì-tit, tī o͘-àm tiong kap Tsú tâng-kiâⁿ pí ka-kī tsi̍t lâng kiâⁿ tī kng tiong khah hó. – tuì "Suè-suè ê siaⁿ-im"
Bo̍h-tit jiáu-luān kan-sia̍p Siōng-tè ê kè-uē kap I ê tsí-ì. Lām-sám tāng, lóng sī uē phò-huāi I ê kang. Tsiong sî-tsing ê hun-tsiam, sî-tsiam kā kái-piàn, kā tńg-se̍h, pīng buē kái-piàn tio̍h khak-si̍t ê sî-kan. Khó-lîng lí uē ka-sok Siōng-tè ê ì-sù tī bó͘ tsi̍t hong-bīn huat-tián, tān-sī tn̂g-kî kú-tn̂g lâi khuàⁿ, lí sún-hāi I ê kang-tsok. Lí thang tsiong tsi̍t-luí ê hue-m̂ kā i thìⁿ-khui, án-ni tsuè, khiok sī huí-liáu tsi̍t luí hue. Tsiong it-tshè lóng kau-thok I, tsi̍t-tiám-á mā bô pit-iàu pó-liû. "Tsóng-sī m̄ sī tsiàu guá só͘ ài; sī tsiàu lí só͘ ài." (Má-khó 14:36) --- Stephen Merritt

I ê lō͘

Guá ài thîng, I khiok ài guá kè-sio̍k kiâⁿ,
Tī hân-líng ê tshiū-nâ kiaⁿ-hiâⁿ;
Guân-in sī siáⁿ?
Hut-jiân ū tuā tsio̍h-thâu lak lo̍h lâi ê siaⁿ,
Kòng tī thâu-tú-á só͘ khiā hia.

Guá ài beh kiâⁿ, I khiok ài guá tòng-tiāⁿ;
Ko͘-put-tsiong, "tsiàu Lí ê ì-sù tsiâⁿ."
Kè ji̍t thàu-tsá, In kiâⁿ
Tī guá só͘ beh kiâⁿ ê lō͘-tiâⁿ,
Tī hia ū tsi̍t bé tuā tsuâ sí tiāⁿ-tiāⁿ.

Guá bô beh koh mn̄g guân-in,
Sui-jiân guá khuàⁿ buē tio̍h tsîng-bīn.
Tè I ê tài-ín,
Guá sui gōng, I khiok tsin koh thang sìn,
Kà guá tshē suán an-tsuân ê lō͘-kìng. --- tuì "Tsú-ji̍t-o̍h ha̍k-pò"

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw