《宋澤萊新著《天路拾穗》TOJ/台灣字版》

 | | | 轉寄

Tsútê 9：Siāukài tsi̍tê ke̍k kántan, ū hāukó, siōng bíhó ê kîtó huat!

作者 Sòng Te̍klâi 2026.03.01

Tē it pō͘ Tshinggī titkiù
Tsútê 9：Siāukài tsi̍tê ke̍k kántan, ū hāukó, siōng bíhó ê kîtó huat!

Tùi Kitoktô lâi kóng, óngóng jīnûi kantaⁿ ū siūsé tsiah ē bông SiōngTsú kiùtsō͘, só͘í kîtó sī bô ēng ê. Tùi Kitoktô lâi kóng, tiāⁿtiāⁿ kámkak tsi̍t kang kantaⁿ ētàng kîtó tsi̍t, nn̄g pái, tshùsò͘ bênghián siuⁿ tsió; hôhòng kîtó sû lòlòtn̂g, tiāⁿtiāⁿ m̄tsai teh kóng siáⁿ, inūi ánne, kîtó óngóng bôhāu.

Kám ū tsi̍tê honghuat ētàng boántsiok hui Kitoktô kah Kitoktô, sûisî hō͘ in tsìnji̍p Kitokkàu ê òpì tiong, tsiū ánne tit tio̍h ìgōa ê konghāu leh?
Tapàn sī, ū!

Ēkha to̍h sī pittsiá só͘ thêkiong ê tsi̍t tsióng ke̍k līpiān koh ūhāu ê honghuat. Sī ánne tsò：

1, Lí tsíiàu kìtiâu sìê jī, to̍h sī "Iésu kiù góa" tsit sìê jī to̍h ēsái, kîî ê kîtó sû lóng sénglio̍k biánkóng.

2, Lí tī khùn tsêng, tshaputto 15 hun tsing, liânsòa tsuansim be̍kliām "Iésu kiù góa" tsit kù ōe, tsi̍t kù koh tsi̍t kù tha̍k, liânsòa liām, m̄bián tshut siaⁿ, tiāmtiām liām. Lí thang tsē leh liām, khiā leh liām, kiâⁿ leh liām, á sī tsò ūntōng ê sî liām lóng bē ū būntê. 15 hun tsing liáuāu, to̍h khì khùn. Nāsī kámkak 15 hun tsing bô kàu, thang iânsio̍k kàu 30 hun tsing mā bē ū būntê. Tsóng kóng tsi̍t kù, kîtó oân lí to̍h khì khùn; tsit tsióng óngóng ē huatsing lí sióngsiōng bē kàu ê kîtsik! Kású lí ētàng tsi̍t kang liânsòa ánne tsò, só͘ siu ê konghāu to̍h ē koh khah puttikliáu.

Góa bô huattō͘ kā lí kóng ē huatsing siáⁿmi̍h kîtsik kah hāukó, inūi lâng kiámtshái lóng bô kângkhoán; m̄koh huatsing kîtsik kah hāukó ê sî, lí kakī ē tsaiiáⁿ! Te̍kpia̍t sī tùi hit kóa ke̍k suiàu kiùoān ê lâng. 1, Tsù’ì! Lí tio̍h tsuansim liām, phòeha̍p ho͘khip liânsòa liām. Kantaⁿ ū tsitê pìkuat!

Ēkha sī saⁿê lâng ê kiàntsèng：
Bó͘ tsi̍tê lāulâng, tsìntsêng góa khùnbîn tsin tshián, inūi ū liaphō͘sòaⁿ ê būntê, siōngtsió múi mê lóng tio̍h tshéⁿ khí lâi tsi̍t pái khì piānsó͘, m̄koh liām Iésu kiù góa liáuāu, óngóng tsi̍t mê kàu thiⁿkng, khùn kah tsin lo̍hbîn, bô suiàu pòaⁿmê khí lâi. Tshintshiūⁿ tsahng góa tsa̍pjī tiám pòaⁿ khùn, khí lâi ê sî sī káu tiám pòaⁿ, tahtah khùn káu tiámtsing kú, bô siáⁿmi̍h bāng, tsingsîn tsin hó, tsin khoàilo̍k!

Bó͘ tsi̍tê siàuliânlâng, tshì kiâⁿ tsi̍t kang íāu, tsa mê kèngjiân káu tiám gōa to̍h hunhun khùn khì, tōa khùn 11 tiámtsing kú, kin'áji̍t tsákhí tshéⁿ khí lâi, tsingsîn bē bái. Kèsio̍k tshì khòaⁿ māi. Góa liām "Iésu kiù góa" ê sî, bô gōa kú ē kámkak singkhu ni̍h ê Sènglêng tsòngtāi khí lâi, huisiông līhāi! Góa kakī ê tsa̍pliām tsiū ánne ē bô khòaⁿ tio̍h! Kòikhì góa thiám kah ūsî bô siūⁿ beh hiankhui "sèngking", tsit tsióng kántan liânsòa ê kîtó liáuāu, kah "sèngking" tsi kan khòaⁿ khí lâi tsin tshinkīn, tiāⁿtiāⁿ tsin siūⁿ beh hiankhui. Tse tsin kîbiāu! Sī m̄sī kántan ê kîtó tsiah ētàng pâitû kakī ê ìliām, góa tútsiah teh siūⁿ, i kah honggiân kîtó ū tsi̍t tiám'á lūisū ê só͘tsāi, m̄koh tī ìsik tsânbīn koh khah tsiautiám tsi̍ptiong.

Bó͘ tsi̍tê bo̍ksu, tsa mê tshìthàm lâi liânsòa kîtó, 22:00~04:00 khùn tsi̍ttshéⁿ, tsingsîn hó. Kámsiā Tsú Iésu! Liânsòa sèng ê kîtó tsintsiàⁿ sī tsin hósè.

Tsit tsióng kîtó sī bô hun Kitoktô á sī hui Kitoktô. Ū kóa hui Kitoktô, pittsiá bat kà i tsò tsit tsióng kîtó ê sî, kângkhoán siu tio̍h tsin tōa ê hāukó.

Góa siūⁿ SiōngTsú to̍h sī tsènglâng ê SiōngTsú, bē kantaⁿ sī Kitoktô ê SiōngTsú. I beh kiù só͘ū ê lâng, put tsísī te̍ktēng ê lâng!

Só͘í hui Kitoktô m̄bián khehkhì, siūⁿ beh sùnkan théhōe Kitok òpì ê lâng, lí thang ánne tsò!
—2019, 01, 12