《宋澤萊新著《天路拾穗》TOJ/台灣字版》

 | | | 轉寄

Tsútê 26：SiōngTsú kám ū teh koán tsóngthóng tsi̍tke lâng ê tāitsì?

作者 Sòng Te̍klâi 2026.08.30

Tsútê 26：SiōngTsú kám ū teh koán tsóngthóng tsi̍tke lâng ê tāitsì?

Sènglêng tòa lâi ê ībāng sī putkhó-sugī ê. Tī só͘ū góa ê ībāng tiong, tsit pái iū koh sī putkhó-sugī tiong ê tsi̍t pái.

Ībāng huatsing tī 2004 nîté li̍phuat úioân soánkí ê sî. Tongsî, Ông Sèhun hiaⁿ, Tân Jîntsong bo̍ksu kah Sêngtik huhū iûgoân tiāⁿtiāⁿ lâi goán tau tsūhōe. M̄koh, inūi Sèhun hiaⁿ tshamsoán Tâitiong ê li̍púi soánkí, hō͘ goán ê tsūhōe koh khah siôngsiông kóng tio̍h tsèngtī būntê, góa siūⁿ ībāng to̍h sī ánne huatsing.

Góa bāngkìⁿ tsóngthóng hujîn Gô͘ Sioktin ê bōng'ápo͘. Bāng tiong, góa bô khòaⁿ tio̍h tāitē á sī thiⁿ ni̍h ê pōikéng, kantaⁿ khòaⁿ tio̍h tsi̍t tsō bílē ê gîn tsè bōng'ápo͘.

Hitê bōng'ápo͘ sī thoânthóng ê Tâioân bōng'ápo͘, m̄sī tsin khuah ê kū ka hôtso̍k kóngtōa ê bōng'ápo͘, tsísī tionghêng ê; suijiân kóng sī tionghêng ê, m̄koh sèkan koh khah ántsóaⁿ to bô hiahni̍h bílē ê bōng'ápo͘ à.

Góa kahná sī tī lio̍h'á koân ê khongtiong khòaⁿ lo̍h khì. Kuiê bōng'ápo͘ tshaputto ū tsi̍tê lâng ê koântō͘, tûliáu khah koân ê tsú bōngpâi ígōa, nn̄g pêng iáu ū sió hō͘lēng, iáu ū bē sè ê bōngtiâⁿ.

Góa khòaⁿ bē tio̍h bōng téngbīn ū tsheⁿtsháu á sī hueba̍k tsi lūi ê mi̍hkiāⁿ, kuiê bōng'ápo͘ huisiông hôkùi, tiausik lênglông, tsoânpō͘ lóng sī pe̍hgîn phahtsò, gîn kng siámsih. Tī siongtong kng iàⁿiàⁿ ê ji̍tthâu kng（kiámtshái m̄sī ji̍tthâu kng）ēkha, hiáⁿba̍k konghui.

Góa khòaⁿ tio̍h tsi̍tê lâng ê khatsiahphiaⁿ, m̄koh khòaⁿ bē tshut i sī siáⁿlâng, kahná sī piàⁿsàu bōngtiâⁿ ê lâng, i tsin kín to̍h kiâⁿ līkhui bōngtiâⁿ. Tsit sî, bōng'ápo͘ kah bōngtiâⁿ lóng tshingkhì tangtang, bôsua-bôsap, thang khòaⁿ tio̍h tséngtsê ê pe̍hgîn khik hue tng teh siámsiám huatkng. Góa kahná khòaⁿliáu tsin kú.

Siōng bóe, góa óng tsú bōngpi téngbīn khòaⁿ khì, to̍h khòaⁿkìⁿ "Gô͘ Sioktin" tsit saⁿê jī. Góa tshuah tsi̍t tiô, simlāi siūⁿ kóng, "Aih, ántsóaⁿ ē ánne! Bô thiaⁿ kóng Gô͘ Sioktin íking kòesin a." to̍h tshéⁿ khí lâi!

Tsitê bāng tòa lâi góa ê hūtam, inūi góa bô gōa líkái Sènglêng sī m̄sī ū àmsī góa suiàu kā tsitê kéngkò thoânta̍t tshut khì.

