《台文通訊精選》

 | | | 轉寄

避雨ê瞬間

作者 廖碧玉 2007.02.25

Tī今年八月初，有一暝黃昏時，也就是中國ê頭一隻船登陸加拿大溫哥華，約略一禮拜ê時，我kap先生tī暗頓食飽了後，出去附近行行。無拍算，行到一半ê時，突然間，狂風暴雨，阮無gia̍h雨傘，就bih tī一位賣車ê亭á腳。雨漸漸變細，m̄-koh，猶koh會hō͘衫褲a̍k tâm ê程度，我就決定繼續等; tī等ê中間，有一個查某人，遠遠行uá來，目睭對阮金金看，伊一手kuāⁿ一個袋á,另外一手suah雄雄對我kí來，用真怨恨ê聲音講：「恁tsia ê bē見笑ê中國人，恁是teh想啥物？阮加拿大人飼恁，猶無夠額嗎？恁可憐，阮加拿大人猶koh khah可憐，恁來，攏免做代誌，就有好車thang駛，大間厝thang tuà;阮neh？Ta̍k工拚暝拚日，猶koh食bē飽，你想，敢有公平？阮納hiah tsē ê稅金，就是攏teh飼恁tsia ê難民lah，恁敢有資格去教堂kā上帝懺悔嗎？」 講到tsia，伊無koh繼續行，停tī阮面頭前，罵kah嘴角全波。我tu-tú想beh辯解，講：「阮m̄是中國人，阮ê祖先是古早tī中國thài散赤，才tuì中國移民去ê台灣人」，先生kā我sái一個目色叫我m̄免kap伊辯。因為，注意一看，看著伊穿ê兩腳襪á無仝色，頭毛koh結規球，手所the̍h ê袋á有酒矸，近uá ê時，koh有酒味，若kap伊加講話，恐驚會bē tàng收suah。伊看阮攏無反應，就慢慢ná退去，ná罵「連一句英語也bē曉，真正枉費。無彩，阮加拿大開傢伙出hiah tsē錢來訓練恁，實在有夠ló͘。」伊ê英語有真重ê東歐ê口音，m̄-koh字句真順，速度真緊，好親像英語就是伊ê母語一樣。

這位食酒醉ê查某人，雖然講話thian-thian tho̍h-tho̍h,偏見真深，m̄-koh也有淡薄道理。確實，過去這十年來ê中國人，hō͘人ê印象就是m̄免拍拚就食好、穿好、tuà好。Ná是親像tse一批一批來ê船民，按呢拚死拚活也beh來北美洲求生存ê例，伊大概m̄-bat看過;tsia ê人付三萬至五萬美金ê費用，千里迢迢，冒險坐hiah-nih破爛ê船，白人形容是“Unseaworth”，就是非常無安全，無適合kiâⁿ船ê意思;tī船頂食ê,是無營養，無變化ê糜飯; 幾百人kheh-kheh tī非常là-sap ê船艙; tī航海將近兩個月了後，將in tàn tī離Queen Tsarlette島上近ê海中，然後，hō͘伊泅水登陸hit個無人ê岩島，雖然是八月ê熱天，Á-koh hit所在茫霧真大，氣溫也低。最後，加拿大出動軍隊來救援，發落。

為著這幾台陸續開來ê漁船，運送tsiah-nih tsē中國人來登陸ê事件，已經引起加拿大全國ê關心，辯論，人民對加拿大移民法種種ê議題，法律kap議會ê程序重新檢討。Tsia ê，我bē曉也無絕對ê答案。總是，心肝底，難免有一個小小ê疑問，一直teh kā我攪擾，照咱古早所讀ê冊，中國地大物博，歷史文化悠久，傳統優秀，二十一世紀是中國人ê世紀，台灣生理人也紛紛去投資、發展; 是按怎，tsia ê年輕有為ê青年人，甘願冒hiah-nih大ê風湧，開hiah-nih tsē ê錢，tio̍h koh 忍受拘留，公聽審判ê侮辱，甚至作廉價勞工了後，koh脫離bē開蛇頭ê控制;千辛萬苦beh來這個語言、文化、習慣、完全無仝ê國家neh？