《宋澤萊新著《天路拾穗》TOJ/台灣字版》

 | | | 轉寄

Tsútê 10：Lí mā ētàng kà lâng kóng honggiân（lênggí）! _4

作者 Sòng Te̍klâi 2026.03.29

Tējī pō͘ Sènglêng koànak
Tsútê 10：Lí mā ētàng kà lâng kóng honggiân（lênggí）! _4

4） Honggiân ê pêngsiông sèng, si̍tiōng sèng kah tshauliān
Góa tùi honggiân ê tsiaptshiok, kàu tsitmá ûitsí, íking tshiaukòe 30 nî ísiōng ê sîkan, só͘ tsiaptshiok ê ētàng kóng honggiân ê lâng huisiông tsē, bôlūn seⁿ tshiú mā hó, kotshiú mā hó, góa lóng jīnbat kòe. M̄koh pēng bô tú tio̍h kóng honggiân ê lâng ū só͘ūi "khí mô͘ kong（Hôagí ê “tsáu hóe ji̍p mô͘"）” ê hiānsiōng; tiantò sī góa tú tio̍h ēhiáu kóng honggiân ê Kitoktô lóng sī huisiông tsik ke̍klo̍k kuan, in inūi tsaiiáⁿ Sènglêng ê tsi̍tkóa tōlí, piàn kah huisiông pênghô koh ū tsūsìn, in inūi ánne bē hām lo̍hkhì"in hêngûi tshinggī” ê phiantsha lāité, ētàng tsunhêng Sènglêng ê kàutō lâi sêngtsiū sìngióng, hō͘ huisiông lâng tsunkèng. Só͘í kóng honggiân iaumô͘ hòa ê tsokûi, tsāi góa khòaⁿ khí lâi sī bô ingkai ê. In bē hiáu kóng honggiân m̄ to̍h hó ah, suah mā bētàng iôngín pa̍tlâng kóng honggiân, sīmtsì tiāⁿtiāⁿ giâmtiōng siatto̍k Sènglêng, tsionglâi ittēng ē tsia̍h tio̍h kiⁿ. Lán nāsī tú tio̍h tsit tsióng lâng, ingkai siānì kā i kiùtsèng, tsiah biántit i itti̍t m̄ tio̍h, tsiongkîbóe tìsú bô huattō͘ siusuah.

Tôngsî, mā ū lâng kòehūn kokí kóng honggiân ê hāukó, jīnûi kóng honggiân tsiah ētàng"titkiù", tse iū koh sī tsi̍tê ke̍ktuan ê khòaⁿhuat. Kóng honggiân kám ētàng titkiù? Tsit tiám góa bô siáⁿ tsaiiáⁿ. M̄koh huan piàn "sèngking" tsua̍ttùi tshâ bē tio̍h"kóng honggiân ittēng titkiù"tsit kù ōe, só͘í kóng liáu mā téngî pe̍h kóng. "sèngking"kantaⁿ ū"in sìn tshing gī","sìn koh siūsé ittēng titkiù"tsiahê kingbûn."sìn Iésu"tsiah sī titkiù ê îit huatmn̂g, kîtha lóng sī phònghong jîí. Só͘í tú tio̍h tsit tsióng bô tshâkhó "sèngking" kóng honggiân ê lâng, lán mā ingkai tio̍h kā i khoàntō, hō͘ i tńglâi"in sìn tshing gī” ê tōlō͘, hō͘ i ū jīnbat"kṳàu tsinlí” ê kihōe, lí bián tùi i siuⁿ khehkhì, tsiah biántit hāi tio̍h i!

Tsóng kóng tsi̍t kù, kóng honggiân sī tsin pêngsiông ê, kah lán ēhiáu kóng Inggí, Ji̍tgí sī kângkhoán, m̄nā bē oh o̍h, mā bô siáⁿmi̍h hikî, ēng pêngsiông ê simthài lâi khòaⁿthāi to̍h hó.

