《宋澤萊新著《天路拾穗》TOJ/台灣字版》

 | | | 轉寄

Tsútê 25：SiōngTsú kám ū koán tsóngthóng ê kēngsoán?

作者 Sòng Te̍klâi 2026.08.23

Tsútê 25：SiōngTsú kám ū koán tsóngthóng ê kēngsoán?

2004 nîtshe ê tsóngthóng soánkí huisiông tsingtshái, Tân Tsúipíⁿ kah Liân Tsiàn tiánkhui khongtsiân kiklia̍t ê kēngtsing.

M̄tsai sī ántsóaⁿ, góa hiônghiông kiankuat jīnûi suiàu siá kóa kēngsoán ê tséngkô kòetêng kìlo̍k.

Góa tùi tâuphiò ji̍t ê tsêng kúi kògue̍h khaisí siá khí, ta̍k kang tsùsîn bānglō͘ ê êngbō͘ khòaⁿ, kā ta̍kê pòtsóa píkàu khah tiōngiàu ê pòtō, it'it tiahlio̍k lo̍h lâi, kasiōng kakī ê phênglūn, àntsiàu ji̍tkî, tsi̍t kang sòatsiap tsi̍t kang lâi susiá. Tsitthò tsheh ū sì tsheh, tshaputto lóng tī kēngsoán kîkan（siōng bóe tsi̍t pún tsheh sī khui phiò kiatsok liáuāu）, iû Tsiânōe tshutpánsiā tshutpán, tshehmiâ to̍h kiòtsò "Siáⁿlâng ētàng tòngsóan tsóngthóng? ", kó͘kè tsoânpō͘ jī sò͘ tī 60 bān jī tsóiū.

M̄koh, tsiahê m̄sī góa tī tsit phiⁿ bûntsiuⁿ ni̍h beh tâm ê. Góa beh kóng ê sī, tī kēngsoán kîkan SiōngTsú hō͘ góa ê tsi̍tê ībāng.

Tī tséngkô kēngsoán kòetêng ê kìlo̍k tiong, tú khaisí, góa píkàu khah ētàng pótshî tiongli̍p khehkuan, mā tī tsheh ni̍h hiòng tho̍ktsiá thánpe̍k kóng, góa ǹgbāng m̄thang kòethâu siū kòjîn tsèngtī ìsik hêngthài ê énghióng, tsīnliōng mài ū tsêngsū ê lūnsu̍t.

M̄koh, tòe leh kēngsoán ê kiklia̍t hòa, góa jú lâi jú bô khehkuan, kinpún bô huattō͘ pátshî kakī. Góa sī tôngtsêng Tân Tsúipíⁿ ê, inūi tùi tsi̍t khaisí, i ê bîntiāu to̍h giâmtiōng lo̍kngó͘ Liân Tsiàn tsin tsē（tshaputto sī lo̍kngó͘ 20% tsóiū）. Tongsî, Liân Tsiàn ê tàuthâu sī Sòng Tshó͘jû, in tshiaukòe 50% ê koân tsitshî tòaniá, suatbêng Tân Tsúipíⁿ ittēng lo̍ksoán!

Tân Tsúipíⁿ ê bîntiāu tsitshî tòaniá tsóng sī lo̍kngó͘, tshiau tsêng ê tsōnghóng bô tsē. Tòngtsò tsi̍tê tsiahni̍h iùlō͘ ê le̍ksú lîmtiûⁿ kìlo̍k tsiá, góa tsin oh tsūngó͘ khiphiàn, suijiân soán tsêng jú lâi jú káisiān, m̄koh khióngkiaⁿ Apíⁿ lo̍ksoán sī biánputliáu ê!

Kúinā kògue̍h, tsin tsē lâng tsáu lâi mn̄g góa soántsêng, ài góa tshaitshik siáⁿlâng iâⁿ siáⁿlâng su, góa tōatosò͘ kóng bē tshut tshùi, inūi bô siūⁿ beh hō͘ tsitshî Tân Tsúipíⁿ ê lâng sitbōng, m̄koh góa kā in kóng, Liân Tsiàn ê iâⁿbīn kahná píkàu khah tōa.

M̄koh, tsiū tī tsòeāu ê tsi̍t kògue̍h, góa tsò tsi̍tê ībāng, káipiàn góa ê kuantiám. Tongsî, Tân Jîntsong bo̍ksu, Ông Sèhun gīoân kah Sêngtik huhū, múi nn̄g lépài to̍h kàu goán tau lâi tsūhōe, teh tâm kàu SiōngTsú ê sî, lânbián tshamtsa̍p tio̍h kiklia̍t ê tsóngthóng soánkí tsitê ōetê, sīmtsì pítshú mn̄g, "kiùkèng siáⁿlâng ē tòngsóan? Tân Tsúipíⁿ kám ē iâⁿ?" Góa siūⁿ ībāng tsiū ánne tsūjiân huatsing.

