《宋澤萊新著《天路拾穗》TOJ/台灣字版》

 | | | 轉寄

Tsútê 20：Siūⁿ beh kiò "sílâng khiā khí lâi" ê kiaⁿkî thégiām

作者 Sòng Te̍klâi 2026.07.19

Tējī pō͘ Sènglêng Koànak
Tsútê 20：Siūⁿ beh kiò "sílâng khiā khí lâi" ê kiaⁿkî thégiām 　　
Góa beh kóng tsi̍tê tsinsi̍t ê kò͘sū. Tsit hāng tāitsì ingkai sī huatsing tī 2023 nî Tsiaⁿ Gue̍h. 　　　　

Ū tsi̍tê lâng tùi 2022 nîté óakīn kòenî ê sî, hē kuatsim ta̍k kang tsìtsió beh tsò 2 tiámtsing ê honggiân（lênggí）kîtó, jîtshiáⁿ tsìtsió ài liânsòa saⁿ kògue̍h ánne tsò. Tú khaisí tsitê lâng to̍h huisiông jīntsin, bôlūn ji̍tsîthâu á sī àmsî, ū sîkan to̍h kîtó, kiatkó tsi̍t kang kîtó ê sîkan ka khílâi sǹg, huisiông khókuan, óngóng ū 3~4 tiámtsing hiah tsē. Tsit tōaⁿ tn̂gkî ê kîtó tī Sì Gue̍h té tsiongtsí, sǹgsǹg leh tsóngkiōng ū sì kògue̍h kú. 　　
Kiámtshái sī tsit tsióng liânsòa sèng ê honggiân kîtó ētàng hō͘ lâng tsìnji̍p kah Sènglêng tôngtsāi ê tshimtsân tētài, sîsiông ē tòa lâi bó͘ tsi̍tkóa liāusióng bē kàu ê sînjiah. Pílūn lâi kóng, tī tsit sì kògue̍h lāi, ū tsin tsē bat kah m̄bat ê pêngiú itti̍t lâi Lo̍kkáng tshōe i, in iaukiû i kà in kóng honggiân, tsitê lâng mā bô kītsua̍t kòe in, hoānnā tsiânlâi ê lâng, tshaputto ū peh siâⁿ ê lâng lóng tī 10 huntsing lāi to̍h kóng tshut honggiân, tsìtsió ētàng kóng tshut tan imtsat ê honggiân. Ū tsi̍tkóa siàuliânlâng kinpún bô suiàu ke kà in siáⁿmi̍h, tsi̍t tsē tī i ê bīntsêng, to̍h sûisî kóng tshut sio liânsòa huisiông liúlia̍h tōasiaⁿ ê honggiân, tsintsiàⁿ sī hō͘ lâng kiaⁿhiâⁿ giâugî. Sīmtsì iáu ū lâng tī tiānōe tiong kah i tsòhóe kóng honggiân, mā lóng ētàng tī 10 huntsing lāi to̍h kóng tshut honggiân. Tsitê lâng kinpún to̍h m̄tsai sī ántsóaⁿ ē huatsing tsit khoán tāitsì, tsísī kámkak āubīn ū tsi̍t kó͘ sînpì ê le̍kliōng teh tsútō tse ittshè, kah bô jīmhô lêngle̍k ê i púnsin bô siuⁿ tōa ê kuanhē. 　　　
Tī tsit kîkan, tsi̍t kiāⁿ koh khah kîkoài ê tāitsì mā huatsing; huatsing ê sîkan tāikhài sī tī 2023 nî Tsiaⁿ Gue̍h té. Ū tsi̍t pái tsitê lâng khì tsi̍t king ū kóngkhuah khongkan ê tshiautshī khòaⁿ tsheh kah tsoh honggiân kîtó. I tsē tī koân kha ê í'á téng tahtah ū nn̄g tiámtsing kú, tāikhài sī inūi sîkan siuⁿkòe kú, hutjiân kámkak liaphō͘sòaⁿ koh bē sóngkhoài khí lâi. Hoānnā ū liaphō͘sòaⁿ tséng