《宋澤萊新著《天路拾穗》TOJ/台灣字版》

 | | | 轉寄

Tē it pō͘ Tshinggī titkiù Tsútê 5：Ēng "Sùtô͘ Sìnking" kiànli̍p lāu pō͘tiāⁿ ê sìngióng kinki

作者 Sòng Te̍klâi 2026.02.01

Tē it pō͘ Tshinggī titkiù
Tsútê 5： Ēng "Sùtô͘ Sìnking" kiànli̍p lāu pō͘tiāⁿ ê sìngióng kinki

Lán óngóng hông mn̄g to̍h "ántsóaⁿ sìn?" ánne ê būntê, ūsî lán to̍h hông mn̄g kah bē hiáu hôetap, tsi̍t sîkan kèngjiân m̄tsai tio̍h ántsóaⁿ hôetap.

Tsin tsē ūmiâ ê thoântō lâng tōatosò͘ tùi "sìn" tsit hāng tāitsì lóng tsháṳōng būbū bô bêng ê thāitō͘, bē giàn bêngkhak piáusī. Inūi sìntô͘ ū khólêng sī inūi hò͘ⁿkî sim ê tshuipik tsiah lâi sìn Kitokkàu; á sī inūi siū tio̍h hutjiânkan ê lêngkng siámsih lâi sìn Kitokkàu; á sī tshinba̍k khòaⁿ tio̍h pa̍tlâng ê sînjiah lâi sìn Kitokkàu; á sī inūi kakī ê pēⁿtsèng hutjiân hō͘ Iésu i hó lâi sìn Kitokkàu …… téngténg, tsóng kóng tsi̍t kù to̍h sī gō͘hue-tsa̍psik. Tī tsitê tsōnghóng hā, nāsī hō͘ tsho͘sìn tsiá tsi̍tê ngēsèng kuitēng, ánne to̍h kiámtshái ē kā hit ūi sìntô͘ heⁿh kiaⁿ tio̍h, suah bô ta̍t tio̍h lâu tiâu sìntô͘ ê bo̍ktik à.

Tsiū ánne ū lâng to̍h kóng, "Sìn to̍h sī sìn SiōngTsú." Á sī kóng, "Sìn to̍h sī sìn ‘sèngking’ " liáuāu to̍h kóng kah tsin kónghoàn, huisiông būbū bô bêng. Tsóng kóng tsi̍t kù, kahná sī "sèngking" lāibīn kìlo̍k ê óngsū á sī sinlūn ê bûnjī lóng sio̍k tī "sìn" ê hoānûi. Tsiū ánne, tsi̍tsut'á to bôpiⁿ bô kîⁿ, tsiū ánne hō͘ sìngióng ê lâng oântsoân thuatsòaⁿ khì à. Kîsi̍t, "sèngking" lāibīn ê bûnjī ū tsi̍t tōapō͘hūn sī sio̍k tī "bāng" ê hoānûi; ū tsi̍t tōapō͘hūn sī sio̍k tī "ài/thiàⁿ" ê hoānûi, bô ittēng to sio̍k tī "sìn" tsit hāng tāitsì. Bó͘ tsi̍tkóa iáu bô ittēng sī sio̍k tī "Sìn Bōng Ài" tsit saⁿê hoānûi, tsísī ōesian jîí; sīmtsì ū kóa sī Mô͘kúi ê o͘pe̍hkóng, nāsī bô piān sīhui, lóngtsóng lóng sìn, he to̍h tshám loh. M̄koh, tsi̍tê hūtsik ê thoântōtsiá bô ingkai sìkè ēng phô͘tháⁿ sìntô͘ tsò khóliōng; inūi tsi̍t tsióng bô kàu kiantēng tiāⁿtauh ê sìngióng, tī tétsiām kîkan kiámtshái tùi Kitoktô énghióng bô tōa; m̄koh tn̂g sîkan íāu, kiámtshái ē tìsú i tī lêngmiā siōng bô huattō͘ kingsin, kiámtshái sìn liáu tsa̍p nî, jītsa̍p nî, iûgoân kah tsho͘sìntsiá kângkhoán, tsi̍tsut'á to bô sêngtióng.

