《宋澤萊新著《天路拾穗》TOJ/台灣字版》

 | | | 轉寄

Tsútê 10： Lí mā ētàng kà lâng kóng honggiân（lênggí）! _3

作者 Sòng Te̍klâi 2026.03.22

Tējī pō͘ Sènglêng koànak

Tsútê 10： Lí mā ētàng kà lâng kóng honggiân（lênggí）! _3

3） Ìgōa o̍h ēhiáu kàutō pa̍tlâng kóng honggiân
2004 nî, Jîntsong bo̍ksu, Sêngtik huhū, Sèhun hiaⁿ tiāⁿtiāⁿ lâi goán tau tsūhōe ê sî, to̍h sī góa o̍h ēhiáu kà lâng kóng honggiân ê khaisí. Tēitê hō͘ góa kàutō ētàng kóng tshut honggiân ê lâng to̍h sī Sèhun hiaⁿ.

Hit sî, goán tsūhōe tiāⁿtiāⁿ kóng tio̍h kóng honggiân tsit hāng tāitsì, suijiân tongsî Sìngīhōe tùi sìntô͘ kóng honggiân tsit hāng tāitsì tsháitshú pósiú ê thāitō͘, m̄koh àntsiàu goán ê kinggiām, kóng honggiân tùi lêngmiā ê sêngtióng ū bôpí ê hāule̍k, tng goán tsòhóe kîtó ê sî, mā tiāⁿtiāⁿ ēng honggiân kîtó.

Só͘í tsiū ánne ínkhí iáu bē hiáu kóng honggiân ê Sèhun hiaⁿ ê hèngtshù. Ū tsi̍t pái tsūhōe ê sî, Sèhun hiaⁿ to̍h kóng i siūⁿ beh o̍h honggiân, ài goán kà i.

Hit tongsî, honggiân kóng kah píkàu khah itliû ê lâng, sī góa kah Sêngtik hiaⁿ. M̄koh Sêngtik hiaⁿ só͘í ēhiáu kóng honggiân ê goânin, pēng m̄sī lâitsū liāmsiōng "Halélú'iah" tsit kù oló sû; i sī kingkòe tsi̍t ūi Sinkapho pò͘tōka ê hōaⁿtshiú, hutjiânkan kóngkhí honggiân. Iā to̍h sī kóng Sènglêng kingkòe hit ūi pò͘tōka ê tshiú, thoânta̍t kàu Sêngtik hiaⁿ ê singkhu téng, i inūi ánne hutjiân ēhiáu kóng honggiân. I kóng honggiân ê lêngle̍k bô tshintshiūⁿ Tsin Iésu kàuhōe ê sìntô͘, ittēng tio̍h sinkhó͘ liāmsiōng "Halélú'iah" tit tio̍h ê; ōaⁿ kù ōe kóng ̄, i m̄bián ha̍ksi̍p to̍h ēhiáu kóng honggiân à. Kìjiân m̄sī ha̍ksi̍p lâi ê, to̍h bô siáⁿ khólêng tsaiiáⁿ kàutō thajîn kóng honggiân ê honghuat! Só͘í góa to̍h tsūkò-hùnióng kóng, “Góa lâi kà lah!"

Kóng si̍ttsāi ōe, hit tongsî góa m̄sī tsin ū tsūsìn, inūi góa sī kingkòe tsin tsē nî hùntàu tsiah ēhiáu kóng honggiân ê, simlāi tsaiiáⁿ kóng honggiân m̄sī hiahni̍h kántan. M̄koh, kìjiân Sèhun hiaⁿ siūⁿ beh ha̍ksi̍p, góa to̍h ingkai kà i, tio̍hsǹg tongtiûⁿ bô huattō͘ kóng tshut honggiân, íāu mā thang àntsiàu góa kà ê honghuat, kakī ke khah tsē liānsi̍p, kàu siōng bóe mā ittēng ētàng kóng honggiân.

Góa sing kā Sèhun hiaⁿ kóng, "Honggiân sī tùi ' Halélú'iah ' tsit sì jī tsoánōaⁿ kòe lâi tsò ê, tng lán kā tsit sì jī ēng ke̍k kín ê soktō͘ tōasiaⁿ liânsòa liāmsiōng, kàu siōng bóe, lán ê gíim to̍h ē khòaⁿ khí lâi būbū bô bêng; kohtsài kakhoài soktō͘, lán ê tshùitsi̍h to̍h ē kńg khí lâi, kóng tshut tsi̍t tsióng lán só͘ bô huattō͘ líkái ê ōe. Lán ingkai tī simlāi kiantēng jīnûi góa ētàng kóng tshut thiⁿsài ê ōegí; îit ài tsò ê tōngtsok to̍h sī bô só͘ kiaⁿùi lâi tōa imliōng, jîtshiáⁿ kakhoài soktō͘ lâi liām"

Góa koh kā i kóng, tng i liāmsiōng "Halélú'iah" ê sî, góa ē ittsài hōaⁿtshiú tī i ê thâukhak téngbīn, tng góa hōaⁿtshiú ê sî, i to̍h ke tōa imliōng, tsing khoài sok tō͘.