tōa tsèngthâu ê pêngiú tāikhài lóng tsaiiáⁿ, hit tsióng bô sóngkhoài to̍h sī tsi̍t tsióng tséng khí lâi ê kámkak, sing tī ēpaktō͘ ê tiongng pō͘ūi bîbî'á thiàⁿ, tshiongmóa kàu kuiê ēpaktō͘, liáuāu koh thoân kàu téngpaktó͘ lâi, óngóng piàn kah hōantsiá puttikput tháu khui iotòa, lâi kiû tsiāmsî ê khinsang. M̄tsai sī ántsóaⁿ, tsit pái liaphō͘sòaⁿ ê tiùⁿthiàⁿ, hō͘ i huisiông siūkhì. Tāikhài sī inūi tsìntsêng tsitê lâng bat tī tsi̍t pái ê ībāng tiong, huatkiàn ū tsi̍t tiâu n̂gsik ê tōa tsôa peh khui tōa tshùi, tîⁿ tiâu tī i ê paktó͘, tī ēkha hiòng téngbīn, tùi i huattshut huisiông sàngsè ê thiautsiàn tsuthài. Só͘í íāu hoānnā liaphō͘sòaⁿ thiàⁿ, óngóng liântài hō͘ i siūⁿ tio̍h ībāng tiong ê hit bóe tsôa. Thang oànthàn ê sī, kútn̂g ílâi, tsitê lâng tsóng sī khì io̍hpâng bé tsi̍tkóa io̍h'á lâi tīliâu tiùⁿthiàⁿ, bô gōa goān’ì tshap tsit tsióng tiùⁿthiàⁿ; ōaⁿ kù ōe lâi kóng to̍h sī bóng tō͘ bóng kòe. I ê thāitō͘ tshìntshái thang khòaⁿ tsò sī tùi liaphō͘sòaⁿ tséng tōa á sī hit bóe tsôa ê bô taôa, sīmtsì thang kóng sī tùi in tsiongkīn sī tsi̍t tsióng tsi̍t tiám'á pānhuat to bô ê hoánèng. M̄koh tsit pái, i tsò oân tsin tn̂g ê tsi̍t tōaⁿ honggiân kîtó liáuāu, hutjiân piàn kah tsin siūkhì, tùi in huisiông thóià. Ū tsi̍t kó͘ le̍kliōng tùi singkhu lāi sing koân, to̍h kámkak i ētàng kiko-lîmhā, oântsoân tsèho̍k hit tsióng tiùⁿthiàⁿ kah hit bóe tsôa, jîtshiáⁿ kámkak ittēng tio̍h tùi in pòsiû suathūn. I sing tī simlāi kah tshùi ni̍h tsho͘ló͘ tsiùmē tsi̍t tsūn'á, hutjiân hōng Iésu ê miâ hōaⁿtshiú tī paktó͘ téngbīn, jîtshiáⁿ kéngkò hit bóe tsôa, tùi i kóng kású m̄ līkhui, ánne to̍h iû Iésu sing kā i siak lo̍hkhì tēga̍k ni̍h, á sī tsitmá to̍h iōng tēga̍k ê hóe lâi sio i, inūi pī hóesio to̍h sī i ohtit pībián ê siōng bóe ūnmiā. I mē siaⁿ liânliân, ittsài kā i khukóaⁿ tshut khì! Kóng mā kîkoài, i ê paktó͘ sûisî khaisí ti̍tti̍t huattshut kuhkuh ê hiángsiaⁿ, tséng tsin kín to̍h siau lo̍h khì, paktó͘ bóe hueho̍k píⁿ pêⁿ ê kámkak, kantaⁿ tī kúi huntsing sîkan lāi, tiùⁿthiàⁿ phah bô khì à, kahná tsiônglâi bô phòa kòe pēⁿ ê khoán（tsù：Tùi ánne sǹgkhí, itti̍t tsiongkīn gō͘kò gōa gue̍h liáuāu, paktó͘ bóe tsōnghóng tsiàusiông ánne tsin hó）, i to̍h tsaiiáⁿ i íking pī i hó à.