"Sìn" tsit hāng tāitsì tsiongkîbóe lóng sī teh kóng sī ētàng ōetēng tsi̍tê hoānûi, sīmtsì tsòtsiâⁿ tsi̍t phiⁿ bûntsiuⁿ, inūi ánne Calvin tsiah te̍kpia̍t kā sìnsim tshingtsò tìsik. Phìjū kóng "thiàⁿ" tsit hāng tāitsì píkàu khah sio̍k tī lûnlí si̍ttsiān ê hoānûi sī kângkhoán.

Goânlâi lán ê sìn sī ū ittēng lōeiông, m̄ sī tsi̍tsut'á to bô títsí ê sìn; mā m̄ sī lán siūⁿ beh sìn siáⁿmi̍h to̍h khì sìn, m̄ sìn siáⁿmi̍h to̍h m̄ sìn.

"Sìn" náisī tsí ài lán ittsài tsimtsiok, ittsài jīntông, ittsài khaktēng ê ìsù; iā to̍h sī kóng, lán tio̍h tī sìn ê lōeiông ta̍k kang tuimn̄g, ta̍k kang tshōikiû, ta̍k kang khaktēng. Ánne tsiah ē ta̍k kang lóng ū tsìnpō͘, gue̍hgue̍h lóng ū tsìnpō͘, nînî lóng ū tsìnpō͘, tsiongkîbóe ta̍tkàu bô giâugî ê tēpō͘, tsit tsióng sìn tsiah sī tsin sìn!

Ánne, kiùkèng tsitê "sìn ê tìsik lōeiông" sī siáⁿmi̍h leh? Kántan lâi kóng, siōng tiōngiàu to̍h sī "Sùtô͘ Sìnking" lāité iúkuan Iésu hit pō͘hūn ê bûnjī, tsitmá góa kā i tshausiá tī ēkha,

"Góa sìn Iésu Kitok, SiōngTsú ê to̍kseⁿkiáⁿ, lán ê Tsú; inūi Sènglêng tâuthai, tùi tsāisiklí Mâlíah tshutsì; tī Púntiu Pília̍pto jīm lāi tsogū tsailān, pī tèng tī si̍pjīkè téng, síkhì, bâitsòng; lo̍h imhú; tē saⁿ kang tùi sílâng tiong kohua̍h; liáuāu tsiūⁿthiⁿ, tsē tī bûsó͘-putlêng ê Pē SiōngTsú ê tsiàⁿpêng; tsionglâi beh tùi hia kànglîm, símphòaⁿ ua̍hlâng kah sílâng."

Kā tsit tsi̍tkóa bûnjī khoktōa khuithiah, to̍h sī〈Sù Hokim Su〉ni̍h só͘ū Iésu ê kániàu kìlo̍k, náisī "sèngking" ê siōng he̍ksim pō͘hūn. Tī "Sìngī Tsong sìntô͘ tshiú tsheh" lāité kóng tio̍h, Sìngī Tsong ū gō͘ hūn siōng tiōngiàu ê káikikka bûnhiàn, tiongkan tsi̍t hūn to̍h sī〈Martin Luthur Sió Būntap〉,〈Sió Būntap〉ni̍h to̍h paukuat ū "Sùtô͘ Sìnking" ê káisueh.（tsù_1）Khókiàn Martin Luthur tùi "Sùtô͘ Sìnking" ê tiōngsī. Calvin siátsok i ê "Kitokkàu Iàugī " ê kèōe oântsoân hóngtsiàu " Sùtô͘ Sìnking " ê kiatkò͘. "Sìnking" kìjiân pauhâm sì pō͘, to̍h sī, tē it lūn Pē SiōngTsú; tē jī lūn sèng Kiáⁿ; tē saⁿ lūn Sènglêng; tē sì lūn kàuhōe, só͘í Calvin mā kā "Kitokkàu Iàugī " tsoânpō͘ huntsò sì koàn, thang hó kah "Sùtô͘ Sìnking" sio ho͘èng, khókiàn "Sùtô͘ Sìnking" tī Káikik Tsong ê tiōngiàu sèng m̄ sī siókhóa.

