《宋澤萊新著《天路拾穗》TOJ/台灣字版》

 | | | 轉寄

Tsútê 21：Siāukài honggiân（lênggí）kîtó tōa tsheh “Kiâⁿ tī lêng ni̍h ─ Kiâⁿ tī tōa lêng ni̍h"

作者 Sòng Te̍klâi 2026.07.26

Tsútê 21：Siāukài honggiân（lênggí）kîtó tōa tsheh “Kiâⁿ tī lêng ni̍h ─ Kiâⁿ tī tōa lêng ni̍h"

Tō͘ Khèngsêng：Góa khòaⁿ Pêⁿ Ioksik bo̍ksu ê iáⁿphìⁿ, i kiàngī honggiân（lênggí）kîtó liáuāu, antsēng tsi̍t tōaⁿ sîkan, SiōngTsú ē siúⁿsù ōegí. Góa tú kàu hāuhn̂g honggiân kîtó, siōng tsúiàu ê ūi tio̍h tsukeh khó, Tâioân Bûnha̍k Ha̍khōe kah tsi̍tkóa kòjîn ê tāitsì. Nā góa tsēngtsē koh kîkiû SiōngTsú siúⁿsù ōegí, bô kàu saⁿ huntsing, náuhái tiong to̍h phû tshut "sèngking” kingbûn, tshintshiūⁿ, lí tio̍h tsuansim óakhò SiōngTsú, I ittēng sêngtsiū lí só͘ kiû só͘ siūⁿ ê tāitsì; jīnbat SiōngTsú sī tìhūi ê khaituan téngténg. Tshiáⁿ mn̄g lāusu, tse kám to̍h sī SiōngTsú beh kā góa kóng ê ōegí? Honggiân kîtó tsi̍t tōaⁿ sîkan liáuāu, tsin bênghián ê, góa éngkòe tsin kipsò, phahkiatkhiû ê kòsèng, tit tio̍h siongtong thêngtō͘ ê káisiān, mā tsin tsió huat phîkhì. Tosiā lāusu, hō͘ góa liáukái honggiân kîtó ê òpì.

Sòng Te̍klâi：Iúkuan àⁿ hīⁿkhang thiaⁿ SiōngTsú só͘ sù ê ōegí ingkai sī kah ībāng, īsiōng kâng tsi̍tê hoānûi, sī sio̍k tī tsiósò͘ lâng ê te̍ksû tsâilêng, Pêⁿ Ioksik khólêng to̍h sī tsit tsióng lâng, i bô sio̍k tī kóng honggiân tsit tsióng tōatosò͘ lâng phó͘phiàn insù ê hoānûi. Kóng honggiân tùi thêko àⁿ hīⁿkhang thiaⁿ SiōngTsú ê ōegí ê lêngle̍k khólêng m̄sī tsin tōa, ná tshintshiūⁿ góa tsitmá suijiân píkàu khah piàⁿsì tsò honggiân kîtó, m̄koh pēng bô huatkiàn góa ê ībāng kah īsiōng ū tsingka ê hiānsiōng. Lióngtsiá kipún siōng tsìnhêng tī tsin bôkâng ê tsêngkéng tiâukiāⁿ hā.

Kóng honggiân ê tsuanka Dave Roberson tī ”Kiâⁿ tī lêng ni̍h ─ Kiâⁿ tī tōa lêng ni̍h " tsit pún tsheh ni̍h kā sìntô͘ kóng m̄thang àⁿ hīⁿkhang thiaⁿ SiōngTsú ê ōe, i itsing kantaⁿ ū tsi̍t pái thiaⁿkòe SiōngTsú kā i kóngōe, i kah SiōngTsú kauthong ê koántō tûliáu kóng honggiân ígōa, lóng sī īsiōng, ībāng píkàu khah tsē; kiámtshái i jīnûi àⁿ hīⁿkhang thiaⁿ SiōngTsú ê ōegí píkàu khah iông’ī tìsú tshòkak. Góa mā kantaⁿ ū tsi̍t pái píkàu khah sǹg sī lênggiām ê, tongsî ū thiaⁿ tio̍h SiōngTsú hō͘ góa bó͘ lâng ê miâ, āu lâi góa khì tshōe hit ê lâng, tāitsì tsiū káikuat, kîtha pēng bô thiaⁿkòe SiōngTsú bat hō͘ góa siáⁿmi̍h lênggiām ê ōegí, góa kah SiōngTsú kauthong ê koántō tûliáu honggiân kîtó ígōa, tōapō͘hūn sī ībāng, tī "Kitokkàu Thongsìn" ni̍h lí thang khòaⁿ tio̍h góa siá tsin tsē ībāng, lóng tsin ua̍hthiàu tsúnkhak.