Sòatsiap koh huatsing tī siōng thâutsêng só͘ kóng ê siūⁿ beh kiò "tsi̍tê sílâng khiā khílâi" ê kîkoài tāitsì, to̍h huatsing tī liaphō͘sòaⁿ tséng thiàⁿ pī i hó ê liáuāu nn̄g kang. Tsitê lâng ēkìtit sī tī hit kang ēpo͘, i khì khiāke piⁿ'á ê Hi-Life tshiautshī bé kóa ímliāu, liáuāu, kiâⁿ kòe Lo̍kkáng Kitokkàu pēⁿīⁿ, iân tōa kelō͘ kiâⁿ tńgkhì tshù ni̍h. I tshiú the̍h ímliāu, iânlō͘ kiâⁿlō͘, iânlō͘ tsoh honggiân kîtó, sinsim kámkak tsin khoàilo̍k. To̍h tī lī tshù bô hn̄g ê tsheⁿâng ting si̍pjīlō͘ kháu, huathiān kelō͘ tòpêng, ū tsi̍t hō͘ jînke tng teh tsò songlé, tsi̍tê tōatōa ê pò͘pêⁿ kè tah tī tōathiaⁿ mn̂gkháu, téngbīn íking tà phângpò͘, lāibīn khaisí teh tsò tsi̍tkóa pâisiat, mā ū túntsik tsi̍tkóa songlé ēng ê mi̍hkiāⁿ. Tāikhài sī khò͘ tsîⁿ kimtsóa iáubōe khaisí sio, tshintsiâⁿ pêngiú mā iáubōe lâi, kantaⁿ ū tsi̍t tùi siàuliân ê lâmlú tī pêⁿkè lāigōa teh bôêng tsìntshut, khòaⁿ khí lâi iáu ū kóa tshingtsēng.

I tùi pêⁿkè thâutsêng kingkòe, to̍h tshintshiūⁿ hōaⁿtshiú tī liaphō͘sòaⁿ hit tsi̍t pái kângkhoán, ū tsi̍t kó͘ kângkhoán ê le̍kliōng kosing khí lâi, jîtshiáⁿ koh khah khí koân siaⁿ, siūⁿ beh tsèho̍k bó͘ tsióng tùili̍p mi̍h ê hit tsióng kámkak koh tshuthiān à. I hutjiân tsi̍tsî tī pêⁿkè thâutsêng thêng pō͘, m̄ kiâⁿ à. Tsitê kítōng liân tsitê lâng kakī lóng kiaⁿhiâⁿ giâugî khí lâi, m̄tsai goânin tshut tī tóūi!

Tsit tsióng kítōng sī ûihoán tsitê lâng íóng bīntùi pa̍tlâng songlé ê itkoàn thāitō͘. Tsū sèhàn, i to̍h sī tsi̍tê tsin kiaⁿ khòaⁿ tio̍h songlé ê lâng, tāikhài tsū sèhàn to̍h sī singkhu suejio̍k, ìtsì la̍t nńgtsiáⁿ, hoānnā khì kàu songlé hiāntiûⁿ, lóng ti̍tkak kámkak hit thâu ū bônglêng tsûntsāi, ūtangsî'á iáu khòaⁿ tio̍h lāibīn ê só͘ūi sehong saⁿ sèng, Tētsōng Ông Phô͘sat á sī tsa̍ppeh tsàn ê tēga̍k tô͘, koh khah hō͘ i kámkak khióngpò͘ kah ohtit títòng, kámkak he sī huisiông put kiatsiông ê só͘tsāi. Tōahàn íāu, tsitê lâng tsiàusiông ánne; inūi ánne, bôlūn songlé tōasè, tsíiàu i khòaⁿkìⁿ tsi̍t tiámtiám’á hêngiáⁿ, to̍h se̍h hn̄glō͘ phiahkhui, m̄ hō͘ kakī bak tio̍h tsi̍t tiámtiám’á sueūn. Sǹgmiā ê lâng kóng tse sī "patjī siuⁿ khin" só͘ tì, m̄koh i ê patjī sī sì niú, pēng bô sǹg khin, ingkai sī kah patjī bô siáⁿmi̍h kuanhē. Koh khah tshim ê goânin kóng tse sī tsūtsiông tshingsiàuliân sîkî khaisí, i to̍h itti̍t kámkak kakī sèngtē bô hó, ìài hoāntsōe, bô lâng ētàng kiù i, sí liáuāu tsùtiāⁿ lânbián ē phiaulîu khì bêngkài á sī tēga̍k, kah bônglêng tsòhóe teh kòe bô ǹgbāng ê singua̍h iúkuan. "Síbông liáuāu"tsit tsióng mi̍hkiāⁿ tsin tsá to̍h tsiâⁿtsò i jînsing ê tsi̍t tsióng tsiùtsó͘.

M̄koh, kóng mā kîkoài, tsit pái tsitê lâng kèngjiân ētàng m̄ kiaⁿ pa̍tlâng ê songlé, tiantò sī tī songlé ê thâutsêng khiā tsāi khapō͘. 　　
Tsi̍t sî'á, hit kó͘ sing koân ê le̍kliōng piànsêng tsi̍t tsióng tshiongtōng, hō͘ i kámkak suiàu kiâⁿ kòe pêⁿkè, tsìn ji̍pkhì khehthiaⁿ, kiò hitê íking síkhì ê lâng khiā khí lâi, ìsù to̍h sī khì kiò sílâng koh ua̍h khí lâi, tsit kó͘ le̍kliōng koh khah sī huisiông ê tōa éng. 　　
M̄koh, kângkhoán ū tsi̍t si'á sèsè ê tamiu kám tùi hitê lâng ê simlāi singkhí, he to̍h sī hoânló bóngtóng tsông ji̍pkhì songka, ngē beh kiò sílâng ua̍h khí lâi, tsua̍ttùi m̄sī tsi̍t kiāⁿ bô hiōkó ê tāitsì. Kású i to̍h ánne ji̍pkhì tōa huah tsi̍t hôe, nāsī sílâng ua̍h khí lâi to̍h bô sū, nāsī bô huattō͘ ua̍h khí lâi, songka ê lâng ittēng bē pàng i suah, in ittēng ē giâmlē tsítsik, kóng i sī siūⁿ beh phòhoāi songlé. 　　
M̄koh, hit kó͘ le̍kliōng si̍ttsāi tiòng kah tsin koân, tshiongtōng tsiàusiông tsin tōa. Tī sio khanliân loān kóng tsi hā, i khaisí tiûtû tùn teⁿ, tī pêⁿkè tsêng lōalōasô khí lâi, tùi tsit pêng kiâⁿ kòe khì, koh kiâⁿ tńg lâi, sio liânsòa kiâⁿ kúinā piàn, siōng khímá ū ５ huntsing kú. Tsiongkîbóe, tsitê lâng hòngkhì à, kiâⁿ kòe tsheⁿâng ting, khì tshuahtshuah tńgkhì kàu tshù! 　　
Ūisiáⁿmi̍h i tsiongkîbóe bô kiâⁿ ji̍pkhì kiò sílâng khiā khílâi leh? Sūāu tsho͘pō͘ siūⁿ tio̍h, ingkai sī tongsî Sènglêng bô kohtsài tsísī i tsìn tsi̍t pō͘ ê hêngtōng, nāsī tongsî Sènglêng kohtsài hō͘ i ū khókhò ê sìnsit, kiò i ióngkám kiâⁿ ji̍p khì, ánne i ittēng tsi̍tsut'á to bô hoâigî, khì kiò sílâng khiā khí lâi!

I koh khah siôngsè hunsik, kámkak hit kó͘ le̍kliōng kah tshiongtōng to̍h sī Páulô tī "Kolîmto Tsiânsu" só͘ kóng ê káu tsióng insù ê "sìnsim", tī tsa̍pjī tsiuⁿ ni̍h Páulô kóng, "Sènglêng tsionghián tī kok lâng singkhu téng, sī beh hō͘ lâng tit tio̍h hótshù. Ū lâng tsià tio̍h Sènglêng niásiū tìhūi ê giângí; ū lâng mā khò tio̍h kâng tsi̍tê Sènglêng niásiū tìsik ê giângí; koh ū lâng tùi kâng tsi̍tê Sènglêng niásiū sìnsim; iáu ū lâng tùi kâng tsi̍tê Sènglêng niásiū ipēⁿ ê insù; koh ū lâng ētàng kiâⁿ īlêng, koh ū lâng ētàng tsò sianti, koh ū lâng ētàng piānpia̍t kok tsióng lêng, koh ū lâng ētàng kóng honggiân, koh ū lâng ētàng huan honggiân." Tsia só͘ kóng ê "sìnsim" kah "in sìn tshing gī" só͘ kóng ê sìnsim tsētsió ū kóa bôkâng, i sī Sènglêng sù hō͘ sìntô͘ ê tshiautsūjiân lêngle̍k, hō͘ sìntô͘ ū ipēⁿ, kóaⁿ kúi téngténg ê koânlêng, thongsiông tshiongtōng lóng sī kotiòng ê. Iésu tī "Mákhó Hokim" 11, 23 kóng, "Góa si̍ttsāi kā lín kóng, bôlūn siáⁿlâng tùi tsit tsō suaⁿ kóng, 'Lí sóa khui tsit só͘tsāi tâu tī hái lāité! ' I nā simlāi bô giâugî, kantaⁿ sìn i só͘ kóng ê ittēng tsiâⁿ, to̍h ittēng hō͘ i tsiâⁿ à." to̍h sī teh tsí tsit tsióng "sìnsim".

Tsitê lâng tsiū ánne bêngpe̍k Iésu sī ántsóaⁿ ētàng hō͘ sílâng kohua̍h ê goânin. Tī “Iôhaneh Hokim” 11 tsiuⁿ, tī Bēthaniah ê só͘tsāi, Iésu bat kiò tsi̍tê La̍htsalō͘ ê siàuliânlâng kohua̍h. Tongsî La̍htsalō͘ íking síkhì sì kang, jîtshiáⁿ íking tâi tī hûnbōng ni̍h. Iésu lâi kàu hûnbōng tsêng, kiò pôngkuan ê lâng kā hûnbōng tsêng ê tsio̍hthâu sóa khui, liáuāu gia̍h ba̍k ǹg thiⁿ, kóng, "Pē ah, góa kámsiā Lí, inūi Lí íking thiaⁿ góa. Góa mā tsaiiáⁿ lí tiāⁿtiāⁿ thiaⁿ góa, m̄koh góa kóng tsit kù ōe sī ūi tsiuûi khiā leh ê tsènglâng, kiò in sìn sī Lí tshe Góa lâi ê." Kóng tsit kù ōe liáuāu, to̍h tōasiaⁿ huah kóng, "La̍htsalō͘ tshut lâi!" Hit ê sílâng to̍h tshut lâi à, khatshiú ēng pò͘ pau leh, bīntsiūⁿ pau tshiúkin. Iésu tùi in kóng, "Tháu khui, kiò i kiâⁿ!" La̍htsalō͘ to̍h oântsoân kohua̍h. Tshintshiūⁿ tsit tsióng lêngle̍k, to̍h sī lâitsū ke̍k koân ê sìnsim lêngle̍k.

Kângkhoán ê, tsit tsióng ētàng kiò sílâng kohua̍h ê lêngle̍k, tī kin'áji̍t ê 20, 21 sèkí tsiàusiông tsûntsāi, tshutsì tī 1859 nî ê Ingkok lâng Smith Wigglesworth mā ū tsit ê lêngle̍k, i tiāⁿtiāⁿ ūi phòapēⁿ á sī lîm sí ê lâng tsò liânsòa sèng ê kîtó, itsing tāikhài hō͘ 20 lâng tùi sí ni̍h kohua̍h. Ū tsi̍t pái i ūi tsi̍tê kiòtsò Mittsell ê sìntô͘ kîtó, tī Mittsell ê tshù, Mittsell ê khantshiú íking tsèngsi̍t kóng kakī ê angsài sí khì, Wigglesworth ê khantshiú mā kiò i thêngtsí kîtó, i to̍h sī m̄ sìn siâ, liânsòa tōasiaⁿ kîtó, liáuāu, Mittsell ū kohua̍h, jîtshiáⁿ tsū ánne ua̍h kah hósè-hósè. Tsiahê tāitsì lóng kìtsài tī "Bô thêng tsingtióng ê sìnsim" tsit pún tsheh ni̍h（Tsù 1）. Khókiàn ētàng hō͘ sílâng kohua̍h ê lêngle̍k, tī hiāntāi mā bô khòaⁿ tsò sī tsua̍ttùi ê hikî!

──2023, 07, 01 tī Lo̍kkáng

Tsù 1： Smith Wigglesworth tù "Bô thêng tsingtióng ê sìnsim"（Tâitiong, Sūibé tshutpánsiā, 2009 nî tsho͘pán）, beh bé tsit pún tsheh tshiáⁿ tiámkik ēkha bāngtsí：https://www.rhemapublishing.com/all/allproducts1.html