《宋澤萊新著《天路拾穗》TOJ/台灣字版》

 | | | 轉寄

Tsútê 27：Sènglêng kám bô beh i hui Kitoktô ê pēⁿtsèng?

作者 Sòng Te̍klâi 2026.09.06

27 têba̍k：Sènglêng kám bô beh i hui Kitoktô ê pēⁿtsèng?

Tsit hāng tāitsì mā huatsing tī 2004 nî tsóiū, kângkhoán sī Tân Jîntsong bo̍ksu, Ông Sèhun hiaⁿ kah Sêngtik hiaⁿ huhū tiāⁿ lâi goán tau tsò katêng tsūhōe ê hitê sîtsūn.

Tāitsì sī ánne, góa ê sèhàn tsabó͘ kiáⁿ Bísùn saⁿ hòe tsìntsêng ê póbó hiônghiông huatsing tsi̍tê pēⁿtsèng, m̄tsai ūisiáⁿmi̍h, tsit ūi íking gō͘ tsa̍p gōa hòe ê póbó hiônghiông tshiúkut ê kutthâu phòali̍h, tsōnghóng koh huisiông giâmtiōng. Ingkai kóng tsit tsióng kut tn̄g khì kah lóliân kutkeh sesang tsèng bô kuanhē, sûntshùi sī sianthiansèng kutkeh iông’ī tn̄g ê goânin só͘ tsōsêng.

Bísùn tī saⁿ hòe tsìntsêng, lóng sī tsit ūi póbó tsi̍t tshiú ióng tōa ê. Tongsî, goán hutshe ê hāubū tsin bôêng, koh ittēng tio̍h ióngio̍k tiónglâm Kénggî, tiónglí Oántêng, Sūsi̍tsiōng íking bô sîkan kah simle̍k tshintshiú kohtsài tsiàukò͘ tsitê eⁿ’á. Só͘í Bísùn saⁿ hòe tsìntsêng, mêji̍t tshaputto lóng tī póbó ê tshù, tio̍hsǹg nn̄g hòe íāu siōng iùtīhn̂g, mā lóng iû póbó tshōa i khì ha̍khāu tha̍ktsheh, kantaⁿ tī Pàila̍k kah Lépàiji̍t, goán tsiah phō i tńg kàu tshù lâi. Hókatsài, póbó ê tshù to̍h tī goán tau hūkīn, ji̍tsiông goán hutshe iáu ētàng siông khì khòaⁿ Bísùn. Ánne kàu saⁿ hòe tsiok, Bísùn tsiah līkhui póbó ê tshù, oântsoân tńglâi goán ê tshù. Só͘í póbó kah goán itti̍t îtshî tsin hó ê kuanhē, tio̍hsǹg kàu Bísùn tsa̍p hòe tsóiū ê 2004 nî, goán iáu sī ónglâi bô thêng, tshaputto to̍h sī tsi̍tke lâng, Bísùn tsóng sī kā póbó tòngtsò i ê "a'má" lâi khòaⁿthāi.

Tng góa thiaⁿ kóng póbó kut tn̄g khì ê sî, to̍h tsin thè i hoânló, inūi nîkí tōa ā, tsit tsióng pēⁿ koh khah ū uihia̍p sèng. Góa kah Jîntsong bo̍ksu, Sèhun hiaⁿ sûisî tsiū kiâⁿ kàu póbó ê tshù, siūⁿ beh thè i kîtó.

Tng goán ta̍h ji̍pkhì póbó ê tshù, Sèhun hiaⁿ to̍h iô thâu, inūi i khòaⁿ tio̍h póbó ê tshù ê tōathiaⁿ, pái tsi̍t tōatui tshah lēngkî ê ngó͘siōng, iáu ū sînpì ê hûtsiù koânkoân kòa tī téngbīn, tsi̍tsî mā sǹg bē tshing, khòaⁿ khí lâi tsin kîkoài. Sèhun hiaⁿ sînpì tshiòtshiò’á kā góa kóng, "Àntsiàu góa ê kuantshat, nāsī tsi̍tê katêng kiònghōng saⁿê ngó͘siōng ísiōng, tsit ê ke ê mâhoân to̍h tōa loh!" Goânlâi, póbó ê angsài túhó sī hūkīn tsi̍t king biōsī ê úigoân, tùi hit king biōsī kònghiàn tsin tsē simle̍k.

