《台語荒漠甘泉（全羅版）》

 | | | 轉寄

"An-uì lâng ê lâng"

作者 陳清俊 翻譯 2006.12.10

listen




Tsa̍p-jī ge̍h tsa̍p ji̍t

"Guán hi̍k-sī siū huān-lān, sī beh tsuè lín siū an-uì kap tit kiù ê lō͘-īng; hi̍k-sī siū an-uì, sī beh tsuè siū an-uì ê lō͘-īng; tsit ê an-uì hō͘ lín uē thun-lún kan-khó͘, tsiàu guán só͘ tú-tio̍h ê tsi̍t-iūⁿ. Koh guán só͘ thuè lín ǹg-bāng ê sī kian-kò͘, in-uī tsai lín kì-jiân ū hūn tī tsiah ê kan-khó͘, tsiū ū hūn tī an-uì, iā sī án-ni." (Ṳ Ko-lîm-to 1:6-7)

Lí ê pîng-iú tiong sī-m̄-sī ū tsit khuán ê lâng, tng lí tú-tio̍h khùn-lân, siong-sim ê sî, uē tshē in kóng-uē, thiaⁿ in ê kiàn-gī. In só͘ kóng, só͘ thê lóng tsin sik-tòng, ná tshin-tshiūⁿ lí só͘ su-iàu ê tsi̍t-iūⁿ. Nā-sī ū, lí khó-lîng bô thé-huē tio̍h, in tsit tsióng uē i-tī siong-sim, tshit-khì ba̍k-sái ê tsâi-lîng sī bô iông-ī tit-lâi, ài hù tsin tuā ê tāi-kè. Lí nā tiâu-tsa tsi̍t ē in ê kè-khì, lí beh huat-kiàn in só͘ siū ê khó͘-lān pí jīm-hô lâng khah tsuē.

In khuàⁿ-kìⁿ sìⁿ-miā ê ting bān-bān hua khì, in khuàⁿ kè hí-lo̍k ê kim-uáⁿ tī in ê kha ē kòng-phuà, uáⁿ nih ê mi̍h phùn kàu tsi̍t sì-kuè. In king-li̍k kè tuā hong-lōng, pháiⁿ siu-sîng, tsiàⁿ tiong-tàu tuā o͘-àm, tān-sī tsiah ê lóng sī pit-iàu ê, pang-tsān in thang tsuè kái-thuat lâng thòng-khó͘ ê hō͘-sū, i-sing kap bo̍k-su.

Tsng-muá tang-hong phang-liāu ê siuⁿ-á, ūn-puaⁿ lâi sī tsin huì-khì, koh tsin bān. Tsóng-sī in tsi̍t ē kàu, khong-khì tiong tsiū ū bí-biāu ê phang-bī. Siâng-khuán khó͘-thàng tsin oh jím-siū, tsóng-sī tī lāi-bīn sī ún-tsông hùn-liān, tì-sik, kap bû-kiông ê ǹg-bāng. Kî-tiong muí tsi̍t hāng mi̍h, m̄-nā hō͘ lán li̍k-liōng, iā hō͘ lán sîng-si̍k, koh hō͘ lán ū tsâi-lîng pang-tsān pa̍t-lâng. Bo̍h-tit huân-ló, bo̍h-tit kā-gê tshiat-khí, tsí-iàu khut-kiông kian-kuat thìng-hāu khó͘-lān kè-khì. Uāⁿ-uē kóng, ài kuat-sim tsiàu Siōng-tè ê tsí-ì, uī tio̍h lí kap lí tsiu-uî ê lâng, tsīn-liōng tuì khó͘-lān tiong tit lī-ik.

Thiaⁿ-tio̍h tiⁿ-bi̍t ê kua-si,
Tshiong-muá tī tsá-khí-sî,
Kua-siaⁿ hô-tíng ê suí koh iù,
Ná un-jiû kî-tó ê khún-kiû.
Guá tshiau-tshē tshiùⁿ-kua ê guân-liāu,
Bí-biāu siaⁿ ê guân-tiāu,
Tshē-tio̍h tsi̍t tsiah siū-siong ê tsiáu,
Hō͘ bû-tsîng ê tshì-á tsha̍k tiâu-tiâu.

Guá khuàⁿ-kìⁿ tsi̍t ê iu-siong ê lîng,
I thòng-khó͘ ê si̍t kńg kiu tsīng-tsīng,
Huat-tshut hi-bāng, huaⁿ-hí kap khuài-lo̍k
Tsiok-hok tsit ê lâu ba̍k-sái ê suaⁿ-kok;
Guá tsai sìⁿ-miā ê kam-tiⁿ,
Sī tuì thòng-khó͘ kap siong-pi lâi siⁿ,
Siū táⁿ-kik ê lîng gîm-si,
I ê sim tsha̍k tī tshì-á nih.

Ū thiàⁿ lí ê tsi̍t ê jîn-sū,
Sī hit-ê siū-tìng tī si̍p-jī-kè ê Kiù-tsú,
Thih-ting tìng thàu kha-tshiú pe̍h,
Tshiuⁿ iā tsha̍k kè i hia̍p-ē,
Bô tsîng tsâm-jím piⁿ sut kè,
Kiù-tsú koh jím-siū lué-mē,
I uī lí ê kiù-sio̍k tìng si̍p-jī-kè,
I ê thâu-hia̍h tsha̍k tī tshì-á té.

Lí siū-khó͘ buē puâⁿ kè Tsú só͘ lim,
Lí kiám uē huat tshut tiⁿ-bi̍t ê siaⁿ-im?
I ê un-tián kàu-gia̍h lí īng,
Tng lí ê sim siū thòng-khó͘ só͘ tìng,
Lí guān-ì tsiok-hok I só͘ thiàⁿ ê sim-lîng,
Tuì lí siū siong kap thiah-tshuì ê jîn-sing.
Tshin-tshiūⁿ hit tsiah tshiùⁿ kua ê tsiáu,
I ê sim hō͘ tshì-á tsha̍k tiâu-tiâu?

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw