《宋澤萊新著《天路拾穗》TOJ/台灣字版》 |
 |
 |
|
 轉寄 |
Tsútê 18：Kámkak kahná tī thiantông ni̍h kîtó sī ántsóaⁿ tsi̍t hôesū?（ji̍tkì saⁿ tsik）
作者 Sòng Te̍klâi 2026.07.05
Tējī pō͘ Sènglêng Koànak
Tsútê 18：Kámkak kahná tī thiantông ni̍h kîtó sī ántsóaⁿ tsi̍t hôesū?（ji̍tkì saⁿ tsik）
Jī Gue̍h tshe 3：
Kin'áji̍t tsò tsi̍t tiám gōa tsing ê honggiân kîtó, kàu ēpo͘ ê sî, ūi tio̍h Jī Gue̍h tshe 7 beh tī Tâipak Tsēlâm Kàuhōe ê tsi̍t tiûⁿ iánkáng tsò tsúnpī, tsiāmthêng kîtó. M̄koh hutjiân kámkak simlêng ni̍h ê sīkak tōa khui, tsìntsêng só͘ū jiakhàm tī thâutsêng ê mi̍hkiāⁿ lóng pī sóa khui ā, tsi̍tê tsin khuah bô piⁿkài ê sèkài tshuthiān, kahná liâmpiⁿ khílâi kàu bôhān kiongtshong ê thiantông, khuah bóngbóng, jîtshiáⁿ khiā tī SiōngTsú ê bīntsêng; inūi ánne koh kèsio̍k tsò tsi̍t tōaⁿ sîkan ê honggiân kîtó, iáu sī huatkiàn kahná to̍h tī tsinsi̍t ê thiantông kah tī SiōngTsú bīntsêng teh tsò kîtó! Tsìntsêng m̄sī ánne. Tsìntsêng tsò kîtó ê sî tsóng sī kámkak sī tī kēé ê jînsèkan hiòng iâuoán thiantông ê SiōngTsú teh kîtó, kámkak beh hō͘ SiōngTsú thiaⁿ tio̍h kakī ê kîtó tsin khùnlān, ittēng tio̍h kingkòe Iésu á sī Sènglêng ê thoânta̍t á sī tsoánkò, SiōngTsú tsiah ē thiaⁿ tio̍h. Tsitm á bô kângkhoán loh, kîtó ê sî kahná sûisî kàu thiantông, to̍h khiā tī SiōngTsú bīntsêng teh tsò kîtó, tsit tiám hō͘ kakī kámkak tsin kiaⁿhiâⁿ giâugî!
Jī Gue̍h tshe 4：
Kin'áji̍t ê kîtó kah tsahng kângkhoán, To̍h kahná sûisî kàu thiantông, lâi kàu SiōngTsú ê bīntsêng tsò kîtó. Jîtshiáⁿ huatkiàn kakī ê honggiân kîtó koh khah liúlia̍h, khoàisok, ū la̍t. Āu lâi koh huatkiàn, ēng ngó͘sèng kîtó（itpuaⁿ ê gígiân kîtó）mā sī kângkhoán, tāising mā sī huatkiàn kahná sûisî lâi kàu thiantông, sòatsiap mā huatkiàn kahná tī SiōngTsú bīntsêng kîtó. Honggiân kîtó ipēⁿ tsuanka Dave Roberson bo̍ksu tī i tînsu̍t honggiân kîtó òpì ê tsheh “Kiâⁿ tī Sènglêng ni̍h ─ kiâⁿ tī tōa lêng ni̍h” ni̍h kóng, “Tng lán ūi tio̍h tsōtsiū kakī, khaisí ēng honggiân kîtó, to̍h tsìnji̍p tsi̍tê sèngkiat ê 'lāi sik', hō͘ lán têngthâu seⁿ, tsàitsō kah Iésu Kitok tsòhóe tsē tī thiⁿténg ê lêng, mā kah SiōngTsú kakī tsòhóe tī sînsèng ê kauthong ni̍h. Tse sī kòjîn ê kauthong, mā sī sèngkiat ê kauliû, Mô͘kúi bô huattō͘ tsìnji̍p hia." Tsitê huatkiàn huisiông liáuputkhí, inūi i huathiān honggiân kîtó sî ê tsi̍t tiâu sînsèng ê koántō ē phah thong, liáuāu kah Samūi-Ιtthé ê saⁿ ūi tsòhóe tī hongpì ê koántō ni̍h, góa tsìntsêng iā bat ū tsit tsióng kámkak; tng Dave Roberson siátsok “Kiâⁿ tī Sènglêng ni̍h ─ kiâⁿ tī tōa lêng ni̍h" ê sî, mā íking tsò bo̍ktsiá 25 nî, mā ū kóng 25 nî ísiōng ê honggiân. M̄koh tsitmá góa só͘ huatkiàn ê sī, tng lán tsò honggiân kîtó ê sî, ū tsi̍t kang ē tshuthiān tsi̍t tsióng tsōnghóng, tāising sī huatkiàn kahná sûisî lâi kàu khuah bóngbóng ê thiantông, sòatsiap huatkiàn kahná tī SiōngTsú bīntsêng kîtó; jîtshiáⁿ liáuāu suijiân ēng ngó͘sèng kîtó（itpuaⁿ ê gígiân kîtó）mā huathiān kângkhoán ê tsōnghóng. Ōaⁿ kù ōe lâi kóng ̄, honggiân kîtó ētàng tsōtsiū lán lâi kàu tsi̍t tsióng kéngkài, nā lán tsò jīmhô gígiân kîtó ê sî, ētàng sûisî huatkiàn kakī kahná lâi kàu bôhān kiongtshong ê thiantông, liáuāu to̍h tī SiōngTsú ê bīntsêng kîtó, koh khah ti̍ttsiap, koh khah tshiauua̍t, tsitê huatkiàn hō͘ góa kámkak bôhān ê phutphuttiô!