Tī hitê bāng tiong, góa sing khòaⁿ tio̍h tsi̍tê tshàikó͘, kahná goán itpuaⁿ lôngka tshù thâutsêng ê hit tsióng sió tshàikó͘, téngbīn kahná ū tsheⁿ tshang, le̍k tshài, tī tshài kó͘ téngbīn khiā tsi̍t lia̍t tséngtsê ê sió tshâ phìⁿ, kahná tú buah thangkng ê iûtshat ê khoán, tī hia huatkng. Tsit tsióng huatkng ê sió tshâ phìⁿ, góa iā bat tī tsìntsêng ê ībāng tiong khòaⁿkòe, tsit sî koh tshuthiān, hō͘ góa kámkak huisiông kiaⁿhiâⁿ. Góa tsùbo̍k khòaⁿ tshâ phìⁿ, to̍h khòaⁿ tio̍h tiongkan tsi̍tê tshâ phìⁿ siá, 1％. Góa khòaⁿ tsi̍t sî'á, to̍h tshéⁿ khí lâi.

Góa ti̍tkak kámkak, ībāng kā góa kóng, Tân Tsúipíⁿ ē iâⁿ 1％. Tse sī Sènglêng kah góa tsi kan ê hō͘siong líkái, tsitê hō͘siong líkái be̍kkhè kantaⁿ ū góa kah Sènglêng pítshú ētàng liáukái.

Bô gōa kú, tsokka hó pêngiú Khng Goân to̍h khà tiānōe lâi, i kóng Tsiong SuTāi ê tsi̍tkóa kàusiū tsin tsē lâng lóng tsin kuansim soántsiàn, siūⁿ beh tsaiiáⁿ soánkí ē ū ê kiatkó, i kóng, "Lí tng teh tsoānsiá ‘Siáⁿlâng ētàng tòngsóan tsóngthóng?’ ", í lí ê kiànkái, siáⁿlâng ē tòngsóan?" Tsit sî, góa bô koh tshìntshái kóngkóng leh, góa khéngtēng kóng, "Apíⁿ ē iâⁿ 1％!" liáuāu, Khng Goân khì kā góa ê ōe thoân khui, tôngsî góa mā kā Tân Jîntsong bo̍ksu, Ông Sèhun gīoân, Sêngtik huhū kóng kângkhoán ê ōe, góa sīmtsì kā Apíⁿ ē iâⁿ 1％ ê ītshik, siá tī "Siáⁿlâng ētàng tòngsóan tsóngthóng?" ê siōng bóe tsi̍t tsheh téngbīn!

Khui phiò ê kiatkó, Apíⁿ í 0.228 ê tsingtsha phahpāi Liân Tsiàn! Tsin tsē lâng lóng kóng, kású kā hùi phiò lóng kèsǹg tsāilāi, Apíⁿ tikkhak sī iâⁿ 1％!

SiōngTsú kám bô kuansim lán ê soánkí? Tùi tsit hāng tāitsì khòaⁿ khí lâi, SiōngTsú iáu sī ū teh kuansim. SiōngTsú kám bô huattō͘ īsian tsaiiáⁿ soán tsêng? Tùi tsit hāng tāitsì khòaⁿ khí lâi, SiōngTsú iáu sī ētàng īti.

Kìjiân SiōngTsú ētàng īsian tsaiiáⁿ, to̍h piáusī lán sèkan ê bānsū, íking pī pho͘pâi hósè, ittshè lóng tsiàu kio̍kpún teh iántshut. Kìjiân ittshè lóng tsiàu kio̍kpún teh iántshut, pōeāu ittēng ū tsi̍tê siá kio̍kpún ê lâng, tsitê lâng sī siáⁿlâng? Tongjiân sī SiōngTsú!

SiōngTsú pho͘pâi hósè lí kah góa íki̍p Tâioân lâng, to̍h sī só͘ū ê lâng ê tsionglâi, lán lóng tsiàu kio̍kpún teh iántshut. M̄koh, góa siūⁿ kìjiân SiōngTsú ētàng siá kio̍kpún, I iā ētàng kingkái kio̍kpún.

Sī ántsóaⁿ ē ánne? Tse sī inūi SiōngTsú to̍h sī SiōngTsú! Inūi ánne koh khah ántsóaⁿ to bô pí kîtó koh khah tiōngiàu ê tāitsì! Lí kám ū liáukái góa ê ìsù?

Góa ē hôe iáu ē kóng tio̍h tsi̍t kiāⁿ koh khah sînkî ê tāitsì!

──2010, 07, 03 tah tī "Kitokkàu Thongsìn"