《宋澤萊新著《天路拾穗》TOJ/台灣字版》

 | | | 轉寄

Tsútê 36：Ē līkhui singkhu ê to̍h m̄sī tsintsiàⁿ "Sènglêng lāitsū"!

作者 Sòng Te̍klâi 2026.11.08

Tsútê 36：Ē līkhui singkhu ê to̍h m̄sī tsintsiàⁿ "Sènglêng lāitsū"!

Sènglêng lāitsū to̍h sī titkiù ê khaksi̍t tsèngkì. I sī SiōngTsú kā Sènglêng sù hō͘ lâng, tòngtsò tsi̍t tsióng sìntô͘ tsionglâi tiāⁿtio̍h ē titkiù ê tsèngkì, mā sī SiōngTsú hō͘ lâng titkiù ê ìnkì. Tsionglâi bua̍tji̍t símphòaⁿ lâilîm ê sî, Iésu ài lí the̍h tshut tsitê tsèngkì hō͘ I khòaⁿ, tsiah ētàng tsìnji̍p sinthiⁿ-sintē. Nā kóng iáu ē līkhui, he to̍h giâmtiōng ā. Pílūn kóng bānit tī bua̍tji̍t símphòaⁿ ê sî, Sènglêng túhó līkhui, he kám m̄sī lo̍h ji̍p hóeô͘ tēga̍k? Nāsī ánne, Sènglêng tsū pún to̍h bētàng kóng sī titkiù ê "khaksi̍t tsèngkì" ā, kám m̄sī? M̄koh Páulô tī i ê Êhusoh Su 1：14 kóng, "Sènglêng sī tit kigia̍p（titkiù）ê pînkì!"

Tse to̍h sī kóng, ū tsi̍t tsióng tsōnghóng, Sènglêng sī bē līkhui lâng ê singkhu, Sènglêng hō͘ lâng ê singkhu éngoán piànsêng Sènglêng ê tiān, tse kiòtsò "Sènglêng éngtsū", itpuaⁿ lâng lóng kóng sī "Sènglêng lāitsū". Tio̍hsǹg hoāntsōe, I mā bē līkhui, Sènglêng ē tī lí ê lōetsāi appik lí oântsoân jīntsōe hóikái tsiah thêngtsí.

Lēnggōa, Sènglêng ê éngtsū sī Sènglêng beh hō͘ sìntô͘ tittio̍h éngoán ê sèⁿmiā sī só͘ tsò īpī ê kitshó͘ kangtsok, m̄bián tán kàu sí liáuāu, tsāiseⁿ ê sî Sènglêng to̍h ētàng sù hō͘ lí éngoán sèⁿmiā, só͘í kóng, Sènglêng á sī Iésu sī "sù sèⁿmiā ê lêng". Tsitê éngoán ê sèⁿmiā to̍h sī Sènglêng ê si̍ttsit, iā to̍h sī "Góa sī Alpha, Góa sī Omega" ê sînsèng sèⁿmiā. Nāsī Sènglêng ē līkhui singkhu, bô huattō͘ éngtsū, ánne tsionglâi éngoán ê sèⁿmiā mā ē līkhui singkhu, bô huattō͘ éngtsū, he to̍h tshám loh! Hitūi sìntô͘ kám m̄sī to̍h ē tsiâⁿtsò ūsî ū éngoán ê sèⁿmiā, ūsî bô éngoán ê sèⁿmiā? He to̍h tsin kankhó͘ sim loh!

Só͘í kóng, kású sìntô͘ ētàng pī Sènglêng éngtsū, piànsêng Sènglêng ê tiān, Sènglêng sī bē līkhui hitūi sìntô͘. Iā to̍h sī kóng, Sènglêng kású beh tsínkiù tsi̍tê lâng kàu té, I to̍h ē éngtsū. Sènglêng ētàng tsaiiáⁿ sìntô͘ ê kòikhì kah bīlâi, I bē sûisûi-piānpiān éngtsū tī lâng ê singkhu, tûhui tsitê lâng sī I ītēng ittēng titkiù ê lâng! Kású lí tsintsiàⁿ sī ittēng titkiù ê lâng, lí hoān tāngtsōe, I to bē līkhui lí ê singkhu!

Koh lâi ingkai tio̍h tsaiiáⁿ, Sènglêng éngtsū bô ittēng ē hō͘ lâng ū kóng honggiân hitlūi ê sio̍klêng insù, he kah ētàng kóng honggiân, ipēⁿ, kóaⁿ kúi tsiahê insù bô kuanhē, I ê lâi kàu huisiông unhô, bē kiò lí tsoânsin tíntāng. I ē sing hō͘ lí ê tsio̍h sim piànsêng bah sim, kiò lí ê sim nńghòa lo̍h lâi, ētàng tsù’ì thiaⁿ I ê tsíkàu. I sing hō͘ lí kiat Sènglêng ê kóetsí, koh lâi to̍h sī tsi̍t hēlia̍t ê koánkà, paukuat jīntsōe hóikái, koh lâi to̍h sī hō͘ lí éngoán ê sèⁿmiā. Tse sī Sènglêng lāitsū ê sînsèng sūkang!

