《《台灣青年》精選台譯》

 | | | 轉寄

"Tâi-oân Tshing-liân" Tē-saⁿ kòan tē-it hō huat-khan-sû / 《台灣青年》 第三卷第一號 發刊詞

作者 編輯部, 台譯：Lîm Tsùn-io̍k 2020.07.05

"Tâi-oân Tshing-liân" uaⁿ-uaⁿ kiò-siaⁿ tshut-sì kàu taⁿ í-king tsi̍t tsiu-nî à, tī tsia beh tùi Ji̍t-pún lāi-tē kah Tâi-oân jîn-sū tshim-tshim piáu-sī kám-siā, ū tāi-ke ê jia̍t-lia̍t tsi-tshî tsiah ē-tàng ji̍t-ji̍t sêng-tióng, huat-tián. Tsiàu tāi-ke só͘ siūⁿ ê, Tâi-oân tshing-liân ê sù-bēng sī tī tshòng-khan hit sî to̍h í-king suan-giân, tùi lāi tshiok-tsìn Tâi-oân bûn-hòa hiòng-siōng huat-ta̍t, jî-tshiáⁿ siau-tû Ji̍t-pún lāi-tē lâng kah Tâi-oân-lâng tsi kan ê tsiòng-gāi lâi tshiok-tsìn hō͘-siong hô-bo̍k; tùi gōa thê-tshéⁿ Ji̍t-Tiong iú-hó ê liān-tiâu sī lán Tâi-oân jîn-sū ê thian-tsit, lâi kòng-hiàn Ji̍t-Hoâ tshin-siān. Só͘-í, Ji̍t-pún lāi-tē lâng kah Tâi-oân lâng ê hô-bo̍k í-kip Ji̍t-Hoâ ê tshin-siān, si̍t-tsè-siōng to̍h sī Tang-iûⁿ éng-oán hô-pêng ê ki-tshó͘. "Tâi-oân Tshing-liân" ū kak-ngō͘ Tang-iûⁿ éng-oán hô-pêng ê ki-tshó͘ ê khí-tsō sī Tâi-oân tshing-liân ê sù-bēng, Tâi-oân tshing-liân ê tsik-jīm tiōng-tāi to̍h bô su-iàu koh ke kóng. Kòe-khì tsi̍t nî lâi, "Tâi-oân Tshing-liân" it-ti̍t teh ūi ka-kī ê sù-bēng lâi ok-tsiàn khó͘-tàu, só͘ tit-tio̍h ê kiat-kó khiok sī ì-gōa ê tsió, khòaⁿ khí-.lâi sī lán ū tsò bô kàu-gia̍h ê só͘-tsāi, m̄-koh, góan siūⁿ tsú-iàu ê gôan-in sī tsin khùn-lān phah-phòa si̍p-kòan sèng ê pîn-tōaⁿ. Tsèng-gī siōng bóe ê iu-sèng-tsiá, tsún-kóng Tâi-oân tshing-liân kòe-khì tsi̍t nî ê ló͘-le̍k sêng-kó tsin tsió, tso̍at-tùi bē tì-sú hō͘ lán Tâi-oân tshing-liân siū tshò-tsiat; tian-tò tio̍h kā tse tòng-tsò sī hing-hùn-tse, lâi tshì-kik lán kè-sio̍k ló͘-le̍k. Tâi-oân tshing-liân ê ló͘-le̍k bô-lūn án-tsóaⁿ, tī tsiong-lâi it-tēng ē oân-sêng sù-bēng, lán tio̍h án-ne khak-sìn.

