《台文通訊精選》

 | | | 轉寄

咱做伙來拍拚

作者 游麗津 2006.09.17

Tī教育界服務將近三十冬lo͘h，攏m̄-bat tsiah實在、tsiah歡喜、tsiah感動teh接近咱ê母語。學習母語確實是一項真有意義、真有價值、mā真有福氣ê代誌。

會記得我ê gín-á細漢ê時，kap阿公、阿媽講話攏講bē通。阿媽講：「乖孫，你是teh 講啥物？」阿公講：「Taⁿ你ngī-mú-ngī-ngiáu，講規大堆，阿公thài攏聽無leh？」Hit當陣做新婦ê我，無感覺也無覺醒，掠準gín-á會曉講真láu ê「華語」是上光榮，是鼻頭真腫ê代誌。做新婦ê我實在真戇，bē曉利用這個好機會，kā gín-á教咱祖先ê智慧財產--「母語」，這陣想起來，實在真pháiⁿ勢，實在真見笑。

Tī教育界將近三十年，我一向是真認真、真拍拚ê好老師，而且一直擔任「華語」演講、朗讀比賽ê指導工作。我愛講捲舌ê「北京話」，hō͘人誤會我m̄是「蕃薯á」，我mā bē pháiⁿ勢。因為tī「華語文」ê指導工作上，我有真好ê成就，受著頂司、同事、家長ê肯定。這種真e̍h ê想法，一直到去清華大學語言所做鄭良偉教授ê學生了後，完全改變。厝內看十外年ê聯合報，改換民眾日報。三個gín-á開始kap我學「母語」。這個改變hō͘阮規家伙á大大細細攏會tàng做伙用真情來疼咱ê鄉土，來疼咱美麗悔ê台灣。這種滿腹ê溫暖，這種tuì內心發出來ê熱情，實在無法度形容，總講一句，我實在真歡喜。

每一擺beh去清華大學上鄭良偉教授ê課，坐tī車內，我kap學長--維彬、福當、淑芬四個人，攏會互相檢討、互相漏氣、互相求進步！真感謝in三個人，真幫忙我。我現在已經bē hō͘人誤會，講我是「外省婆」lo͘h！因為我確確實實是台灣ê suí姑娘á，講笑ê lah，請m̄-thang見怪！

咱ê責任m̄是kan-na家己會曉講「母語」，mā m̄ 是kan-na 家己會tàng 瞭解咱ê 鄉土文化、享受咱ê鄉土藝術就好。上重要ê 是：咱一定ài 做伙來拍拚，kap鄭良偉教授仝款，疼咱ê 鄉土，復健咱ê 母語，推廣咱ê 文化，hō͘ 咱ê kiáⁿ kiáⁿ孫孫bē去過著親像飄流tī海上ê孤帆，hit種可憐ê運命，hō͘咱會tàng真有尊嚴、真有勇氣，來建設咱美麗ê家園。台灣是咱ê，咱大家手牽手，心連心，做伙來拍拚。