Ētàng thiaⁿ tio̍h SiōngTsú ê ōe sī tsi̍t tsióng te̍ksû ê insù, thiaⁿ kóng ētàng ka hùnliān lâi ka kakiông. Kinkì góa só͘ tsai, Tâitiong ū bó͘ tsi̍tê kàuhōe tsuanbûn hùnliān sìntô͘ ántsóaⁿ ētàng thiaⁿ tio̍h SiōngTsú ê ōegí; góa ū pêngiú tshamka hùnliān, mā iautshiáⁿ góa tshamka, m̄koh góa bô sîkan, só͘í tsiū bô khì, tsin khósioh; góa siūⁿ kiámtshái he sī tsi̍t mn̂g tsin tsuanbûn ê ha̍kbūn. Lí kóng honggiân liáuāu ē píkàu khah pêngtsēng, si̍ttsāi tio̍h kā lí kionghí, tse tùi singua̍h huisiông iúik. Góa sī tiāⁿtiāⁿ kámkak kahná thâutsêng ê tsiònggāi jiakhàm bô khì, ētàng ti̍ttsiap bīntùi SiōngTsú kóngōe kângkhoán.

Kóng honggiân ê òpì ittēng tio̍h khòaⁿ honggiân tsuanka Tabi̍t Robertson ê “Kiâⁿ tī lêng ni̍h ─ Kiâⁿ tī tōa lêng ni̍h" tsit pún tōa tsheh! Tsit pún tsheh sǹg sī tâm honggiân òpì kah ántsóaⁿ tshauliān honggiân ê tsuan tsheh, lāibīn tùi tī kóng honggiân tsit hāng tāitsì ū huisiông tshimji̍p ê lūnsu̍t kah tsítō. Kóng tio̍h bo̍ktsêng, tsoânkiû tāikhài ū 2,000 bān lâng ēhiáu kóng honggiân, m̄koh góa kó͘kè tāikhài ū 9 siâⁿ ísiōng ê lâng bô tit tio̍h gōa tōa ê līik. Goânin tsāi tī ētàng kóng honggiân sī tsi̍t kiāⁿ tsin kántan ê tāitsì, kúi huntsing tsiū ēhiáu à; khùnlân ê sī tī tshauliān siōng. Kóng honggiân ittēng tio̍h ta̍k kang ēng nn̄g tiámtsing ísiōng ê sîkan khì tshauliān, liânsòa tsi̍t kàu saⁿ kògue̍h tsiah ētàng sánsing tōa sìnsim kah sînjiah, ta̍k kang kóng kúi huntsing ê honggiân sī bē ū siáⁿmi̍h tōa hāukó ê. Tabi̍t Robertson ê “Kiâⁿ tī lêng ni̍h ─ Kiâⁿ tī tōa lêng ni̍h" tsit pún tsheh ūi lán phahkhui ántsóaⁿ tshauliān honggiân ê honghuat, mā kóng tio̍h tsióngtsióng putkhó-sugī ê sînjiah. Góa jīnûi Tabi̍t Robertson ê kiaⁿlâng sînjiah sī ētàng ho̍ktsè ê, kuankiàn tiám tsāi tī íking ēhiáu kóng honggiân ê lâng sī m̄sī goān’ì kah i kângkhoán, bih tī sió pângking, liânsòa saⁿ kògue̍h kui kang tsò honggiân kîtó; nā ētàng, ingkai sī jīmhô lâng lóng khólêng kingle̍k tio̍h kah i kângkhoán koântō͘ ê sînjiah.

Siūⁿ beh ua̍ttho̍k tsit pún tsheh ê lâng, tshiáⁿ tiám ēkha bāngtsí, ētàng biánhùi ua̍ttho̍k, Http://www.daveroberson.org/....../WOSWOP......

Siūⁿ beh bé tsit pún tsheh ê lâng, tshiáⁿ tiám ēkha Sūimá tshutpánsiā ê bāngtsí, tsi̍t pún siūkè 250 kho͘, Https://www.rhemapublishing.com/books/4100.html

──2023, 03, 25 tah tī "Kitokkàu Thongsìn"