Lēnggōa, kóng honggiân ū nn̄gê kongiōng, tsi̍tê sī tsōtsiū kakī; lēnggōa tsi̍tê sī tsōtsiū kàuhōe. Tī tsōtsiū kakī tsit hongbīn, náisī tsí ētàng giú kīn Sènglêng íki̍p Iésu kah lán tsi kan ê kīlî, hō͘ Sènglêng kah Iésu bi̍ttshiat tī lán ê simlāi seⁿ kin; jîtshiáⁿ jú kóng honggiân, tsit tsióng kámkak to̍h ē jú lâi jú tshim, tse sī tsin bênghián ê hāukó, sī bēsái hó͘ⁿjīn ê sūsi̍t. Suijiân Páulô kā kóng honggiân ê insù lia̍t tī káu tsióng insù ê āubīn, hō͘ lâng kámkak i sī"siōng sè ê insù", m̄koh tī si̍ttsè ê thégiām lāité, i pí"ībāng","īsiōng"koh khah ētàng giú kīn lán kah Sènglêng, Iésu tsi kan ê kīlî. Lán tsaiiáⁿ, ētàng tsò "ībāng” “īsiōng” ê lâng tsin iông’ī to̍h piànsêng"sianti", inūi Sènglêng ē tsià tio̍h"ībāng","īsiōng"tāising kā i kóng tsi̍tkóa tāitsì, khòaⁿ khí lâi insù sī tsin tōa ê; khósioh ê sī tsit tsióng lâng iáu sī bô huattō͘"sîsî-khikkhik"ū"ībāng","īsiōng". Inūi lán tûhui khùn khì, nā bô, bē ū"ībāng"; mā bô khólêng ta̍kê tī tngthâu pe̍hji̍t lóng ū"īsiōng". M̄koh, lán khiok ētàng"sîsî-khikkhik"kóng honggiân, iā to̍h sī"sîsî-khikkhik"hō͘ kakī tshimtshiat kámsiū tio̍h SiōngTsú kah góa tôngtsāi, tse sī kóng honggiân bô khótshú tāi ê iusè, só͘í lí kám ētàng kóng i sī siōng sè ê insù?

Tôngsî, ū lêngle̍k tiāⁿtiāⁿ tsò"ībāng","īsiōng"sīmtsì"thiaⁿ tio̍h SiōngTsú ê ōegí” ê lâng tsin tsió, bô tshintshiūⁿ kóng honggiân ê lâng hiahni̍h phó͘phiàn, to̍h koh khah hō͘ lâng kámkak i sī tsiâⁿ tiōngiàu. Kóng honggiân tsiah sī Sènglêng kah tsèng sìntô͘ tsi kan siōng hó ê kauthong koántō, ittàn hòngkhì kóng honggiân, to̍h téngî sī tsia̍ttn̄g Sènglêng kah sìntô͘ tsi kan siōng hó ê ónglâi kiôniû, tsit tiám ta̍ttit hoántùi kóng honggiân ê lâng hóhó’á tsimtsiok sukhó! Tongjiân, góa m̄sī kóng hoānnā ēhiáu kóng honggiân ê lâng, ittēng ētàng kah Sènglêng tsìnhêng siōng tshimkhik ê kauliû, ū ê lâng suijiân ēhiáu kóng honggiân, m̄koh tùi Sènglêng ê thégiām iáu sī bô huattō͘ tshimji̍p, tse to̍h ài khòaⁿ kóng honggiân ê lâng kám goān’ì phahpiàⁿ"tshauliān honggiân"（iā to̍h sī tiāⁿtiāⁿ kóng honggiân ） lâi kuattēng.

Itpuaⁿ lâi kóng, kantaⁿ ēhiáu kóng kúiê imtsat honggiân ê lâng kah ētàng tn̂gphiⁿ-tāilūn sueh honggiân ê lâng sī bô kângkhoán. Tsêngtsiá ê kong la̍t tshián, hiōtsiá ê kong la̍t tshim, tse sī ittēng ê tōlí. M̄koh, khò"tshauliān"（iā to̍h sī tiāⁿtiāⁿ kóng honggiân）, kàu siōng bóe tsíū kóng kúiê imtsat ê lâng mā thang piànsêng ētàng kóng kah lòlò tn̂g ê lâng, hō͘ tsi kan ê tshapia̍t hông giú pêⁿ. Kiaⁿ ê to̍h sī, ū kóa íking o̍h ēhiáu kóng honggiân ê lâng bô koh kóng honggiân, tìsú 10 nî, 20 nî liáuāu, i tsiàusiông kantaⁿ ēhiáu hit kúiê imtsat ê honggiân, tse to̍h tsin khósioh loh!