《台語荒漠甘泉（全羅版）》

 | | | 轉寄

"Kiû Tsú ín-tshuā, tài-niá"

作者 陳清俊 翻譯 2008.07.06

listen



Tshit ge̍h tshue-la̍k (Tshit ge̍h la̍k ji̍t)

"Guán iā m̄-tsai tio̍h tsáiⁿ-iūⁿ kiâⁿ, guán ê ba̍k-tsiu tsuan-tsuan ǹg Lí." (Ṳ Li̍k-tāi-tsì-lio̍k 20:12)

Ū tsi̍t lâng kiò, O͘-sat, “tshun-tshiú hû Siōng-tè ê iok-kuī,” tsiū sit-khì sìⁿ-miā. I tshun-tshiú hû, uân-tsuân sī tsi̍t-phìⁿ hó-ì, “in-uī gû tio̍h-tak.” (Ṳ Sat-bó͘-jíⁿ 6:6) tsóng-sī in-uī i tshiok-huān tio̍h Siōng-tè ê sū-kang lâi tsuè tshò-gō͘ ê sū, Siōng-tè tsiū phah-sí i. (Ṳ Sat-bó͘-jíⁿ 6:7) Kè sìn-sim ê sing-ua̍h, siông-siông ài lán m̄-thang suî-piān tshap-tshiú.

Lán nā tsiong tsi̍t-kiāⁿ tāi-tsì kau-thok Tsú, tsiū bô tit koh kè-mn̄g, I ê tsiàu-kò͘ pí lán khah hó, iā bô su-iàu lán ê pang-tsān. “Tio̍h tsīng-tsīng tī Iâ-hô-hua ê bīn-tsîng, khuan-sim thìng-hāu I; M̄-thang in-uī hit-hō sū-sū hing-thong-ê, kap hit-hō pháiⁿ kè-bô͘ tit-tio̍h tsiâⁿ ê, lâi put-pîng.” (Si-phian 37:7)

Lán tī sing-ua̍h siōng ū ê sū khuàⁿ khí-lâi uân-tsuân m̄-tio̍h, tsóng-sī Siōng-tè tuì lán ê tsîng-hîng liáu-kái tsai-iáⁿ pí lán khah tshing-tshó. Lán tsí-iàu uân-tsuân sìn-jīm I, tsiàu I ka-kī ê hong-sik, I ê sî-kan tsuè kang, I beh tī siōng sik-tòng ê sî-khik uân-sîng. Lán bô hîng-tōng siông-siông pí hîng-tōng khah ha̍h Siōng-tè ê tsí-ì. Bô-thîng ê kang-tsok á tōng-tsok tsí-ū sī siong-hāi, in-uī Siōng-tè í-king tap-ìng I ê tsí-ì beh sîng-tsiū. --- A. B. Simpson

Guá bông-bông biáu-biáu buē-bîng, tuì Tsú kóng,
Tsú ah, kā guá tshòng hō͘ i hó koh bîng!
Tuì Lí, àm-sî ná ji̍t-tàu,
O͘-àm ná kng-bîng,
Guá kiaⁿ tú-tio̍h khùn-lân ho̍k-tsa̍p ê sū-tsîng,
Guá siang-tshiú iô buē thîng,
Kâu-kha kâu-tshiú lâi phuà-huí,
Lí ê tshiú íng bô tshò-gō͘ ê tsîng-hîng.

Guá giâu-gî put-tīng, tuì Tsú kóng,
Tsú ah, tshiáⁿ suat-bîng,
Tó-tsi̍t-tiâu lō͘ sī tsin-tsiàⁿ pîng-tsīng?
Tó-tsi̍t-tiâu lō͘ ū lī-ik ê tsîng-kíng?
Guá ê tì-huī khuàⁿ buē bîng,
Iā m̄-tsai án-tsuáⁿ tsìn hîng;
Tuì Lí sī tshing-tshó,
Tsú ah, hō͘ guá khuàⁿ uē tshing!

Tsiong jîn-sing ê kau-tîⁿ, khùn-jiáu ê sū kau-thok tī Tsú ê tshiú, iû I khì tshù-lí, sī juā-tsiâⁿ sóng-khuài, huaⁿ-hí ê sū.

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com