《宋澤萊新著《天路拾穗》台譯版》

 | | | 轉寄

第一部：稱義得救_1.我為啥物beh洗禮？_3. Hō͘ 耶穌醫好

作者 宋澤萊 2025.12.14



第一部 稱義得救

主題1：我為啥物beh洗禮？_3

3. Hō͘ 耶穌醫好

Tútú我講過：當時，我ê身軀有病。到底是啥物病leh？To̍h是嚴重ê胃酸siuⁿ過tsē，有時ē溢到嚨喉頭ê病症。原因是當時校務無閒，一無閒起來，往往無時間食飯，á是竟然bē記得食飯，時常空腹肚teh上課。Kā細漢gín'á上課50分鐘了後，to̍h發見胃酸溢起來，kui个嚨喉lóng燒koh痛起來。後來竟然tùi心藏ê部位痛起，一直痛到尻脊心，kahná hō͘一支利刀tu̍h thàng過，痛kah kui个心情lóng縮起來；痛ê時間lóng真長，夜間一旦發作，tiāⁿtiāⁿ是kui暝teh痛。因為tú開始bē了解這是啥物病，總是kùtsāi它痛。有真tsē朋友知影我tiāⁿtiāⁿ有劇烈ê痛，根據痛ê點警告講，我可能已經患tio̍h心臟病。有一pái，ē記得是熱天ê中晝時，我tī二樓冊房看冊，痛koh開始à，猶原是tùi心臟痛到尻脊心，致使呼吸mā變kah困難起來，kui个人lóng tio̍h kiu做一丸。我giú開椅á，坐tī涼涼ê地板，了後sihsih颤hō͘ kakī倒落來，想beh hō͘痛減輕，siōng尾kahná是睏去à。Tī霧霧無明ê意識中，我感覺kui个身軀被托koân tī地板ê頂面，了後是一支手掌tī尻脊心刮tio̍h，kā尻脊phiaⁿ kui个刮空，to̍h親像咱用湯瓢á kā一个瓜á ê肉刮清氣，kantaⁿ留瓜á皮。時間應該m̄是真長，kantaⁿ ē記得我忽然清醒，大叫：「耶穌！」（因為我直覺知影he是耶穌ê手），我tùi地板一下á起身，發見痛已經停止，kah無痛ê時仝款；我感覺真驚惶憢疑，心內一直teh問：「Án怎ē ánne？」我一時之間iáu m̄知kakī已經kah《四福音書》裡ê患者仝款，經歷一場耶穌ê醫病。後來我想，tī大痛ê時並無祈禱耶穌來醫病，爲啥物ē有tsitê結果，慢慢á tsiah想tio̍h，我對bat看見耶穌ê hit件事無bē記得，而且時時刻刻lóng ē出現tī我ê腦海；iáu有hit時聖靈tī日常生活中猶原真強烈teh運行tī我ê身邊，雖bóng我祈禱聖靈離開我，m̄koh祂並無離開我gōa遠！

我ê病kám已經完全好勢？其實無。後來它koh發作，有幾nā pái猶原真嚴重，hō͘我真痛苦。我to̍h想：是m̄是我應該祈禱求耶穌來醫病leh？Tsitê想法hō͘我否定，主要原因在tī我iáu m̄知這是啥物病，生活習慣mā無改變，像講我iáu連續食腎結石ê藥á，生活siuⁿ過無閒，心情鬱悶……種種因素lóng ē hō͘病koh夯；若是耶穌koh一pái來醫病，下一pái iáu ē復發，永遠bē停。因為ánne，我祈禱耶穌講我beh查明這是啥物病，而且我beh開始tshōe藥á，求耶穌來幫忙。果然幾工以後，我tī一份報紙頂面ê健康欄裡tshōe tio̍h tsitê症頭ê敘述，原來只是胃酸siuⁿ過tsē ê症頭，我就ánne to̍h去買「胃乳」，只要痛起來一食，to̍h bē痛à。

Tsit項tāitsì是teh說明啥物？它kā咱講，當上主想beh救助你ê時，tio̍h算你無祈禱，祂mā ē救你，tio̍h算你pháiⁿ勢勞煩祂，求祂離開，祂iáu是ē來照顧你，tiāmtiām tī身邊teh保守你，並無離開你siuⁿ遠。同時，我mā tio̍h提醒一kóa kantaⁿóa靠神跡醫病，卻無phah拚查明病因teh tshōe醫藥ê人，千萬m̄thang掠準上主醫你一pái to̍h ētàng完全好勢，因為你ê生活無改變，你ê病復發是難免，這m̄thang怪上主，kantaⁿ ētàng怪你kakī。若是你一再求上主來治療你，to̍h變成妄求，上主並m̄是你ê奴僕，祂無每pái lóng爲你醫病ê義務。你siōng好祈禱祂hō͘你tshōe tio̍h藥，kā病醫好，同時tio̍h赦免所有ê仇敵，甚至送禮物hō͘ bat hō͘你恨過ê人，hō͘生活kah心情變成開朗，tsit種tsiah符合「天助自助」ê道理，病mā tsiah ētàng一pê食到冬尾。假使m̄ phah拚，上主mā無辦法。我iáu有hō͘上主醫病ê例以及祈禱tshōe藥ê事例，tī tsia無beh講。