Jī Gue̍h tshe 5： Tsa mê tsò tsi̍tê ībāng, góa huatkiàn bāngni̍h tshuthiān tsi̍t tiuⁿ kahná sī tshiam si ê mi̍hkiāⁿ, tē it ōikù siá, "Lí só͘ū ê tsōe lóng pī siàbián à!" Sòatsiap khòaⁿ lo̍h khì, khiok būbū bô tshing, khòaⁿ bē tshingtshó. Góa sûisî tshéⁿ khí lâi, tsaiiáⁿ sī SiōngTsú tùi góa ê hôetap. Inūi tsêngji̍t kakī tsò tsi̍t kiāⁿ simlāi kámkak ū tsōe ê tāitsì, lâi hiòng SiōngTsú tshàmhóe; tôngsî mā ūi kakī tsitmá íking sòngsit ê 20 kúi hòe sî ê tsûpi sim, kámkak bānpuaⁿ hiōhóe, siūⁿ bē kàu kakī tsitmá kèngjiân piàn kah ánne, kámkak tsitmá ê kakī ua̍h kah ke̍k tshintshiūⁿ sitkhì só͘ū thiàⁿsim ê kiangsi, bâpì khì à! Kin'áji̍t mā khì kiâⁿ Oânlîm ê Tînsuaⁿ pō͘tō, huatkiàn kòikhì só͘ū ê simlêng ni̍h ê kok tsióng tsó͘gāi lóng pī sóa tsáu, in lóng pī sóa khì kàu sin gōa ê sèkài, to̍h bētàng tsó͘tòng. Tsìntsêng simlêng ni̍h tsóng sī ū tsi̍tlō͘ lúitsik sò͘ tsa̍p nî ê tsióngtsióng tsiònggāi kah tshòtsiat tī sìkho͘ûi, siôngsè kā in tshingtiám, lóng sī uansiû lâng kah sū（iā to̍h sī íking tiktsōe kòe góa á sī bīlâi kiámtshái ē tiktsōe góa ê lâng kah sū）, kā kakī ba̍t tsiuhtsiuh ûikhùn tiâu leh, lāibīn sīmtsì paukuat kakī ê tsìtshin; jîtshiáⁿ lúitsik ê sò͘liōng jú lâi jú tsē, tsin ohtit hūtam. Inūi ánne, kah sìkho͘ûi khoânkéng ê tùili̍p, suah tiāⁿtiāⁿ bôiân-bôkò͘ khòaⁿ khí lâi tsin koân koh hàm, aple̍k tsin tōa. Bêngbêng tsaiiáⁿ tse sī kakī khó͘náu, hùnnō͘, oànhūn, kíntiuⁿ, tshausim, uttsut, tiûtû ……ê lâigoân, khiok m̄tsai ingkai ántsóaⁿ sī hó. Tsitmá tsiahê lóng pī sóa tsáu ā, gántsiân kah sìkho͘ûi lóng bûtsó͘ gāi, sī tī tsi̍tê kngkng ê khiânkhun tsi hā, khuah bóngbóng, simlāi huisiông pêngan, kahná lâng sī tī thiantông.
"Pêngan"tsitê sû ê Inggí sī peace, iā to̍h sī hôpêng ê ìsù. Tsitmá kakī koh khah tsaiiáⁿ tsitê sû ê hâmì, goânlâi sī teh tsí"lênghûn ni̍h bô siûte̍k"ê ìsù, mā tsaiiáⁿ sī ántsóaⁿ "sèngking" itti̍t khah kiông tiāu"goânliōng lí ê siûjîn"kah"siàbián pa̍tlâng"ê goânin; inūi tûhui ánne tsò, lán ê simlāi to̍h bô pêngan! tse sī honggiân kîtó só͘ tòa lâi ê hāukó tsi it, te̍kpia̍t kā i kìlo̍k lo̍hlâi.
──2023, 02, 08 tah tī "Kitokkàu Thongsìn"