M̄koh, bo̍ksu kah Sèhun hiaⁿ iáu sī thè i tsò kîtó, tsísī kámkak bô hiahni̍h lo̍kkuan. M̄koh, góa iáu sī tsûn ǹgbāng ê sim, inūi póbó pēng bô kītsua̍t goán ūi i kîtó, to̍h sī i ê angsài mā iáu sī tiāmtiām tsún goán ánne tsò, in bô pâithik goán ê hóì, hō͘siōng píkàu Tâioân bînkan tùi Kitokkàu ê thāitō͘, tse íking sī tsin lântit!

Tī hitê ū tsin tsē ngó͘siōng ê tōathiaⁿ lāité, góa kā póbó kóng, "Góa ē kèsio̍k thè lí kîtó." Góa m̄sī sûipiān kóngkóng leh, tongsî, góa tng teh ua̍ttho̍k ūmiâ ê sînjiah ipēⁿ tsuanka Un Iokhān bo̍ksu ê tsheh, tsaiiáⁿ liânsòa kîtó tùi pēⁿtsèng ê tōa uile̍k, ji̍tsiông mā ióng tsiâⁿtsò liânsòa kîtó ê si̍pkoàn. Ittàn góa hē kuatsim beh ūi bó͘ lâng tsò kîtó, góa to̍h bē hiahni̍h iông’ī thêngtsí.

Góa līiōng ta̍k kang hônghun tiám pòaⁿ tsing ê sànpō͘ sîkan ūi póbó kîtó, tsíiàu góa sànpō͘, góa to̍h bô thêng liânsòa kîtó. Tôngsî, tī pêngsiông ê ha̍khāu hākhò sîkhik, góa mā ē tsáu khì in tau thè i tsò kîtó. Tī kîtó ê sî, góa ē kā póbó ê miâ, pēⁿtsèng tiônghok kóng tsi̍t piàn, jiânāu kîbāng Iésu, Sènglêng kah i tôngtsāi, kā i ê pēⁿtsèng i hó.

Sūsi̍tsiōng, tú khaisí ê sî, góa khòaⁿ bē tshut SiōngTsú kàiji̍p tsitê ipēⁿ. Inūi póbó mā kakī khì pēⁿīⁿ tsò tīliâu, jîtshiáⁿ íking phah tsio̍hko, tio̍hsǹg góa bô kîtó, khòaⁿ khí lâi pēⁿ mā sī bānbān tit tio̍h i hó.

M̄koh, kîtó kúi kang liáuāu, ū tsi̍t pái tī ha̍khāu siōng oân khò, teh beh tiongtàu à, ū kóa thiám, góa tùi kàusik tńglâi tōsu hiohkhùn sik. To̍h tī tsi̍t tsâng tshiū kha thêngtsí khapō͘, inūi ū tsi̍tê īsiōng tshuthiān tī góa ê bīntsêng.

He sī tsi̍tê lūisū tsi̍t phiàn hûnbū tùi suaⁿ kan phiau tshut lâi ê pe̍hsik hûnian, hiônghiông ûnûn'á tsìnji̍p góa ê gánlāi. Hit phiàn hûnian itti̍t hiòng tsêng puaⁿsóa, bô gōa kú góa to̍h khòaⁿ tio̍h póbó ê tshù kah hit tiâu hāng'á, hit phiàn hûnian kèngjiân tùi póbó ê tshù pue ji̍p khì. Teh tsìnji̍p póbó ê tshù tsìntsêng, hûnian hō͘ góa kámsiū tio̍h tsi̍tê hō͘ góa m̄ káⁿ sióngsiōng ê kámsiū, SiōngTsú hiánsī I bôpí tshim lònglòng ê pitsiān. Góa khòaⁿ tio̍h hit phiàn hûnian, kámkak I to̍h sī bānmi̍h siōng tétsân ê mi̍hkiāⁿ, mā sī siōng tshim tētài ê mi̍hkiāⁿ, koh khah ántsóaⁿ to bô pí I koh khah sī tépôaⁿ ê mi̍hkiāⁿ à. I m̄sī bānmi̍h, khioksī só͘ū bānmi̍h siōng tétsân ê tsihtsài mi̍h. Ōaⁿ kù ōe lâi kóng, nāsī tio̍h kóng pitsiān, bô jīmhô mi̍hkiāⁿ pí I khah pitsiān, nāsī tio̍h kóng útiū bānmi̍h pâilia̍t ū tsi̍tê tshimtō͘, bô jīmhô mi̍hkiāⁿ pí I só͘ khiā ê tēūi koh khah tshim. Bānmi̍h nāsī bô I ê hûtshî, bānmi̍h to̍h ē pangpāi. I kahná tùi góa piáusī, inūi góa ê kîtó, tsúnkóng tsitê hūjîn m̄sī Kitoktô, koh kiònghōng tsin tsē ngó͘siōng, I mā goān’ì i i ê pēⁿtsèng, inūi I púnlâi to̍h hoâiphō i. I tsi̍tsut'á to bô hôikò͘, ti̍ttsiap tsìnji̍p póbó ê tshù ni̍h khì à.

