《宋澤萊新著《天路拾穗》TOJ/台灣字版》

 | | | 轉寄

Tsútê 19：Honggiân ínkhí sînjiah itī lio̍ktâm（ji̍tkì gō͘ tsik）

作者 Sòng Te̍klâi 2026.07.12

Tējī pō͘ Sènglêng Koànak

Tsútê 19：Honggiân ínkhí sînjiah itī lio̍ktâm（ji̍tkì gō͘ tsik）

Saⁿ Gue̍h 23：
Tsūtsiông kūnî bóe, kuattēng ta̍k kang tsìtsió kîtó 2 tiámtsing, liânsòa kîtó 3, 4 kògue̍h liáuāu, honggiân kîtó piànsêng tsi̍t tiûⁿ malásóng tsáupio písài, ji̍ttsí ni̍h tsóng sī itti̍t kóng honggiân, ūsî si̍ttsāi tsin bôliâu, hō͘ góa kámkak kahná tńglâi siàuliân sî tshamsiân ê siàuliân sòegua̍t, itti̍t tsham kongàn, kā tsháu pīⁿ ê tsē tsū’á lóng tsē kah phòa khì. Tsitmá tsiah sī tsē tī í'á téng teh kîtó, ūtangsî'á khiā khílâi kiâⁿkiâⁿ leh, í'á lóng kiông beh tsē pháiⁿ khì. M̄koh to̍h sī ē tsìnpō͘, singkhu jú lâi jú ióngtsòng, lênghûn jú lâi jú kongkiông, tsi̍tkóa pēⁿ tsiū ánne bo̍kbêng-kîbiāu to̍h hó khì.

Ēkha sī Tâioân bûnha̍kka Gô͘ Kímhuat tī bīntsheh só͘ siá ê honggiân kîtó ê konghāu：

"Siusêng tsin tōa. Tsòikīn nn̄g pái singkhu kiānkhong kiámtsa mā tshuthiān kahná kîtsik sū ê ho̍kgoân, sán 11 kongkin, tsin tsē sei jīnûi bô siáⁿ khólêng káipiàn ê tsísò͘ lóng káipiàn à, simtsōng konglêng mā tsin hó à. Thn̂g jiō, saⁿ koân tsoânpō͘ hôeho̍k tsèngsiông tsi̍t nî pòaⁿ à, hō͘ ising lia̍ttsò bô͘hoān sêngkong ê ànlē; m̄koh i m̄tsai góa ta̍k kang kîtó, honggiân kîkiû, līkhui tsheh toh hn̄ghn̄g, ûnûn'á kiâⁿ, lêngmiā khésī…… téngténg ê tāitsì, góa mā bô kā i kóng. Simtsōng pānmo̍͘h thíkhui e̍h hòa ê būntê, mā tùi e̍h hòa kàu 0.65 konghun thí khui kàu O.75, kàu saⁿ kògue̍h tsêng tsò kiámtsa, kohtsài thí khui kàu 1 konghun, kèsio̍k óng hó honghiòng tsìntián!"

Saⁿ Gue̍h 24：
Tsintsiàⁿ tsin hótshiò, kahná ittēng tio̍h piànsêng bûnke-khíbú ê Tsó͘ Te̍k, , khîn liān honggiân.

Tsêngji̍t（22 ji̍t）àmsî Khó͘ kàusiū khà tiānōe hō͘ góa, kóng i tòe iáⁿphìⁿ ni̍h ê siótsiá o̍h honggiân, íking ēhiáu kóng kúiê sû à. Liáuāu góa kiò i kā "Halélú'iah" liām kín koh tōasiaⁿ, i sûisî to̍h kóng tshut 10 kúi huntsing kú ê sio liânsòa tsi̍h im honggiân, tsintsiàⁿ līhāi! Khó͘ kàusiū kohtsài kúi kang beh khì tshiúsu̍t, SiōngTsú hō͘ i ánne tsi̍tê tsiokhok.

Saⁿ Gue̍h 24
Ētàng kóng honggiân mā bô lō͘ēng, tsi̍t kang tsíū kóng kúi huntsing kinpún tsísī teh anùi kakī! Sèkài siōng sìkè lóng ū lâng ēhiáu kóng honggiân, ētàng siu tio̍h hāukó ê lâng khiok tsin tsió tsin tsió! Ittēng tio̍h ū kèōe sèng ta̍k kang lóng tsò 1~2 tiámtsing ê honggiân kîtó, liânsòa 1 kàu 3 kògue̍h, tsit tsióng to̍h ē sánsing tōa ê hāukó! Honggiân kîtó ê sî to̍h sī kah Sènglêng tsòhóe, tsi̍t tiámtsing tsi̍t tiámtsing lúitsik, tsiktsū lêngliōng, siōng bóe sìnsim to̍h ē thêko kàu tsi̍tê koântō͘（tsù: tse sī kuankiàn tiám）, kiâⁿtshut kîsū, só͘í tongjiân sī kîtó sîkan tsē ê lâng khah ū iâⁿbīn! Tsit tiám kèngjiân tsin tsió lâng tsaiiáⁿ.

