《台語荒漠甘泉（全羅版）》

 | | | 轉寄

Khó͘-lān tiong ū pîng-an

作者 陳清俊 翻譯 2006.12.03

listen


Tsa̍p-jī ge̍h saⁿ ji̍t

"Lí pîng-an mah? lí ê tiōng-hu pîng-an mah? gín-ná pîng-an mah? I kóng, Pîng-an." (Ṳ Lia̍t-ông-kì 4:26)

Guá ê lîng! Tio̍h kian-kiông khí-lâi!
Só͘ thiàⁿ ê lâng kiâⁿ-ji̍p tiùⁿ-uî lāi,
Lí ê Siōng-tè án-ni an-pâi.
Tio̍h kian-kiông khí-lâi!

Guá ê lîng! Tio̍h kian-kiông khiā-teh!
Sí-bông tsāi bōng. Thiaⁿ lí ê Siōng-tè,
Khuàⁿ ah, I beh tshuā lí an-jiân king-kè.
Tio̍h kian-kiông khiā-teh!

Guá ê thài-thài kap guá sing-ua̍h la̍k-tsa̍p-jī nî koh gō͘ ge̍h-ji̍t kú, hiān-tsāi guá káu-tsa̍p-jī hè, i sing lī-khui guá khì. Tng guá tī pâng-king kiâⁿ-lâi kiâⁿ-khì ê sî, guá ǹg íng-ua̍h ê Iâ-so͘ kóng, "Tsú Iâ-so͘, tsí tshun guá tsi̍t lâng, tān-sī guá bô ko͘-tuaⁿ, in-uī Lí kap guá tuà, koh sī guá ê pîng-iú. Tsú ah, tshiáⁿ an-uì guá, hō͘ guá li̍k-liōng, tsiong Lí jīm-uî guá su-iàu ê mi̍h sù hō͘ Lí khó-lîn ê lô͘-po̍k."

Lán ê sim bô buán-tsiok, tû-hui lán ta̍t-kàu tsit ê tē-pō͘, tsai Tsú Iâ-so͘ sī lán íng-uán, íng-ua̍h ê pîng-iú, I put-tuān tī ta̍k ê tsîng-hîng ē, suî-sî tsún-pī tsìng-bîng I pún-sin sī lán ê pîng-iú. --- George Mueller

Khó͘-lān buē siong-tio̍h lán, tng lán īng un-jiû lâi tuì-hù.

Tshiū-tíng ê ping-seh kā tshiū-ki teh kàu beh tn̄g-khì tsi̍t-iūⁿ. Siâng-khuán, guá khuàⁿ-kìⁿ tsin tsuē lâng teh tī khó͘-lān ê tiong-kan. Tsóng-sī guá iā siông-siông khuàⁿ-tio̍h lâng tī khó͘-lān tiong tshiùⁿ-kua, hit-sî guá uī in uī guá lâi kám-siā Siōng-tè. Bô ū sím-mi̍h kua-siaⁿ uē pí tī àm-mî tshiùⁿ khah hó thiaⁿ. Ū tsi̍t ê hū-jîn ê kò͘-sū, i ê to̍k-siⁿ ê kiáⁿ sí, i giâ-ba̍k ǹg-thiⁿ, ū thiⁿ-sài ê bīn hiòng i kóng, "Guá ê kiaⁿ ah, guá tsiong hí-lo̍k hō͘ lí." Tsit kù kán-tan ê uē, siông-siông tī guá ê sim kó͘-lē guá, an-uì guá. --- Henry Ward Beetser

Sí bô hō͘ guá ê lîng iu-siong, siong-hāi,
Sí buē íng-uán pun-lī só͘-tsāi,
Kiám m̄-tsai, muî-kuì hue puâⁿ-kè tshiûⁿ tī hit pîng khai,
Sí khak-si̍t sī ún-tsông, m̄-sī íng-uán keh-kài.
Lí tī Ki-tok ê līng-guā sè-kài,
Lí kap Ki-tok tông-tsāi, Ki-tok kap guá tông-tsāi;
Lán liân-ha̍p tsuè tsi̍t-thé tī Ki-tok lāi.

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw