《宋澤萊新著《天路拾穗》TOJ/台灣字版》

 | | | 轉寄

Tsútê 14：Sînkî ê honggiân（lênggí）kîtó ipēⁿ kì

作者 Sòng Te̍klâi 2026.06.07

Tējī pō͘ Sènglêng Koànak
Tsútê 14：Sînkî ê honggiân（lênggí）kîtó ipēⁿ kì

Honggiân（lênggí）sī tsi̍t tsióng sînpì ê gígiân, sī SiōngTsú sing sù hō͘ lâng tsi̍t tsióng te̍ksû ê kháutsâi, liáuāu tsiah kóng tshut ê ōegí. I sī lâng kah SiōngTsú tsi kan kauliû ê gígiân, kóng ê lâng bô ittēng ētàng oântsoân líkái i púnlâng só͘ kóng ê gígiân ìsù, m̄koh SiōngTsú khiok thang líkái, lāibīn tōapō͘hūn lóng sī tùi SiōngTsú ê oló kah kèngpài. K íking ū tsin tsē nî bô tsò liânsòa pòaⁿ kang á sī tsi̍t kang ê honggiân kîtó à. Tsit tsūn’á, singkhu ê thiàⁿthàng teh kā i khùnjiáu …….

Tsi̍t lépài tsêng, K hiônghiông siūⁿ tio̍h ingkai tiôngsin tsò kóa honggiân kîtó. Tsiū ánne tī tiongtàu, K kiâⁿ tshutmn̂g, khì hùkīn ê Lo̍kkáng tìn li̍p ūntōngtiûⁿ kiâⁿkiâⁿ leh, siōng bóe tshōe tio̍h lō͘piⁿ ê tsi̍t king Tsoânke Piānlī tiàm, i tī têng’á kha ê tsi̍t tiuⁿ sió polê toh tsêng tsē lo̍h lâi, kā Bíkok honggiân kîtó ka Kam Kiansìn （Kenneth E. Hagin）ê tsi̍t pún tsheh "Honggiân" phahkhui, ná khòaⁿ tsheh, ná tsò honggiân kîtó. Inūi honggiân kîtó bô suiàu ēng tio̍h tōanáu sukhó, tsísī tsi̍t tsióng tansûn ê kháuthâu kîtó tōngtsok, só͘í ētàng teh khòaⁿ tsheh ê sî mā tsoh honggiân kîtó, sīmtsì tsò tsin tsē kasū ê sî, lóng thang lâi phòeha̍p tsò honggiân kîtó, si̍ttsāi sī tsin hongpiān ê tsi̍t tsióng kîtó. I tsit pái te̍kpia̍t kā kîtó tōngtsok ap kē tī hoâiⁿkehmo̍͘h íhā, iā to̍h sī sú'iōng itpuaⁿ lâng só͘ kóng ê "pak sik ho͘khip huat", khaisí tsò kîtó. Inūi tsitê ūntōngtiûⁿ khu, tshutji̍p piānlī tiàm ê lâng bô tsē, i tsē tī hia, bô lâng kansia̍p kiáujiáu, honggiân kóng kah tsin liúlia̍h, ná tshintshiūⁿ tsi̍tê gōakok ê sinbûn hòngsàng thâu, ti̍tti̍t kóng tshut sioliân sòa ê ōegí, gígiân piànsêng tsi̍t tsióng iubí ê ga̍kim, tī i ê tshùi ni̍h teh hiángtōng, tsìntōng i ê singkhu, tòa lâi kuiê singkhu lāipō͘ ê tháupàng, putti-putkak huatkiàn i khòaⁿliáu 50 ia̍h ê tsheh, íking kîtó tsi̍t tiámtsing. Tsit sî i mā huatkiàn, āmkún kah khatsiahphiaⁿ ê thiàⁿ（he sī inūi khòaⁿ siuⁿ tsē ê tiānsī kah sú'iōng tiānnáu phah jī só͘ tòa lâi ê thiàⁿthàng）kiámkhin tsin tsē, sīmtsì tshiúkó͘thâu kah tōathúi ê sngthiàⁿ lóng phahm̄kiàn khì. I kámkak huisiông sînkî! Tsi̍tê Mô͘kúi ê siaⁿim kahná teh khausé i kóng, "Honggiân kîtó sī bô huattō͘ i pēⁿ, lí thiàⁿthàng ê kiámkhin kah honggiân kîtó bô kuanhē, he tsísī inūi lí kin'áji̍t khùn khah pá, tsingsîn hó ê iânkò͘!"

