《台文通訊精選》

 | | | 轉寄

巢 (Siū)

作者 阿雅 2007.04.15

Tsīng我ê阿爸第三次中風了後，m̄知是病情ê關係，抑是心情鬱卒，變kah無愛講話。大部份攏是用搖頭kap tìm頭來表示beh kap m̄，久久á才會出聲講一句話。也因為一擺koh一擺ê中風，致到「失禁」，行動koh khah無方便。我teh想，m̄知是m̄是按呢hō͘阿爸心情無好，才無愛講話leh？請教醫生也無有真正確ê答案。

有時我tiām-tiām看著伊teh食飯，食kah真好勢，實在看bē出伊是一個「失禁」koh m̄講話ê病人，我深深感受著人ê有限。過去愛講話，對人親切，好脾氣ê阿爸，變成今á日ê狀況，hō͘我感覺真心酸。（兄弟中間有人認為阿爸已經無意識ah）

有一日，我khà電話轉去ê時，大兄kā我講，已經kā阿爸送去安養院ah。當時我聽著，心艱苦流目屎，卻m̄敢hō͘阿兄知。因為我身處外地，tī經濟上也無法度鬥saⁿ-kāng，所以也無發言ê餘地，實在是真m̄甘阿爸就按呢hông送去安養院，一方面koh ài感謝大兄、大嫂in辛苦ê付出kap照顧。

每一擺若tī食飯ê時，就想著阿爸家己tiām-tiām teh食飯ê情景，我就流目屎，我知影阿爸絕對無愛hō͘人送去安養院。心內只有祈禱上帝hō͘阿爸會tàng表達伊ê意思。時間經過一個月，阿爸tī安養院發生感冒bē食ê情形，二工ê時間就送去病院檢查，醫生講已經有營養不良ê情形。Tī病院療養一段時間，有一工，大嫂問阿爸，明á tsài beh出院ah，koh tshuā你去山頂好無？（安養院tī陽明山頂）阿爸就開始搖頭koh流目屎，大嫂問講：「你ná m̄去leh？」阿爸就出聲講：「我無巢（siū ）！」雖bóng是短短ê三字，卻表達對家己ê「巢」pa̍k bē開ê感情。感謝上帝，阿爸m̄是無意識，伊猶原真清楚，伊只是無愛講話。佳哉伊有tī這個要緊ê時刻表達出來，若無，就koh hō͘人送去「山頂 」ah。

不管tī北美抑是今á日ê台灣社會，攏有kā老人送去安養院ê趨勢。若是對一個已經無意識或是癡呆、昏迷ê老人來講，he對in就無啥物心理上ê影響。但是，對一個猶有意識ê老人，實在對in ê病情無好ê幫助。

「巢」對一隻動物來講，伊代表著安全kap親情ê所在，免講是萬物之靈ê人類，對感情ê倚靠是khah嬴過其他ê。Tī人生ê上尾段ê時間，kā伊khǹg tī一個完全生份 ê所在，無親人tī邊a，所看著ê攏是病人，一點á活氣to無，按呢敢bē鬱卒，甚至失去求生ê意志leh！若是我，我m̄甘hō͘我ê親人tī人生ê路尾站，來活tī這種ê情境。

續後，我ê計畫是家己ài儉一kuá錢，交待序細，後擺我若食老猶有意識（雖然行動不便），ài 請一個人陪我，m̄-thang kā我送去安養院，至少是tī家己ê「巢」，死了mā khah自在。

可能是我ê想法khah古板，請大家m̄-thang見怪。