Iûkî sī lāibīn ê Iésu pō͘hūn, koh khah sī lán ài te̍kpia̍t tsù’ì ê, i náisī hō͘ lán ta̍k kang tuimn̄g, ta̍k kang sukhó, ta̍k kang khaksìn ê bûnjī, bētàng tsi̍t kang oánlī i. Lí ittēng tio̍h tsi̍t jī tsi̍t kù khì khaksìn i, tsúnkóng ū hoâigî, he to̍h bēsái.

Itpuaⁿ lâi kóng, tú sìnkàu ê lâng beh khaksìn tsiahê bûnjī sī ū khùnlân, m̄koh tán kàu lí ū tu̍tphòa hit tiongkan ê bó͘ tsi̍tkóa bô huattō͘ khaksìn ê bûnkù, kiámtshái to̍h tsoânpō͘ thongta̍t à. Tsêng tsóngthóng Lí Tinghui bat kóng tio̍h i tú sìn Kitokkàu ê sî, to̍h bô huattō͘ tu̍tphòa "inūi Sènglêng hoâithai, tùi tsāisiklí Mâlíah tshutsì" tsitê kuankháu, suah thêng pō͘ put tsêng, inūi beh sìn he si̍ttsāi tsin oh, m̄koh kàu siōng bóe, i tsiongkîbóe ētàng sìn à, to̍h koànthong kuiê Kitokkàu tiōngiàu ê tōlí. Góa siongsìn "tē saⁿ kang tùi sílâng tiong kohua̍h" tsit kù ōe mā kângkhoán tsin oh sìn, m̄koh ittàn siūⁿ thong, to̍h ē tòa lâi kiaⁿlâng ê sêngkó. Khókiàn tsiahê bûnkù túhó sī Kitokkàu ê ji̍pmn̂g hō͘tēng; sìn liáu, to̍h tsìnji̍p Kitokkàu; m̄ sìn, to̍h iáu sī Kitokkàu ê mn̂ggōahàn.

Só͘í tng tsi̍tê lâng kóng i sìn Kitokkàu ê sî, lí tshianbān tio̍h tsù’ì I "sìn siáⁿmi̍h", nāsī i kantaⁿ sìn Iésu ē hō͘ i tsi̍t tshingbān kho͘ ê Sin Tâipè, lí tshianbān m̄thang tòngtsò i sī tsin sìn. Lí tsóng sī ài the̍h "Sùtô͘ Sìnking" ni̍h ê tsiahê bûnjī lâi khó i, nāsī i tsiônglâi lóng bē bêngpe̍k tsiahê lōeiông, ánne lí to̍h kā i kóng i lī sìn Kitokkàu iáu hn̄g leh, ittēng tio̍h tùi "Sùtô͘ Sìnking" khaisí sìn tsiah tio̍h. Tshianbān m̄thang inūi beh kho͘ i óa lâi, kā i phô͘tháⁿ kóng i íking tsintsiàⁿ sìn Iésu. Kású ánne thuatsòaⁿ khì bú, lí ittēng bô huattō͘ tsintsiàⁿ tsínkiù tsi̍t tiâu lênghûn, lí tiantò sī teh hāmhāi i oánlī thiantông tshianlí, tsiongkîbóe bô huattō͘ titkiù lah.

"Sùtô͘ Sìnking" kìjiân sī lán sìn ê khaituan, mā sī sìn ê tsiongkiat, lí bētàng kā i khinsī!

Tsù 1：Kìⁿ "Sìngī Tsong Sìntô͘ Tshiútsheh"（ Tâipak, Tōsiaⁿ Tshutpánsiā, 2006） ia̍h 52~53.

──2010, 08, 02 tah tī "Kitokkàu Thongsìn"