Tī katêng tsūhōe ê sî, góa to̍h thê tshutlâi kah tāike tshamsiông. Góa to̍h kóng, tse m̄sī tsi̍tê hó bāng, SiōngTsú tng teh khiántsik tsóngthóng hujîn à. Hit tsō bōng'ápo͘ tú teh piáusī, tsóngthóng hujîn tsísī tsi̍t tsō bílē ê bōng'ápo͘, piáubīn hôkùi, m̄koh lōetsāi íking tshintshiūⁿ àu tshâ à. Góa koh khah giâmtiōng kóng, “I sī kimgîn ê gōapiáu, m̄koh lāitiong íking pāihoāi ā!”

Tsit sî Sêngtik hiaⁿ ūi tio̍h kā góa antah, thêtshut lēnggōa tsi̍tê káisueh, i jīnûi tse sī tsi̍tê hó bāng, inūi “gîn” tsitê mi̍hkiāⁿ tī Kitokkàu lâi kóng ūsî sī teh tsí hó ê tāitsì, pílūn kóng “gînsik ê Sèngtàn” to̍h sī hó ê, ingkai sī hó siausit.

M̄koh, Sêngtik hiaⁿ ê kóngsû bô huattō͘ hō͘ góa siongsìn, inūi kású sī hósū, ittēng ē hiánsī gîn tsè ê pótsō á sī gînsik ê biánliû tsi lūi ê mi̍hkiāⁿ, bô khólêng sī bōng'ápo͘.

Tongsî, Apíⁿ tú liânjīm pòaⁿ nî, tsèngtsik jú lâi jú hó, tsò tsitê bāng sī tsin kîkoài ê. M̄koh, pòtsóa ittsài pōlō͘ Gô͘ Sioktin kah'ì sńg kó͘phiò, sīmtsì kah tsi̍t phue kuaⁿ hujîn khì piàⁿmiā bé mi̍hkiāⁿ ê tāitsì, to̍h hō͘ góa kámkak iáu ū pí tsitê koh khah giâmtiōng ê tāitsì teh beh huatsing. Góa jīnûi, Gô͘ Sioktin ê tsi̍tkóa hêngûi sī bô tìhūi ê, m̄sī sinûi tsóngthóng hujîn ingkai tsò ê, SiōngTsú ittēng íking teh khiántsik i à.

Kingkòe kúinā pái tshamsiông, goán kuattēng siōng hó ētàng kā sìnsit thoân kàu tsóngthóng hia. He kiùkèng kai ántsóaⁿ tsò leh?

Tē it ê siūⁿ tio̍h ê tongjiân sī tsóngthóng sinpiⁿ ê koktshik kò͘būn, koh sī Kitoktô, kantaⁿin píkàu khah ū kihōe khǹg tsóngthóng, mā tsaiiáⁿ ībāng sī siáⁿmi̍h.

Kingkòe tsi̍t huan ê sûnmn̄g, góa tsiongkîbóe khà tiānōe hō͘ góa bô se̍ksāi ê Ko TsùnBêng bo̍ksu. Ēkìtit lâi thiaⁿ tiānōe ê lâng sī Ko TsùnBêng ê hujîn. Góa kā i kóng, góa sī Kitoktô, tsò tsi̍tê ībāng, iúkuan Gô͘ Sioktin ê. Góa siôngsè kā i kóng tsitê ībāng ê lōeiông, liáuāu tshiáⁿ Ko bo̍ksu hiòng tsóngthóng tsoánta̍t, hoānnā Gô͘ Sioktin ê kó͘phiò lóng ingkai bē tiāu, tsiū ánne m̄thang kohtsài bak tio̍h jīmhô iúkuan kimtsîⁿ ê tāitsì, jīmhô khansia̍p tio̍h kimtsîⁿ ê hêngûi siōng hó lóng tsiongtsí, jîtshiáⁿ siōng hó lâi sìn Kitokkàu, inūi SiōngTsú tng teh khiántsik i. Ko bo̍ksu hujîn thiaⁿliáu, tîmgîm tsi̍t tsūn’á, piáusī ûilân, i kóng tsit hāng tāitsì tsin bô hó kóng, m̄koh i ē tsoánta̍t hō͘ Ko bo̍ksu tsaiiáⁿ.

Tongsî, tùi Ko bo̍ksu hujîn ê kháukhì tiong, góa ti̍tkak kámkak, Ko bo̍ksu thoânta̍t tsitê sìnsit ê khólêng sèng bô tōa. Góa sûisî koh tshōe hó pêngiú tsokka Lí Kiâu siansiⁿ, i mā sī Kitoktô, tôngsî mā sī koktshik kò͘būn tiong ê tsi̍tê.