Saⁿ Gue̍h 25
Kin'áji̍t thàutsá khítshn̂g, tī 7 tiám ê sî sáitshia kàu Lo̍kkáng Bûnkàu Tiongsim āubīn khàngtē ê pō͘tō, kā tshia thêng lo̍h lâi, tshiū ńg sôe lo̍h lâi, tsa̍h tòng ji̍tthâu kng, ū tsin tsē tsá khítshn̂g ê lâng tī tsit tài sànpō͘. Tsìntsêng tsia sī tsi̍t phiàn bōng'ápo͘, tsòikīn khaipi̍t tsiâⁿtsò tsi̍t phiàn tsin tōa ê konghn̂g, kó͘kè bô gōa kú tiāⁿtio̍h láu'á tshù itti̍t khí, tsi̍t phiàn hoânêng. Ua̍h leh ê āutāi kah kòeóng ê tsó͘sian siotseⁿ thó͘tē, kàu siōng bóe tsóng sī ua̍h leh ê āutāi sènglī, tse kahná to̍h sī thihlu̍t!

Tsē tī tshiani̍h, khaisí honggiân kîtó tsi̍t tiámtsing. Tsìntsêng tûhui pitiàu tn̂gtô͘ sái tshia, bô siáⁿ káⁿ kútn̂g tsē tī tshia lāi, inūi kē é ê phôe í'á ē appik tio̍h ēpak, koh khah appik tio̍h tséng tōa ê liaphō͘sòaⁿ, kàu siōng bóe tsóng sī thiàⁿ. Tsitmá m̄ kiaⁿ ā, inūi nn̄g kògue̍h thâutsêng ê honggiân kîtó ū tòa lâi tōa sìnsim（tsù：tse sī kuankiàn tiám）, kèngjiân kakī hōaⁿtshiú tī tséng tōa ê liaphō͘sòaⁿ téngbīn 5 huntsing, hitê tséng tōa ê liaphō͘sòaⁿ kahná làukhùi ê phôe kiû, tòa sèsè ê kuhkuh siaⁿ, itti̍t siau lo̍h khì, liáuāu bô koh tséng tōa, mā bô koh thiàⁿ, tsitmá tsōnghóng tsiàusiông tsin hó, íking káⁿ sok ân iotòa 2 kògue̍h, góa jīnûi tsá to̍h tit tio̍h i hó à. Ēkìtit tongsî ê kîtó sû sī ánne, "Hōng Iésu ê miâ, góa kiônglia̍t iaukiû ū bô phòapēⁿ ê khoânlī, mā kiônglia̍t kéngkò tîⁿ tiâu tī liaphō͘sòaⁿ ê siâlêng kah pēⁿmô͘ līkhui góa ê singkhu ! Nā sī m̄ līkhui, siósim tēga̍k ê iāmhóe teh beh sio tio̍h lín! Tshutkhì! Tshutkhì! tshutkhì!" Siōng bóe hit saⁿ siaⁿ "tshutkhì!" huah kah te̍kpia̍t tōasiaⁿ, kahná pòsiû thâi te̍kjîn, ū tsi̍t tiám'á siáukông, khiok tsin thiòng; khókiàn tsitê tn̂gkî tsûntsāi ê katso̍k kútn̂g pēⁿ gōani̍h'á hō͘ lâng thònghūn!

Saⁿ Gue̍h 26
Ēpo͘ 3 tiám khì hônghun tshītiûⁿ bé tshài, kīlî tsú àmtǹg iáu ū tsi̍t tōaⁿ sîkan, uat kàu tìn li̍p ūntōngtiûⁿ, tsúnpī koh tsò pòaⁿ tiámtsing ê honggiân kîtó. Peh khílí saⁿtsàn lâu koân ê tōa koh khuah bóngbóng ê kuantsiòng khòaⁿ tâi’á téng, sìkho͘ûi bô lâng. Tī tsitê koânkoân ê tâi’á téng, ētàng hn̄ghn̄g khòaⁿ tio̍h se̍h tī gántsiân liântsiap tio̍h thiⁿpiⁿ sìkè khí ê koân lâu tāihā, mā ētàng àⁿthâu khòaⁿ pauûi ūntōngtiûⁿ ê tōaphìⁿ sin tsèng ê le̍k tshiū'á, hutjiân tsi̍tsî kámkak sóng sîn.

Tī khòaⁿtâi ê tsi̍tê kaklo̍h, phahkhui tshiúki ê iáⁿphìⁿ, khaisí kah iáⁿphìⁿ ni̍h ê siótsiá písài honggiân kîtó, kámkak suijiân bô huattō͘ iâⁿkòe i, khiok mā bē tìsú su tsin tsē. Lō͘bóe kîtó to̍h piànsêng tsūtōng hòa, thêng bē lo̍h lâi, kèngjiân tshiaukòe sîkan, tahtah kîtó tsi̍t tiám gōa tsing.
── 2023, 03, 07 tah tī "Kitokkàu Thongsìn"