Ūi tio̍h beh hō͘ i tsaiiáⁿ honggiân sī siáⁿmi̍h, góa sing sīhoān tsi̍t hēlia̍t ê honggiân hō͘ i thiaⁿ. Góa kóng tsíiàu thâu khísing huattshut tsi̍tê bóim, m̄kóan sī A, E, I, O, U……ê tiongkan jīmhô tsi̍tê, góa to̍h ētàng kóng tshut tsi̍tê ōikù, múiê ōikù lóng bôkâng, góa mā m̄tsai in ê ìsù, m̄koh in ê kiōngtông tiám to̍h sī tsi̍h im te̍kpia̍t tsē, inūi hit kóa ōe tsúiáu sī tùi tshùitsi̍h tsìntōng sánsing ê, tshùitsi̍h sī kóng tshut honggiân ê pìbi̍t só͘tsāi. Góa siôngsè sīhoān kóng honggiân hō͘ i thiaⁿ.

I tsiū ánne khaisí liām khí "Halélú'iah" tsit sì jī, góa to̍h hōaⁿtshiú tī i ê thâukhak téngbīn, kó͘lē i ke tōa imliōng, kakhoài soktō͘. Ūi tio̍h bô beh hō͘ i sitkhì tōngle̍k, góa to̍h tī i ê sinpiⁿ tsò "tan imtsat ê honggiân kîtó", góa ēng "tah, tah, tah, tah" tsit tsióng ke̍k kín ê tsi̍h im tī i piⁿ'á tōasiaⁿ kîtó, kiò i ētàng tshiauua̍t góa ê siaⁿim ê imliōng kah soktō͘. Ta̍k pái i ê liāmsiōng ê siaⁿim sè lo̍h lâi á sī soktō͘ bān lo̍h lâi, góa to̍h hōaⁿtshiú tī i ê thâukhak téngbīn, kā i kóng, "siaⁿim siuⁿ sè! Soktō͘ siuⁿ bān! Kaiû! Koh tsài kaiû!” Góa ài i bōngtsêng kîtó, phahpiàⁿ kîtó, kahná tsi̍t pah bí tsáupio písài, hiòng tsêng ti̍tti̍t tshiong!

Tshaputto 20 hun tsing liáuāu, i ê thâuhia̍h ū kōaⁿ, m̄koh liāmsiōng "Halélú'iah" ê gíim būbū bô bêng ā, sòatsiap i kóng tshut kúiê tsi̍h im honggiân, suijiân bô ku̍tliu, m̄koh siaⁿim tsin tōa. Góa koh kiò i tōasiaⁿ kèsio̍k kóng, i tsiongkîbóe ētàng bô thêng kóng tshut sio liânsòa ê honggiân à. Tsiongkîbóe tāikong-kòsêng lah!

Tse sī góa kà Sèhun hiaⁿ kóng honggiân ê kuiê kingkòe, mā sī thâu tsi̍tpái kà lâng kóng tshut honggiân. Suijiân góa kah i lóng tsin tsia̍hla̍t, tsin bô kántan tsiah kà i ētàng kóng tshut honggiân, m̄koh góa iáu sī kiaⁿ tsi̍t tiô, inūi i kèngjiân ētàng kóng tshut sio liânsòa ê honggiân, kah góa púnlâi īkó͘ ê bô kângkhoán, góa púnlâi jīnûi i bô siáⁿ khólêng ē tongtiûⁿ kóng tshut honggiân.

Góa to̍h siūⁿ, "Tsin kîkoài! Sèhun hiaⁿ kèngjiân tsiahni̍h kín to̍h ēhiáu kóng honggiân à. Góa phahpiàⁿ 10 nî ísiōng tsiah ēhiáu kóng honggiân, i kèngjiân 20 hun tsing to̍h o̍h ēhiáu, tsintsiàⁿ sī bô kongpêⁿ!" M̄koh, góa tsintsiàⁿ ūi i tsin huaⁿhí.

Tsiū tī hit tongsî, góa ìsik tio̍h, goânlâi kóng honggiân ittēng ài ū lâng tī piⁿ'á kàutō, kó͘lē, ittàn khiàmkhuat kàutō, kó͘lē, khò kakī tanto̍k liānsi̍p siūⁿ beh kóng tshut honggiân, ittēng ē piàn kah bôpí ê kanlân!