Tâi-oân tshing-liân tsá to̍h kā ba̍k-sîn tâu hiòng Tang-iûⁿ ê tāi-kio̍k, ūi-tio̍h tsing-tshú tsèng-gī jîn-tō kah tsū-iû hô-pêng, it-ti̍t teh hùn-tàu, m̄-koh ū sî siū-tio̍h sè-kan tāi-tsiòng ê gō͘-kái, á-sī siā-hōe ê tsi̍t-tò͘, ūi-tio̍h án-ne hù-tshut tōa ê hi-sing, lán mā tio̍h ū án-ne ê kak-gō͘. Khòaⁿ ah, Κhóng-tsú tsiu-iû lia̍t kok, siūⁿ beh tī thiⁿ-ē thôan-pò jîn-tō, khiok put-hēng it-sing tú bē-tio̍h; tio̍h-kóng sī Ki-tok-tô͘ kó͘-tshue phok-ài ê tsing-sîn, m̄-koh tī bô kàu saⁿ nî ê sî-kan to̍h hông tèng si̍p-jī-kè, kám m̄-sī? Só͘-ū ê sian-kak-tsiá lóng ē siū-tio̍h tsi̍t-tò͘ lâi hi-sing, Tâi-oân tshing-liân kì-jiân ka-kī jīn-ûi sī sian-kak-tsiá, tong-jiân bô lē-gōa mā tio̍h hi-sing. Tâi-oân tshing-liân ê sèⁿ-miā tsāi tī tsèng-gī jîn-tō kah tsū-iû pêng-téng, oāⁿ kù ōe lâi kóng to̍h sī ūi-tio̍h sù-bēng lâi phah-piàⁿ. "Tâi-oân Tshing-liân" tī tsi̍t tsiu-nî ê seⁿ-ji̍t, khèng-tsiok kòe-khì tsi̍t nî pêng-an bô-sū, tông-sî thê-tshéⁿ lán tio̍h kak-gō͘ bī-lâi ing-kai koh khah ló͘-le̍k; sūn-sòa tiong-sim kî-tó ē-tàng tit-tio̍h Ji̍t-pún lāi-tē kah Tâi-oân jîn-sū koh khah thiàⁿ-sioh, hō͘ bî-jio̍k ê "Tâi-oân Tshing-liân" tsá-ji̍t oân-sêng sù-bēng.
《台灣青年》uaⁿ-uaⁿ叫聲出世到taⁿ已經一週年à，tī tsia beh對日本內地kah台灣人士深深表示感謝，有大家ê熱烈支持tsiah ē-tàng日日成長、發展。照大家所想ê，台灣青年ê使命是tī創刊hit時to̍h已經宣言：對內促進台灣文化向上發達，而且消除日本內地人kah台灣人之間ê障礙來促進互相和睦；對外提醒日中友好ê鏈條是咱台灣人士ê天職，來貢獻日華親善。所以，日本內地人kah台灣人ê和睦，以及日華ê親善，實際上to̍h是東洋永遠和平ê基礎。《台灣青年》有覺悟東洋永遠和平ê基礎ê起造是台灣青年ê使命，台灣青年ê責任重大to̍h無需要koh加講。過去一年來，《台灣青年》一直teh為ka-kī ê使命來惡戰苦鬥，所得tio̍h ê結果卻是意外ê少，看起來是咱有做無夠額ê所在，m̄-koh，阮想主要ê原因是真困難phah破習慣性ê貧惰。正義siōng尾ê優勝者，準講台灣青年過去一年ê努力成果真少，絕對bē致使hō͘ 咱台灣青年受挫折；顛倒tio̍h kā這當做是興奮劑，來刺激咱繼續努力。台灣青年ê努力無論án怎，tī將來一定ē完成使命，咱tio̍h án-ne確信。

台灣青年早to̍h kā目神投向東洋ê大局，為tio̍h爭取正義人道kah自由和平，一直teh奮鬥，m̄-koh有時受tio̍h世間大眾ê誤解，á是社會ê嫉妒，為tio̍h án-ne付出大ê犧牲，咱mā tio̍h有án-ne ê覺悟。看ah，孔子周遊列國，想beh tī天下傳報仁道，卻不幸一生tú bē-tio̍h；tio̍h講是基督徒鼓吹博愛ê精神，m̄-koh tī無到三年ê時間to̍h hông釘十字架，kám m̄是？所有ê先覺者lóng ē受tio̍h嫉妒來犧牲，台灣青年既然ka-kī認為是先覺者，當然無例外mā tio̍h犧牲。台灣青年ê性命在tī正義人道kah自由平等，換句話來講to̍h是為tio̍h使命來phah拚。《台灣青年》tī一周年ê生日，慶祝過去一年平安無事，同時提醒咱tio̍h覺悟未來應該koh khah努力；順續衷心祈禱ē-tàng得tio̍h日本內地kah台灣人士koh khah疼惜，hō͘ 微弱ê《台灣青年》早日完成使命。