Lí Kiâu siansiⁿ ê thāitō͘ píkàu khah tsikke̍k, i sûisî kah tsi̍tkóa kàuiú kóngkhí tsit hāng tāitsì. I kóng tī Kitoktô tiong, ū tsin tsē lâng lóng teh hoânló tsit hāng tāitsì, khólêng ū tsit tsióng ībāng ê lâng mā bē kantaⁿ ū góa tsi̍tê, tikkhak sī tsin tsē lâng íking huattshut kéngsìn à. M̄koh i kóng, i tsísī tsi̍tê koktshik kò͘būn, iúkuan tsóngthóng ê kabū sū, i bô khaktēng kám ētàng tngbīn kah tsóngthóng tâm, i mā piáusī ûilân.

Tùi i ê kóngōe lāité, góa mā kámkak tsin oh thàukòe i lâi thoânta̍t tsit hāng tāitsì. Siōng bóe ê ǹgbāng sī Sèhun hiaⁿ, ǹgbāng i ū kihōe hiòng Apíⁿ tâm tsit hāng tāitsì. Āu lâi, tī kiklia̍t ê kēngsoán tiong, A’Píⁿ tsóngthóng lâi thàmbōng Sèhun hiaⁿ ê soántsêng, Sèhun hiaⁿ hō͘ Apíⁿ tsi̍t pún "sèngking", m̄koh mā bô huattō͘ thoânta̍t tsit kiāⁿ iúkuan Gô͘ Sioktin ê tāitsì. Tsitê sìnsit ê thoânta̍t siōng bóe í tsún suah khì á lâi siutiûⁿ.

2006 nîté, Ângsaⁿ kun tsi hō po̍khuat, Apíⁿ siū tio̍h giâmtiōng ê kongkik; jīmkî kiatsok liáuāu, kimtsîⁿ ê tāitsì oântsoân hiānkng, Píⁿ ka siaⁿbōng pua̍hlo̍h tshimkheⁿ, kuiê tsóngthóng katso̍k tshaputto lóng tio̍h phòtshùi à, Le̍k iâⁿ tshaputto hāmlo̍h kàu tēga̍k ê pianiân!

Tùi tsit ê ībāng, goán to̍h tsaiiáⁿ, SiōngTsú kám tsaiiáⁿ tsóngthóng kah tsóngthóng tsi̍tke lâng ê tāitsì? Tapàn sī, oântsoân tsaiiáⁿ! Jîtshiáⁿ tsaiiáⁿ kah tsin thiatté! SiōngTsú kám ē koán tsóngthóng kah tsóngthóng tsi̍tke lâng ê tāitsì? Tapàn sī, ē koán! Jîtshiáⁿ sī koán kah tsin ân!

M̄koh, ūisiáⁿmi̍h SiōngTsú hòngtshiòng tsit khoán tāitsìê huatsing? Ūisiáⁿmi̍h m̄ tshinsin tsètsí Gô͘ Sioktin ê hêngûi? Tse sī inūi i m̄sī Kitoktô, tsètsí i mā bô ittēng ē thiaⁿ. Tôngsî, SiōngTsú híkhó tsi̍tkóa lâng ê hoāntsōe ū I amkhàm ê bo̍ktik, tsitê bo̍ktik sī tsiāmsî amkhàm, m̄koh tsóng ū tsi̍t kang ē oântsoân hiánbêng!

Góa tiāⁿtiāⁿ himsiān tsi̍tkóa ētàng kah SiōngTsú tngbīn kóngōe ê lâng, in ētàng ēng thiaⁿkak tiāⁿtiāⁿ thiaⁿ tio̍h SiōngTsú tsísī ê ōegí, tsiongkîbóe piànsêng Kitokkàu ê sianti. Góa to̍h bētàng, kantaⁿ ētàng ngó͘jiân ū tsi̍tê ībāng, jîtshiáⁿ kā i tinsioh, kámkak bôpí ê kiaⁿgî.