Ū lâng itti̍t jīnûi ū Sènglêng ê 9 tsióng insù to̍h sī Sènglêng lāitsū, tse sī m̄tio̍h ê, he kiòtsò Sènglêng koànak（á sī tshing Sènglêng tshiongmóa）, m̄sī Sènglêng lāitsū. Ētàng kóng honggiân, tsò ībāng, kìⁿ īsiōng, ipēⁿ, kóaⁿ kúi ê sio̍klêng insù sī tsin liáuputkhí, m̄koh in kiōngtông ê hiānsiōng sī Sènglêng ē līkhui singkhu, só͘í ū tsin tsē ētàng ipēⁿ ê sîn’i, ittēng tio̍h tánthāi Sènglêng kànglîm, tsiah khaisí kā lâng tī pēⁿ, sī ántsóaⁿ leh? Inūi Sènglêng ūsî tī i singkhu ni̍h, ūsî bô tī i singkhu ni̍h. Ētàng khòaⁿ tio̍h īsiōng ê lâng mā sī kângkhoán, Sènglêng lâi to̍h khòaⁿ tio̍h īsiōng; īsiōng hiánhiān suah liáuāu, Sènglêng to̍h līkhui! Siū Sènglêng koànak á sī Sènglêng tshiongmóa ê sìntô͘, tsin tsē lâng kàu siōng bóe sī bē titkiù, kah tsin tsē ê Kolînto sìntô͘ kângkhoán. Inūi Sènglêng ē līkhui, Sènglêng to̍h bô huattō͘ ū tsi̍tê únkò͘ ê tīntē, ētàng hō͘ i puttoān tī sí singkhu ni̍h tsōe ê lu̍t, kàu siōng bóe, kású Sènglêng bô koh lâi, á sī tsin tsió lâi, tsitūi sìntô͘ to̍h lûnlo̍h ji̍pkhì pī khìsak ê sèkài tiong!

Lán ittēng tio̍h tsaiiáⁿ, "Sènglêng koànak á sī tshiongmóa" pēng m̄sī "Sènglêng lāitsū", tse sī nn̄g hôesū, mā sī Kitokkàu kài kongjīn ê Sènglêng ê nn̄g bīn tsokiōng. Tú bat Sènglêng ê lâng tiāⁿtiāⁿ kā in tshamtshap, kā in tòngtsò sī tsi̍thôe sū, siōng bóe to̍h hāi liáu kakī, hō͘ kakī thêng t ī"Sènglêng koànak á sī tshiongmóa" ni̍h, pa̍kkha -pa̍ktshiú bē tsìntsêng, á sī kakī lia̍htsò boántsiok; kàu siōng bóe m̄tsai iáu ū tsi̍tê koh khah koân kéngkài ê "Sènglêng lāitsū" thang tuikiû. Kantaⁿ tsaiiáⁿ "Sènglêng koànak á sī tshiongmóa" á m̄bat "Sènglêng lāitsū" ê lâng, ē khòaⁿ m̄bat Páulô ê Lômá Su ê tē 7 tsiuⁿ kah tē 8 tsiuⁿ, inūi Lômá Su tē 7, 8 niú tsiuⁿ sī kóng Sènglêng lāitsū ê hùntsiàn tsōnghóng ê, tùi sutīn kàu phahiâⁿ, tshingtshing-tshótshó tshintshiūⁿ tsi̍t pak tô͘. Lômá Su bô huattō͘ ēng "Sènglêng koànak á sī tshiongmóa" lâi káisueh, te̍kpia̍t sī kóng honggiân ê hiānsiōng lâi káisueh. Khósioh ū bó͘ tsi̍tê kàuhōe ê láutōa kèngjiân ēng kóng honggiân ê kinggiām lâi káisueh Lômá Su, i só͘ tù ê tsheh to̍h m̄tio̍h tsi̍t tōatui!

Góa kiàngī sìntô͘ tùi kakī sī m̄sī íking "Sènglêng lāi（éng）tsū", tio̍h ē kínsīn phêngkó͘. Tshianbān m̄thang kā kakī phêngkó͘ kòethâu koân, ētàng ūi kakī póliû tsi̍tê thang tuikiû tsìnpō͘ ê khongkan, tshianbān m̄thang jīnûi ū sio̍klêng insù, to̍h kóng siáⁿmi̍h lóng bat, sīmtsì kóng siáⁿmi̍h lóng ū. Pitkèng tongkim ê sèkài, Gō͘sûntseh Kàuphài tōa hing, tsoânkiû ētàng kóng honggiân ê lâng khióngkiaⁿ ū tshing bān ê jînsò͘ ísiōng, tsiahê ētàng kóng honggiân ê lâng, ū tsintsiàⁿ "Sènglêng lāitsū" ê khióngkiaⁿ bē tshiaukòe kúi tshing lâng!

──2019, 04, 0 8 tah tī "Kitokkàu Thongsìn"