Tējī pái kàutō pa̍tlâng kóng honggiân, sī tī kīlî Lo̍kkáng bô hn̄g ê "Kheô͘ Tsoânjîn Kuanhoâi Tiongsim（Kheô͘ Sìngīhōe）", sîkan mā sī 2004 nî.

Ū tsi̍t pái, Jîntsong bo̍ksu anpâi góa khì "Kheô͘ Tsoânjîn Kuanhoâi Tiongsim" iánkáng, kóng siáⁿmi̍h to̍h piànsêng lântê. Tongsî, góa tùi Kitokkàu kàulí oântsoân m̄bat, tiāⁿtiāⁿ tsi̍t khuitshùi to̍h tsaiiáⁿ kakī kóng m̄ tio̍h, kinpún to̍h bô kángtō ê púnsū. Góa tsin siūⁿ mài khì, khiok thesî bē tiāu. Kàu siōng bóe, góa tsò mō͘hiám ê kuattēng, siūⁿ beh kà Kheô͘ ê sìntô͘ kóng honggiân.

Góa tsiàusiông m̄sī tsin ū sìnsim, mā m̄ káⁿ kóng ēng tsi̍t tiámtsing ê sîkan to̍h siūⁿ beh kàutō gōa tsē lâng ētàng kóng tshut honggiân. M̄koh nā ētàng kà tshut tsi̍t nn̄gê lâng kóng honggiân, káipiàn tsi̍t nn̄gê lâng ê lêngmiā tsōnghóng, to̍h tsin boán’ì à. Inūi bôlūn ántsóaⁿ kóng, kóng honggiân tùi lêngmiā ê hāukó lâi kóng, pí thiaⁿ 50 pái, 100 pái ê iánkáng khah hó!

Kàutō honggiân ê sîkan sī Lépàiji̍t ê tsákhí 10~11 tiám, tiûⁿbīn kiámtshái píkàu khah tōa, lâi lépài ê lâng tshiaukòe 20 lâng ísiōng, ū lâng thiaⁿ kóng góa beh kà honggiân, sīmtsì tùi hn̄ghn̄g ê só͘tsāi kóaⁿ lâi tsūhōe. Góa kiaⁿ tsi̍tê lâng ènghù bē khì, inūi ánne to̍h tshiáⁿ Sèhun hiaⁿ kah Sêngtik hiaⁿ lâi pangbâng, ǹgbāng in ētàng hia̍ptsō͘ góa.

Kójiân, tsiânlâi"Kheô͘ tsoânjîn kuanhoâi tiongsim"tshamka lépài ê lâng kiōngiú 21 lâng, tshaputto lóng sī bē hiáu kóng honggiân, tsit tiám tiantò ū kóa hō͘ góa ìgōa, kámkak Sìngīhōe siuⁿkòe pósiú lah.

Góa tsúnpī tsi̍t tè CD, lāibīn tōapō͘hūn sī kîkiû Sènglêng kànglîm ê kua, huisiông hóthiaⁿ. Tī khaisí kàutō tsìntsêng, góa sing pòhòng tsiahê kua, bānbān'á tán tsūhōe ê lâng tsoân sò͘ kàu tsê. Tī hòngsàng imga̍k ê sî, góa phó͘phó͘ á huatkiàn Sènglêng kahná tī lépàitn̂g ê téngbīn niûthiāu kan teh liûtōng, hō͘ góa kámkak ū kóa beh tsùi khì ê hit tsióng kámkak, sìnsim inūi ánne piàn kah tsin ua̍htāng.

Khaisí kàutō ê sî, kah kàutō Sèhun kângkhoán, ài in liāmsiōng "Halélú'iah" ê siaⁿim tio̍h kóaⁿkín, ài tōasiaⁿ; góa ē hōaⁿtshiú tī in thâukhak téngbīn, ē tī in ê hīⁿkhang piⁿ kîtó; in ittēng tio̍h kah góa kēngtsing, khòaⁿ siáⁿlâng ê liāmsiōng siaⁿim píkàu khah tōa, píkàu khah kín.

Tongsî, góa sú'iōng màikuh, hō͘ góa ê kîtó piàn kah píkàu khah iông’ī.

Góa mā sing sīhoān tsi̍t piàn honggiân kîtó, ài in tsù’ì honggiân kîtó to̍h sī tsi̍h im ê kîtó.