Góa kiaⁿ tsi̍t tiô, tshaputto m̄ káⁿ siongsìn góa só͘ khòaⁿ tio̍h ê. M̄sī inūi Sènglêng beh i póbó hō͘ góa kiaⁿgî, sī i ê ke̍ktuan khiampi ê púntsit kā góa heⁿh tio̍hkiaⁿ. Góa huatkiàn tōapān ê SiōngTsú, kèngjiân khiampi kahná tshintshiūⁿ tsi̍tê siōng ētsàn ê hō͘sū, lóng bô īgī to khì i tsitê bô sìn I ê hūlí, koh m̄sī tsikpī, mā bô oàngiân; góa to̍h kóng, "Tsú ah, tshiūⁿ Lí tsit tsióng, góa éngoán lóng tsò bē kàu!"

Īsiōng siausit liáuāu, góa sûisî tsáu khì tshia pêⁿ, khiâ otobái khì póbó ê tshù. Góa kóaⁿkín thè i tsò tsi̍tê kámsiā ê kîtó, góa kā póbó kóng, "Góa tī kîtó tiong huatkiàn SiōngTsú beh kā lí itī, bô gōa kú liáuāu, lí ê pēⁿ to̍h ittēng ē tit tio̍h i hó!"

Kójiân, bô tsin tn̂g ê tsi̍t tōaⁿ ji̍ttsí liáuāu, póbó to̍h thiah tiāu tsio̍hko, kut tn̄g khì tit tio̍h i hó. Liáuāu, ū kúinā pái, góa kèsio̍k ūi i kîtó ê sî, lóng khǹg póbó kah i ê tshù ni̍h ê lâng ingkai kái sìn Kitokkàu. M̄koh tshùlāi lâng tsísī tshiòtshiò’á, pēng bô beh sìn SiōngTsú ê ìsù.

Āu lâi, góa bô koh ūi póbó kîtó, Sūsi̍tsiōng mā bô suiàu góa kîtó à. M̄koh kúi kògue̍h liáuāu, póbó koh tsi̍t pái pua̍htó, tsit pái ê kut tn̄g khì sī tī tōathúi kut.

Tsit pái, góa to̍h bô ū êng kah khùila̍t ūi i kîtó à. Tsitê sînjiah teh suatbêng siáⁿmi̍h? To̍h sī teh kā lán kóng, SiōngTsú mā goān’ì ūi hui Kitoktô ipēⁿ, tsíiàu kîtó, tio̍hsǹg m̄ sìn I ê lâng, mā ē niásiū I ê intián, I hûtshî só͘ū ê lâng, hūtam só͘ū ê lâng. M̄koh, sèkan lâng tsóng sī bô bêngliâu SiōngTsú ê siānì, ua̍tthâu to̍h koh khah ántsóaⁿ to bē jīntit SiōngTsú à!

Āu lâi, góa itti̍t ēkìtit tsitê īsiōng kah sînjiah, m̄ káⁿ ka siókhóa bēkìtit, m̄sī ûihām póbó bô huattō͘ sìn SiōngTsú, inūi tse sī tsoân khò SiōngTsú ê kuattēng; khiok sī kámkak SiōngTsú ê khiampi hō͘ góa bô huattō͘ sióngsiōng. Itti̍t kàu kin'áji̍t, góa lóng iáu m̄tsai SiōngTsú ū gōa khiampi, to̍h tshintshiūⁿ Martin Luthur kóng ê, "Sènglêng ná tshintshiūⁿ tsi̍tê tshimian." Ìsù sī kóng lán éngoán ohtit tshikliông I ê tn̂gkhuah kotshim lah!

──2010, 07, 19 tah tī "Kitokkàu Thongsìn"