K thiaⁿ Mô͘kúi ê siaⁿim, kámkak tsin bô huaⁿhí, to̍h tùi i kóng, "Pêngiú, lí kóng tio̍h tsi̍tpòaⁿ, bô m̄ tio̍h, góa kin'áji̍t sī khùn píkàu khah pá, m̄koh iáu bē tìkàu kiámkhin góa singkhu ê thiàⁿthàng; inūi tútú góa iáubōe tsoh honggiân kîtó ê sî, singkhu iáu sī thiàⁿthàng ê. Tsèngkhak ê goânin sī tsitmá tsò kîtó, singkhu tsiah kámkak píkàu khah bē thiàⁿ!"

Mô͘kúi ê siaⁿim koh kóng, "Góa m̄ siongsìn!" K tshiò khí lâi, kóng, "Hó, ánne góa to̍h koh tsò tsi̍t tiámtsing ê honggiân kîtó! Tse sī Kam Kiansìn siansiⁿ kà góa ê."

K tsiū ánne tsiūkīn toh'á, koh tsò tsi̍t tiámtsing ê honggiân kîtó, kámkak koh khah khinsang, thiàⁿ koh kiám kē tsin tsē. Mô͘kúi koh kóng, "Suijiân sī kiámkhin, lí iáu sī ētàng kámkak singkhu ê thiàⁿ kám m̄sī? Kiámtshái sī tsiāmsî ê jîí." K thiaⁿliáu koh tshiò khí lâi, to̍h kóng, "Lí kìjiân ánne kóng, góa to̍h kohtsài kèsio̍k tsò honggiân kîtó." K tsiū ánne kā tsheh ha̍p khí lâi, līkhui toh’á, tī ūntōngtiûⁿ ê pō͘tō kiâⁿkiâⁿ koh tsē tsē leh, kèsio̍k honggiân kîtó.

I ê kîtó koh khah liúlia̍h, ná tshintshiūⁿ tsi̍t tsióng tsúitshiâng ê siaⁿim, tsìntōng i ê kui singkhu, piàⁿkhang singkhu, hō͘ i kahná sitkhì singkhu, paktó͘ kahná piànsêng teh tsò tōatsúi, bô thêng hiòng téngkoân éng khí lí, tōatsúi ni̍h ū Iésu kah Sènglêng ê hêngiáⁿ. I kámkak Iésu kah Sènglêng to̍h tī i ê lāibīn, kah i tôngtsāi.

Putti-putkak, ji̍t lo̍h sai suaⁿ, i kèngjiân tahtah koh kîtó saⁿ tiámtsing, tsingsîn koh khah ōng.

Liáuāu, i liânsòa kîtó saⁿ kang, só͘ū ê thiàⁿthàng lóng phahm̄kiàn khì, singkhu ióngtsòng khí lâi, kámkak khantîⁿ tī sintsiūⁿ ê Mô͘kúi lóng siausit, sinsim khongtsiân ê tháupàng! Tsahng, ū tsi̍tê kàuhōe khà tiānōe hō͘ K, kiò K khì tshamka in Pài sì ê siótso͘ tsūhōe, i huaⁿhí tapèng.

Tse sī tsi̍tê ū pehê lâng ê sèsè tsūhōe, lāibīn ū tsi̍tê siótsiá tsingsîn théla̍t bô hó, kóng sī tsòikīn ū tsin tsē hō͘ i kámkak kíntiuⁿ, bē sóngkhoài ê tāitsì huatsing. Tī tsūhōe āu, K kā i kóng tsi̍tê pak sik ho͘khip ê honggiân kîtó pìkuat, K kóng, "Sing tn̂gtn̂g khip tsi̍t kháu khùi, sing mài kîtó; liáuāu bānbān'á thó͘khùi, tsi̍tbīn thó͘khùi tsi̍tbīn kîtó, itti̍t kā khùi thò͘ oân, honggiân kîtó sû mā tsiāmsî kóng suah. Liáuāu kohtsài khip tsi̍t kháu khùi, sing mài kîtó; liáuāu bānbān'á thó͘khùi, tsi̍tbīn thó͘khùi tsi̍tbīn kîtó, itti̍t kā khùi thò͘ oân, honggiân kîtó sû tsiāmsî mā kóng suah……ánne hoánhok tsò lo̍h khì. Tsingsîn théla̍t to̍h ē tsiāmtsiām piàn hó!"
──2021, 03, 26 tī Lo̍kkáng