《台文通訊精選》

 | | | 轉寄

啊若無欲按那？

作者 陳柏壽 2007.04.22

~ Ala Muana ê世界~

來去Hawaii，人人攏知有一個最有名ê Shopping Center叫作Ala Muana，咱台灣人嫌pháiⁿ記，攏kā伊唸作「啊若無欲按那！」

我調來Hawaii作人ê牧師已經有年半lah。Tú來ê時，看著四界人攏kā咱請安：「Aloha!」 「Aloha!」；清涼ê海風，椰子葉á tī風裡搖來搖去，親像少女hula舞ê姿態；四季如春，無寒無熱，早起起床mā m̄免驚去寒著，暗時上床mā m̄免煩惱蓋被，一領aloha shirt會使年頭穿到年尾，出門一雙千拖á穿leh，五隻腳指頭á攏露顯顯，穿短褲來作禮拜ê人mā真tsē，掛油食粿(領帶)來教會ê人差不多是無 。寒著ê人才穿長袖(ńg)ê衫。Tī tsia無地動，風颱mā真少tī 這粒芋á島(Uahu)上陸。

我這粒番薯á tuà入來芋á，tuà久真驚會變作芋á番薯。總講一句，咱台灣gín-á移民來這粒芋á ê歷史不過是三十外冬，人口總共差不多六千，包括無身分偷走船ê人在內。大部分攏tuà tī這粒芋á頂。中國人ê新移民日日增加，緊十慢會超過台灣人ê人口。日本人移民大部份是一百三十外冬前明治時代就開始，大部份攏是對沖繩(Okinawa)來ê。日裔人口占全州總人口ê 40%以上。有人講東京都有23區，Hawaii是屬東京都第24區，因為日本人真愛來tsia thit-thô。日本ê青年男女beh結婚，無論啥物教，攏會來Hawaii ê基督教會十字架下面，問in有信耶穌無，攏會講「有！」。In踏出教會後猶會記得這句話iah bē，咱m̄知。

日本文化影響Hawaii真大，tsia ê厝攏是日本式ê khah tsē，地方ê語言mā摻真tsē日語。中國移民雖然有二百外冬ê歷史，但是今á日Hawaii ê政治、文化、教育、大眾傳播、企業經營各方面，日本人攏khah占優先。Tuà tī tsia ê白人khah會認同本地文化，in ê人口也無超過總人口ê半數，所以種族對立ê情形比美國東部khah少。中國來ê移民大部份有中國人ê主觀性：「夏威夷」也是in原來輕視在地人ê字眼；in叫Honolulu作「檀香山」，全世界ê人無人知in是teh講啥物所在。In對台灣人ê獨立運動也無啥物同情。多年以來，國民黨tī tsia ê勢頭真大，用中華航空公司thàn ê私奇錢，tī市中心買一大區叫作「中華文化中心」。但是in tī tsia做代誌，差不多是tī牛椆內相tak ê步數真gâu;若是對外口人或是外國人，是無半步。

台灣有錢人來tsia退休ê人bē少，最近因為台灣地動，koh台灣ê生態環境不良，tuì台灣移民來tsia ê人數有增加ê傾向。台灣人社會中，高等ê資產階級人數無tsē，退休養老ê人以外就是醫生人。Tī tsia有差不多二、三十位台灣醫生，其中有三、四位基督徒醫生tī台灣教會內真熱心；其他醫生若m̄是屬慈濟就是kap教會無關係。中產階級ê部分是教授、工程師、農場主人(以青菜菜農為主，供應全島需要)、小貿易商等。人數mā無tsē｡絕大部分生活tī tsia ê台灣人差不多攏屬tī勞動階級、小工階級、ABC Store(雜貨店)店員、旅社服務生、計程車司機，以及領社會救濟金生活ê人。 這種完全資本主義化、消費主義化、觀光主義化ê世界，真正是一個「啊若無欲按那！」ê世界。資本家主宰一切，所有最高大樓差不多攏是觀光旅館。Tī tsia無啥物工業，無大ê商業，無高科技，甚至連農業也無法度生存。有限ê農地只有生產資本家指定ê經濟作物，供應美國大陸；地方需要ê民生作物，完全無teh照顧 。Hawaii ê天氣是出產根蕉及檨（suāiⁿ）á上好ê所在，但是去市á買著ê真 tsē是南美產ê根蕉kap檨á。In ê經濟結構我想一定有問題。Tsia ê生活費用kap美國任何都市比起來，最少貴三分之一以上。Tsia ê土地kap不動產可能是美國第一貴ê所在。對人口就業ê分析來看，咱就知絕大部分ê人是生活tī散鄉邊緣，(全國平均國民所得是屬最低ê一州之一)。人人攏只好用笑面，用Aloha，用最低ê工資，來維持最有限ê生活。人人無其他ê選擇，也無發展ê空間。真正是「啊若無欲按那！」

「牧師啊！我早起去Sandwits工場切菜，八點切到下晡二點，khiā六點鐘，一點鐘thàn 5kho͘ 75sián (US$5.75/hoor)；下晡二點半到暗時十點去顧店賣gín-á衫，bē使坐，koh khiā 七點鐘，一點鐘六kho͘ ，扣稅金剩5.50。一日khiā 十三點鐘，我giōng giōng beh暈去lah！為著顧家飼kiáⁿ....。」我聽著阿雪姊ê艱難，心內真艱苦。

你若去到Ala Muana，全世界第一流ê名牌，所有貴森森ê高級品攏tī tsia，你若有錢，全世界啥物好孔ê攏tī tsia！海風溫溫á吹，親像少女teh跳Hula !

你若有一日真正beh來這個「啊若無欲按那」ê所在，請你tio̍h一定tshuē來這間島上唯一ê台灣基督長老教會heh！咱thang作伙來唱hit條「啊若無欲按那？！」