《宋澤萊新著《天路拾穗》TOJ/台灣字版》 |
 |
 |
|
 轉寄 |
Tsútê 15："Paktó͘ ho͘khip honggiân（lênggí）kîtó huat" sī siáⁿmi̍h?
作者 Sòng Te̍klâi 2026.06.14
Tējī pō͘ Sènglêng Koànak
Tsútê 15："Paktó͘ ho͘khip honggiân（lênggí）kîtó huat" sī siáⁿmi̍h?
Góa bat siá tsi̍t phiⁿ kiòtsò “Sînkî ê honggiân（lênggí）kîtó ipēⁿ kì” ê bûntsiuⁿ, bat tah tī "Kitokkàu Thongsìn" blog ni̍h; hit phiⁿ bûntsiuⁿ ū hùtài suatbêng tsi̍t tsióng si̍tiōng sèng ê honggiân kîtó huat.
Itpuaⁿ lâi kóng, honggiân kîtó tsóng sī tsin tasò, nā m̄sī tāike tsūhōe tsòhóe, pítshú kó͘lē, lán tsin tsió lâng goān’ì tsò honggiân kîtó. To̍h sī hō͘ kakī goān’ì tanto̍k tsi̍tê lâng tsò honggiân kîtó, mā ē kámkak thiám, tshaputto pòaⁿ tiámtsing to̍h bô la̍t kohtsài kèsio̍k kîtó à. Só͘í lán tio̍h tshōe khòaⁿ tó tsi̍t tsióng píkàu khah khinsang ê honggiân kîtó huat, ētàng hō͘ lán bē kámkak thiám, siōng hó sī tsi̍t kang 24 tiámtsing kiâⁿ khiā tsē khùn sûisî lóng ētàng sihêng ê honggiân kîtó huat. Góa huatkiàn ū tsi̍t tsióng tsin līpiān ê honghuat, thang tī kiâⁿ khiā tsē khùn（sīmtsì kangtsok）ê sî, lóng ētàng khinsang tsò honggiân kîtó. Lán thang tshingtsò "paktó͘ ho͘khip honggiân kîtó huat".
"Paktó͘ ho͘khip" sī tsin tsē lâng lóng ēhiáu tsò ê, tsíiàu tshiùⁿ kòe kua ê lâng, lóng tsaiiáⁿ siáⁿmi̍h kiòtsò paktó͘ ho͘khip huat, iā to̍h sī ēng paktó͘ khiok m̄sī ēng hingkhám khòngtsè ho͘khip kah siaⁿliōng ê honghuat.
"Paktó͘ ho͘khip honggiân kîtó huat" ê honghuat sī：1, Sing tsò kúi ē paktó͘ ho͘khip; 2, Liáuāu tn̂gtn̂g khip tsi̍t kháu khùi（iáu mài tsò honggiân kîtó）; 3, Ûnûn'á thó͘khùi, tī thó͘khùi ê sî tsiah tsò honggiân kîtó, kā lí ê kîtó sû ûnûn'á phòeha̍p thó͘khùi kóng tshut lâi; 4, Liáuāu kohtsài tn̂gtn̂g khip tsi̍t kháu khùi（iáu mài tsò honggiân kîtó）; 5, Ûnûn'á thó͘khùi, tī thó͘khùi ê sî tsiah tsò honggiân kîtó, kā lí ê kîtó sû ûnûn'á phòeha̍p thó͘khùi kîtó tshut lâi ……. Ánne tsi̍t piàn koh tsi̍t piàn lâi tsò paktó͘ ho͘khip kah tsò honggiân kîtó. I ē hō͘ lí liāusióng bē kàu ê sóngkhoài kah hāukó.
I ê hāukó siōngtsió paukuat ēkha kúi tiám：
1) Thang kiâⁿ khiā tsē khùn lóng tsò honggiân kîtó;
2) Thang sùnkan to̍h pàngsang kakī, tsaiiáⁿ siáⁿmi̍h kiòtsò "tháupàng", mā tháupàng só͘ū siūⁿ beh hoāntsōe ê sim, pílūn kóng hùnnō͘, m̄ siàbián, oànhūn, tò͘khī, siâîm, okkháu, kíntiuⁿ, tshausim, bōngsióng ……ê tsêngsū;
3) Hō͘ lâng itti̍t siūⁿ beh tha̍k "sèngking";
4) Kámkak kah SiōngTsú tôngtsāi;
5) Tsaiiáⁿ "sìn góa ê lâng, to̍h kahná sèngking só͘ kóng ê, tùi i ê paklāi teh beh éng tshut ua̍htsúi ê kanghô." tsit kù ōe ê tsintsiàⁿ hâmì.
6) Pótshî hiate̍k ê hâmiông liōng, ū ua̍hle̍k. Khósioh tsin tsió lâng tsaiiáⁿ tsitê pìbi̍t!
──2021, 05, 30 tī Lo̍kkáng
