《宋澤萊新著《天路拾穗》TOJ/台灣字版》

 | | | 轉寄

Tsútê 10：Lí mā ētàng kà lâng kóng honggiân（lênggí）！_1

作者 Sòng Te̍klâi 2026.03.08

Tējī pō͘, Sènglêng koànak
Tsútê 10：Lí mā ētàng kà lâng kóng honggiân（lênggí）! _1

1, Itpuaⁿ lâng tùi honggiân ê tshògō͘ jīnti
Kin'áji̍t, kóng honggiân（lênggí）tsiāmtsiām piàn kah bô sînpì à, inūi tio̍hsǹg sī Sìngī Tsong kah Tiúⁿlóhōe ê pósiú kàuphài, mā tshaputto lóng khaihòng in ê sìntô͘ tsūiû ha̍ksi̍p kóng honggiân ā.

M̄koh, kiámtshái sī kòikhì Kitokkàu kài tùi honggiân ê kihêng tsinglūn só͘ tì, kin'áji̍t tī kóng honggiân tsit hāng tāitsì téngbīn, iûgoân ū tsin tsē lâng siuⁿkòe kā i iaumô͘ hòa, á sī gia̍hkoân hòa. Tsóng kóng tsi̍t kù to̍h sī bô huattō͘ lia̍h pêⁿ lâi tùithāi i, tsiah tsōsêng honggiân iáu bô huattō͘ phó͘phiàn ê putliông hiānsiōng.

Iaumô͘ hòa ê lâng jīnûi, kóng honggiân ē tìsú siâmô͘ ê tshimji̍p, ínkhí Mô͘kúi ê hūsin; gia̍hkoân hòa ê lâng jīnûi, honggiân sī siū Sènglêng sé ê tsèngkì, bēhiáu kóng honggiân, bô huattō͘ titkiù.

Tāikhài inūi tsinglūn tsin kotshim koh hiânò, tsin tsē Kitokkàu kài tshongbêng ê tìsik hūntsú, to̍h tī kóng honggiân tsit hāng insù téngbīn, tsi̍tbīn kiaⁿ tsi̍tbīn kó͘ kòethâu koân, tsiongkîbóe tìsú pa̍kkha bô huattō͘ hiòng tsêng à.

Góa bat tī tsi̍tê sînha̍k'īⁿ ê giánkiùsó͘ lāité thiaⁿ khò, giánkiùsing ū 10 lâng tsóiū, lâitsū kok tsióng bôkâng kàuphài. Góa mn̄g in ēhiáu kóng honggiân ê ū kúi ūi? Kantaⁿ ū nn̄gê lâng gia̍h tshiú, hō͘ góa tshuah tsi̍t tiô, tsiahê teh beh khì tsò thoântō á sī bo̍ksu ê lâng, kèngjiân tsiahni̍h tsē lâng bēhiáu kóng honggiân, ánne tsionglâi in beh ántsóaⁿ thoânkàu?!

Tiantò sīhui tìsik hūntsú ê sìntô͘ píkàu khah hó, iûkî sī o͘jihsáng á sī o͘bahsáng, in m̄bat thiaⁿsìn iâugiân, tsi̍tē’á to̍h o̍h ēhiáu kóng honggiân, soktō͘ tsin kín, jîtshiáⁿ lo̍k tsāi kîtiong. Tshiūⁿ goán tsitê sèsè ê "Lo̍kkáng Sìngīhōe", suijiân kantaⁿ ū 10 kúiê pêngsìntô͘, khiok tshaputto sī lânglâng lóng ēhiáu kóng honggiân.

Góa to̍h siūⁿ, nāsī tsiahê bēhiáu kóng honggiân ê tìsik hūntsú thoântō á sī bo̍ksu lâi goán tsia tòaniá kàuhōe, in kám káⁿ tùi goán tsiahê pêngsìntô͘ suatkàu? In kám bē kámkak kiaⁿhiâⁿ simhi?

Kîsi̍t, kóng honggiân sī tsin kántan ê tāitsì, tsíiàu 5~10 hun tsing to̍h o̍h ēhiáu, só͘ khai ê sîkan khùila̍t kah tshiùⁿ tsi̍t siú sikua tshaputto. Tsísī ū kóa lâng tsúnkóng siūⁿ beh o̍h, inūi khì tshōe m̄ tio̍h lâng, tsi̍t pái bô o̍h ēhiáu, nn̄g pái bô o̍h ēhiáu, to̍h lia̍htsún kakī bô kóng honggiân ê insù, tsiū ánne hòngkhì, tse sī gōani̍h'á khósioh ê tāitsì!

Tī kóng honggiân tsit hāng tāitsì téngbīn, lán ittēng tio̍h tsaiiáⁿ nn̄gê phó͘thong ê siôngsik：1, Tse ingkai sī tshaputto só͘ū ê Kitoktô lóng ū ê insù, bē ū khùnlân ha̍ksi̍p; inūi, i sī Sènglêng só͘ū insù tiong "siōng sè ê", ōaⁿ kù ōe lâi kóng ̄to̍h sī siōng iông’ī o̍h ēhiáu ê. 2, Tse kah itpuaⁿ ê kîtó kângkhoán, sī siōng tsèngsiông ê tsi̍t tsióng sìngióng piáuhiān, tsísī kháuthâu siōng ê tōngtsok, bián hùi siuⁿ tsē théla̍t, mā bô suiàu siáⁿmi̍h tsúnpī, sûisî lóng thang kóng honggiân, ētàng tsūiú siu pàng, khiok ētàng hō͘ lâng tòa lâi tsin tsē ê līik. Só͘í, jīmhô iaumô͘ hòa á sī gia̍hkoân hòa ê giânlūn lóng sī o͘pe̍h kóng, o̍h ēhiáu kóng honggiân só͘ suiàu ê tōngtsok kah tòa lâi ê hāukó m̄sī in só͘ kóng ê ánne!

Siōng tiōngiàu ê sī, lán siūⁿ beh o̍h honggiân, ài tshōe tio̍h lâng, tsiah biántit tsōsêng kakī tsáutshōe lêngmiā ê tshèsiong á sī gō͘kái. Tôngsî kà lâng kóng honggiân ê lâng mā tio̍h tsèngkhak páak ūhāu ê honghuat, ittàn lí ê honghuat m̄ tio̍h, bô huattō͘ tsin kín kà ēhiáu tùihong, to̍h sī teh lōnghùi pa̍tlâng ê sîkan; sīmtsì hō͘ tùihong gō͘kái i bô Sènglêng ê insù, tùi tsiânlâi ha̍ksi̍p ê lâng ê sìnsim sī iúhāi ê.

Tī tsia, góa thêkiong tsi̍t ia̍h góa ha̍ksi̍p honggiân ê tshògō͘ ha̍ksi̍p kah tsèngkhak kà lâng kóng honggiân ê si̍ttsè kinggiām, hō͘ tāike ētàng pībián tshògō͘ ê ha̍ksi̍p, jîtshiáⁿ káⁿ ánne lâi kàutō thajîn kóng honggiân.