《台文通訊精選》

 | | | 轉寄

幾tsân生活記事

作者 Sih-nah 2007.02.18

人定定日子若是無閒，tō會bē記得thang欣賞身軀邊ê人、事kap物。我mā是tio̍h-ài定定提醒家己ài kā腳步pàng hō͘慢。

以前讀研究所ê時，所tuà ê所在離學校駛車ài 十外分，行路ài四十外分。 我平時是攏坐學校ê shuttle去上課。三不五時á駛車，有時才行路。去學校ê路有幾nā條，若是行路ê時，我攏愛行小路。小路是平時shuttle bē經過，駛車ê時mā khah bē駛ê路。

Austin是一個真suí ê城市。有種真tsē樹á，若是按飛行機頂面看落來，不管寒人、熱人攏是青筍筍。當時á，行tī樹ńg腳，會hō͘人感覺是行tī樹林內。我若是行小路去學校ê時，tō會有感覺是行tī有tám-á-ka ê樹林內。每一叢樹á，攏有伊ê特色。有時，我會kap樹á講話。抑是o-ló in生著tshiⁿ suí。

有時行路ê時會無tiuⁿ-tî發現趣味ê人、事kap 物。有一擺，我tn̄g著一個八十外歲ê阿媽teh整理伊ê花園。我看阿媽teh搬重重ê花盤，tō自願beh kā鬥相工。阿媽講he是伊ta̍k日ê活動，kā我說謝了tō繼續搬伊ê花盤。我tiàm邊a koh khiā一時，欣賞阿媽緩緩á ê動作。Hit時，我hō͘阿媽ê堅持精神感動著。M̄知家己平時做代誌敢有tsiah-ni̍h有原則。Ná像是有當時á有，有當時無neh。

發現新ê世界mā是我行路ê時定定足享受ê代誌。有一擺，我看著一間細間ê 店，tō好奇入去kā se̍h-se̍h leh。結果是kám á店。想bē到，美國koh有這款ê kám á店。Hō͘我想著細漢ê時，阿妗所開ê kám á店。猶teh想ê時，有兩個gín-á入來買嘴食物。我無kap頭家講話，kan-taⁿ 恬恬se̍h伊ê kám á店。享受細漢ê感覺。離開hit間kám á店ê時，我心內想講，後擺我mā beh來買嘴食物。後來tō畢業，離開Austin進前攏無機會koh去hit間kám á店。

Koh有一擺，我看著一間teh 賣二手hippie物件ê店。我tō入去se̍h｡入去ê時，發現我是唯一無tsǹg鼻洞，抑是tī身軀刺字ê人。揀幾領衫，我mā隨人去試穿。後來有買一領teh打折ê洋裝。Hit工，我是穿運動衫kap褲。

離開Austin了，後來搬到北德州ê大學城 –Denton。頭先，我先tuà 學校ê宿舍，是tī校園內。行路去系裡上課，ta̍k工攏會經過一片樹林。樹林，一個活跳跳ê樹林，伊ê春、夏、秋、冬四季攏有無仝ê變化。春天ê樹林一片ê青翠，生命力ê再現，是讚賞美妙大自然ê好時機。夏天ê樹林一片蔭旺，日頭光照bē入，是情人談情說愛ê好所在。秋天ê樹林，一片火紅，是幻想美麗世界ê好地點。冬天ê樹林，滿地ê落葉，光閃閃ê樹枝，是思考人生方向ê好選擇。Tuà tī學校ê這一冬，有樹林ê陪伴，hō͘我日子過了真有意思。一年mā真緊tuè著樹林ê變化來結束。我除了完成一年ê課業以外，mā體會著存在ê幸福。

來Denton一年以後，我搬出來學校外口tuà。去學校上課就愛駛十五分鐘ê車程。行路去學校上課變成無可能ê代誌。M̄-kú，有時我若是想著，tō會駛無仝ê路線去學校。有一擺看著一間『Steve B.B.Q』，細細間á ，是用板á搭起來ê厝。看起來真古錐。有一工，我tō入去kā參觀一下。Tn̄g著頭家。Hit時無啥物人，頭家tō kap我開講。我問伊平常時是啥物ê人客來行踏。伊講大部份是醫生抑是律師來hia teh食晝。生理大部份是作hō͘ 熟-sāi ê人。伊ê 後生是醫生，查某kiáⁿ是數學老師。Koh kā我講伊khah早按怎去hō͘朋友倒錢ê代誌。伊講hō͘朋友出賣比hō͘敵人出賣khah簡單，因為若是敵人你會有防心，朋友khah bē有防心。除了kap頭家開講以外，我有注意這間店ê職員是白人。有可能是因為我有偏見，我看著頭家是黑人，員工是白人感覺bē-bái。Beh離開這間店進前，頭家有請我食有伊特殊配方ê B.B.Q，有影好食tō tio̍h。