《宋澤萊新著《天路拾穗》台譯版》

 | | | 轉寄

第一部：稱義得救_1.我為啥物beh洗禮？_2.有phongphài ê聖靈降落來

作者 宋澤萊 2025.12.07

第一部：稱義得救

2）有phongphài ê聖靈降落來

頂面所講tsiahê道理，lóng是了後我tsiah慢慢á 了解ê；hit當時，我啥物mā m̄知。Ē記得大約一禮拜了後，koh tī學校看《聖經》。Tsit pái看〈創世紀〉，也to̍h是聖經ê siōng頭前幾話句，《聖經》是ánne講：「太初，上主創造宇宙，大地混擾，無秩序。怒濤澎湃ê海洋被烏暗罩tiâu leh。上主ê靈運行tī水面。」當我看tio̍h「上主ê靈運行tī水面」tsit句話ê時，非常歡喜。忽然，我意識tio̍h[天靈蓋]kahná phah m̄見去，頭殼頂空空去à，有一个真大ê力量降落來，變成一个看bētio̍h ê大「實體」khiā tī我ê後面，kahná只要手一伸到背後，to̍h ētànḡ摸tio̍h祂；m̄koh真正去摸ê時，koh摸bē tio̍h。祂真koân大，充滿熱力，正氣凜凜。當時，我ê身軀有病，精神一向無好，m̄koh被tsitê實體挨身óa近，suah感覺行路有風，講話真有魄力，只是我m̄知tsitê「實體」是啥物。我真好奇，想beh kā tsitê狀況tshòng hō͘ 它清楚，就ánne tsiūⁿ門拜訪向「地方聚會所」ê教友、「真耶穌教會」ê傳道、「靈糧堂」ê牧師請教tsitê狀況，雖然我真認真講這是「閱讀聖經」ê結果，m̄koh大概in有in ê khiànsńg kah規定，總是烏龍se̍h桌，m̄敢正面回答這是啥物。我講：「你看，祂非常koân大，火熱有力，正氣凜凜，已經tī我ê背後khiā真久à，看起來iáu beh繼續落去，差不多tī我ê身軀後半个手股遠ê所在，lín ê教會ê人kám mā有tsitê經驗？」M̄koh，in iáu是講一kóa無關係ê話。Siōng尾，我猶原失望tńg去厝裡。To̍h tī第三工ê時，我意識tio̍h bētàng ánne hō͘祂爲我勞苦，同時，因為祂khiā tī後面，hō͘我ê生活m̄敢隨便，驚kā祂卸面子，我to̍h祈禱講：「我已經知影祢是啥人，祢to̍h是聖靈！爲tio̍h beh hō͘我了解祢ê存在，祢就ánne對我顯現三工，我tio̍h感謝祢。可惜我iáu beh生活落去，日常生活有真tsē無方便，所以我beh請祢離開，我想祢一定了解我ê意思。」Ánne講完，祂果然消失tī我ê身軀後，koh khah án怎都hō͘我近距離感覺bē tio̍h à。

Tsitê經驗teh說明啥物leh？To̍h是teh kā咱講，當你相信「耶穌死去koh活」了後，聖靈to̍h ē降落來ê tsitê事實。〈使徒行傳〉明明白白有記載：當眾使徒注目teh望天頂，目送耶穌tsiūⁿ天̄了後，到「五旬節hit工，in to̍h聚集tī一个所在。忽然有聲音tùi天頂落來，kahná一陣大風颳掃過ê聲音，充滿in teh坐ê kui个厝宅。In koh看見形狀親像火焰ê嘴舌，散開，停落tī每一个人ê身軀頂。In lóng hō͘聖靈充滿，按照聖靈所賜ê才能講起別種ê語言來」。這to̍h是承認「耶穌死去koh活」kah「聖靈降臨」之間ê一定秩序。最近，tsitê例koh發生一pái：有一pái早起，《台灣e文藝》ê主編胡長松先生來到我ê厝，伊tùi清大資訊研究所畢業，tsitmá服務tī泛亞電訊，伊mā是目前台灣siōng優秀ê小說家之一。當伊提起基督教，我to̍h kā伊講：「基督教ê奧義全部lóng濃縮tī『耶穌死去koh活』頂面，它是phah開天堂ê一支鎖匙。你kám ē相信耶穌死去koh活？」伊回答講：「我早to̍h想過à，我ētàng相信。」當時，並無隨時發生啥物奇怪ê tāitsì，m̄koh等伊tńg去了後，到暗時，伊發見kui个人lóng變à，伊tī電話中kā我講：「我發見tsitmá ê我kah tsìn前ê我完全無仝款loh，非常討厭tsìn前ê kakī。」咱知影，這to̍h是聖靈開始tī伊ê身軀頂teh動工，hō͘伊開始有悔改更新ê現象，伊ê舊人已經慢慢teh改變，轉變成做有信仰ê人。我to̍h教伊開始做「聖靈ê祈禱」，mā to̍h是tī嘴中連續一直稱頌「哈里路亞，oló主耶穌」tsit句話。結果，聖靈koh khah phongphài降落來，伊隨時講出方言；了後，ta̍k pái lóng ētàng使用方言祈禱一、兩點鐘久。你看，這to̍h是所謂ê「靈洗」ê降臨，tī幾工內，伊m̄nā經歷tio̍h「信仰」ê實際，而且經歷tio̍h一種「火焰嘴舌」ê洗禮，遠遠超出一般ê浸禮。世界上真罕得有tsiahni̍h豐富ê免費中晝頓，耶穌一屑á都無保留，做一下kā tsiahni̍h tsē ê恩惠白白賜hō͘信祂死去koh活ê人。後來我問伊，爲啥物伊ētàng相信耶穌死去koh活，伊講：「我是運用宇宙ê爆炸ê理論來kā它理解。」這to̍h是teh說明，任何人相信耶穌死去koh活ê原因是無仝款，你thang查考《聖經》，mā thang憑你ê智慧去思考一回，直到想通了後，to̍h成做一个基督徒，真正簡單。哈里路亞，咱應該oló主耶穌，這一切ê奇蹟榮光lóng歸tī祂。