Góa tsitmá iáu sī kingsiông hoâigî "Kūiok" lāité hit kóa thoânta̍t SiōngTsú tsí'ì hō͘ Isulael tsu ông ê sianti, ná tshintshiūⁿ Elíiah hit kóa lâng, kámkak in sī hikò͘ ê jînbu̍t, inūi in thài sînpì, kèngjiân ētàng khò tio̍h SiōngTsú ê tsísī, tiāⁿtiāⁿ khòaⁿphòa tsu ông iapthiap ê tāitsì, jîtshiáⁿ thêtshut kéngkò. Góa kámkak hit kóa kiámtshái sī "Kūiok" tsoktsiá só͘ piantsō ê kò͘sū, tsísī tsi̍t khoán hiōti tsibêng ê o͘pe̍h susiá jîí.

M̄koh, tùitsiàu góa îit ê tsi̍t nn̄g ê ībāng lâi khòaⁿ, koh bô gōa káⁿ khaktēng kóng "Kūiok" sianti ê púnléng sī hikò͘ ê! ──2010, 07, 10 tah tī "Kitokkàu Thongsìn"

Hùlo̍k：〈2023, 07, 20 Ông Sèhun li̍púi tī bīntsheh tùi tsit hāng tāitsì só͘ siá ê hôeik 〉：

Kin'áji̍t tsákhí tī Itsikhauah(いちかわ) tshiathâu ê lâuthui king siá kóa kuanhē Tâioân bûnha̍kka Sòng Te̍klâi lāusu ê īgiân kò͘sū, inūi tongsî paktó͘ bô gōa sóngkhoài, siá ê lōeiông m̄sī tsin lísióng, ū kúi hun kóaⁿkang ê kámkak, m̄koh inūi tio̍h tshúlí paktó͘ bô sóngkhoài ê kámkak, tsiū tshìntshìn-tsháitshái siá.

Tńglâi tsabó͘ kiáⁿ Suuada (すわだ/Suwada) ê tshù ni̍h, khùn tsi̍t khùn khí lâi, hutjiân siūⁿ tio̍h 2004 nîté, Sòng Te̍klâi lāusu kā góa kóng tio̍h i bāngkìⁿ a’Píⁿ tsóngthóng ê hujîn ê tsi̍tê ībāng（Kitoktô khòaⁿ tio̍h SiōngTsú kóngōe ê kéngsiōng）, to̍h kámkak tsínhùn（tōa tio̍hkiaⁿ kah sînking putan ê kámkak）bô thêng!

2004 nîkan, a’Píⁿ tsóngthóng íking sūnlī liânjīm, góa mā inūi a’Píⁿ tsóngthóng tōala̍t tsō͘sóan koh tńglâi Li̍phuat’īⁿ. Kēngsoán kîkan, Sòng Te̍klâi lāusu kā góa kóng, i khòaⁿ tio̍h SiōngTsú ê ībāng, sī tsóngthóng hujîn Gô͘ Sioktin, ē inūi kimtsîⁿ ê būntê, tsio lâi tsailān（ībāng lāibīn sī tsi̍tê tōa gîntsù ū khik hujîn sèⁿmiâ ê siámsiám huatkng ê bōng'ápo͘, tshintshiūⁿ "sèngking" lāibīn kóng ê, Kitoktô kakī ētàng sûisî tsin tshingtshó káitho̍k ībāng ê ìhâm （SiōngTsú tī ībāng lāité úntsông ê tsí'ì）!

Sòng Te̍klâi lāusu inūi ánne thàukòe koktsióng kokiūⁿ ê koántō, hibāng ētàng tsó͘tsí tsit tiûⁿ tsóngthóng hujîn kuanhē tsîⁿtsâi ê tsailān huatsing, m̄koh sa bô liâu'á mn̂g, siōng bóe góa tsíhó biánkióng kā a’Píⁿ tsóngthóng thoânta̍t "hóikái sìn Tsú phiah tsai" ê sìnsit, khólêng sī inūi góa thunthun-thò͘thò͘ kóng bē tshingtshó, a’Píⁿ tsóngthóng kah hujîn, pēng bô inūi ánne ū siūsé kui Tsú lâi bián tsaieh ê iáⁿtsiah!

Saⁿ nî gōa íāu, gînsik hongpō táⁿkik liáu íking siàjīm ê a’Píⁿ tsóngthóng kah hujîn tsi̍tke lâng, Bîntsìn tóng mā hām lo̍hkhì kàu taⁿ bô lâng ū ê hongpō tiong, nāsī bô Tshòa IngBûn ê tshuthiān, Bîntsìn tóng khólêng to̍h ē inūi ánne kiâⁿ ji̍p le̍ksú ê hóehu tiong!