In ê kîtó tsi̍t khaisí, góa lûnliû tsi̍tê tsi̍tê ūi in hōaⁿtshiú, tī in ê hīⁿkhang piⁿ kîtó, kó͘lē in tōasiaⁿ koh khoàisok kîtó. M̄koh jînsò͘ si̍ttsāi siuⁿ tsē, piàn kah ū tsi̍t tiám'á oh ènghù, góa kantaⁿ ētàng tī bó͘ lâng ê piⁿ'á thêngliû tsi̍t, nn̄g huntsing to̍h līkhui, kohtsài ōaⁿ kàu lēnggōa tsi̍t lâng ê sinpiⁿ khì, kahná tshân eⁿ tiámtsúi. Góa tsiū ánne kā ǹgbāng khǹg tī màikuh téngbīn, góa itti̍t ēng màikuh tsò"tan imtsat ê honggiân kîtó", hō͘ "tah, tah, tah, tah" ê siaⁿim hiáng piàn siklāi, góa itti̍t ài in tōasiaⁿ koh khoàisok kîtó, tsi̍t tiám'á to bô ài in sanglēng lo̍h lâi!

10 kúi huntsing kòeliáu, góa huatkiàn ū tsímōe khaisí teh khàu, mā ū lâng itti̍t lâu ba̍ksái. Tng góa kiâⁿ khì in sinpiⁿ ka khòaⁿ, to̍h thiaⁿ tio̍h in íking kóng tshut honggiân. Góa koh khah phahpiàⁿ, tsiàu sūnsī pang múi lâng hōaⁿtshiú kîtó, itti̍t kóng in ê siaⁿim siuⁿ sè, soktō͘ siuⁿ bān; tsi̍t tú tio̍h íking kóng tshut honggiân ê lâng, góa to̍h kā i kóng íking ēhiáu kóng honggiân ā, ài i koh khah tōasiaⁿ kîtó.

Tsi̍tba̍knih kú, 30 hun tsing kòikhì à, góa huatkiàn ēhiáu kóng honggiân ê lâng jú lâi jú tsē, ū kóa lâng ê siaⁿim huisiông tōasiaⁿ, jîtshiáⁿ kui singkhu tsìntōng, huisiông tsìnji̍p tsōnghóng.

45 huntsing liáuāu, góa kòjîn íking kámkak tsihtsài bē tiâu, siaⁿim piàn kah ū kóa jio̍k lo̍h lâi, lâng mā thiám loh, góa to̍h suanpò͘ thêngtsí kîtó, kiatsok tsit tiûⁿ kàutō.

Liáuāu, góa kiò íking ētàng kóng tshut honggiân（tī kàutō kòethêng tiong hō͘ góa tshingtshó jīntēng ētàng kóng tshut honggiân tsiá）ê lâng gia̍h tshiú, kiōngiú 7 lâng, hunpia̍t sī So͘ Kimhô, Tsiā Sèhun, Tsu Phàitsin, So͘ Tshiausèng, Tân Gio̍klêng, Âng Gio̍khio̍h, Tân Iāmhông. Tiongkan í So͘ Tshiausèng ê siaⁿim te̍kpia̍t tōasiaⁿ koh phiautsún. Lēnggōa iáu ū 3 lâng sī góa jīnûi óakīn ētàng kóng honggiân pianiân ê lâng （ētàng huattshut bô liûlī ê tsi̍h im）, hunpia̍t sī Lí Éngtó͘, Tsiu Bēngkun, Liāu Kénggî.

Siusêng tshiaukòe góa ê ànsǹg, kèngjiân ū tsiahni̍h tsē lâng tongtiûⁿ o̍h ēhiáu kóng honggiân, tāikhài sī ū saⁿ hun tsi it; ōaⁿ kù ōe kóng ̄, saⁿ lâng tiongkan to̍h ū tsi̍t lâng ētàng kóng tshut honggiân; koh khah hôhòng iáu ū tsi̍tkóa lâng mā lâi kàu kóng honggiân ê pianiân. Tsit pái mā hō͘ góa kiaⁿhiâⁿ giâugî bô thêng.

Lēnggōa, tī kūnî, "Lo̍kkáng Sìngīhōe" sêngli̍p bô gōa kú, góa koh tī tsūhōe tiong tsòhóe kàutō sìê lâng, hit tiongkan ū Tân Bûnkiat, Tân Bûnkiat ê lāubú, Tân Bûnkiat ê khantshiú ētàng kóng tshut honggiân, sîkan tshaputto pòaⁿ tiámtsing, í Tân Bûnkiat ê siaⁿim te̍kpia̍t tōasiaⁿ koh phiautsún. Tsit pái ê pílē sī sìhun tsi saⁿ.

Iáu ū tsi̍t pái sī kà Âng Siokkhing tsímōe kóng honggiân, sîkan tāiiok tsí ēng 10 huntsing tsóiū.

Koh tī Ôngking kà Î Kùi hiaⁿtī kóng honggiân, tsit pái siōngkín, Î Kùi hiaⁿtī tāikhài kantaⁿ ēng 2 huntsing ê sîkan to̍h kóng tshut honggiân.