《宋澤萊新著《天路拾穗》TOJ/台灣字版》

 | | | 轉寄

Tsútê 35：Koh tsài tâm Sènglêng lāitsū（éngtsū）ê honghuat, phiatpō͘

作者 Sòng Te̍klâi 2026.11.01

Tsútê 35：Koh tsài tâm Sènglêng lāitsū（éngtsū）ê honghuat, phiatpō͘

Ū lâng kóng, hoānnā sìn Iésu, lânglâng lóng ētàng Sènglêng éngtsū. Tsitê kónghuat m̄tio̍h! Tsìtsió góa to̍h bô huattō͘ ánne. Inūi góa píkàu khah pūn, ittēng tio̍h tán kàu sìn Iésu liáuāu 23 nî tsóiū, Sènglêng tsiah lāitsū tī góa ê singkhu ni̍h.

Mā ū lâng kóng, siūsé liáuāu, lânglâng lóng ētàng Sènglêng éngtsū. Tsitê kónghuat mā m̄tio̍h! Tsìtsió góa to̍h bô huattō͘ ánne. Góa ittēng tio̍h tán kàu siūsé liáuāu 10 kúi nî tsóiū, Sènglêng tsiah éngtsū tī góa ê singkhu ni̍h.

Koh ū lâng kóng, ētàng kóng honggiân, ū ībāng īsiōng, lânglâng lóng ētàng Sènglêng éngtsū. Tsitê kónghuat mā m̄tio̍h! Góa sing ū ībāng īsiōng, liáuāu koh ētàng kóng honggiân, khiok ittēng tio̍h tán kàu kúinā nî liáuāu, Sènglêng tsiah éngtsū tī góa ê singkhu ni̍h.

Kìjiân ánne, lán to̍h ài ū tsi̍tkóa honghuat, hō͘ Sènglêng khah tsá éngtsū. Lán kántan lâi tâm tsi̍tkóa honghuat. Tùi tsi̍tê iáu kiâⁿ tī Thianlō͘ le̍kthêng téngbīn ê Kitoktô lâi kóng, khógiām kah bôaliān sī tōa ê. Bó͘ tsi̍tkóa sìntô͘ suijiân íking tshinggī titkiù, m̄koh tī hêngûi siōng tsóng sī bē ha̍h kakī ê ìsù, bó͘ tsi̍tkóa hoāntsōe ê ìliām kah hêngûi iûgoân kahná hūsin ê tshi, ânân khúnpa̍k kakī. Ūsî tī bó͘ tsi̍tê Tōahó ê ê sîtōaⁿ, lán kahná kiâⁿ tī ji̍tkng tāitō tsi hā, kámkak kakī ētàng sià lo̍h tāngtàⁿ, phuntsáu tī sîn ê lō͘ ni̍h; m̄koh, tī bó͘ tsi̍tê bô hó ê ê sîtōaⁿ, lán khiok kámkak bô la̍t lâi tùikhòng siâok, kámkak kiâⁿ tī tsi̍t tiâu kah SiōngTsú pōelî ê lō͘tô͘ tiong. Tse sī inūi Sènglêng ūsî ē lâilîm tī sìntô͘ ê singkhu téng, m̄koh ūsî Sènglêng ē koh līkhui ê iânkò͘, tse to̍h m̄sī lāi（éng）tsū ê hiānsiōng.

Tûliáu tsintsiàⁿ Sènglêng lāi（éng）tsū ígōa, Sènglêng sī ē tétsiām līkhui sìntô͘ ê singkhu. Peteloh Tsiânsu 4：14 kóng, "inūi SiōngTsú êngkng ê lêng, siông tsū tī lín singkhu téng." Só͘ūi ê "siông tsū" to̍h sī "tiāⁿtiāⁿ tòa", ū àmsī ūsî bô thêng tī lán ê singkhu téng. Iôhaneh Hokim 15：5, Iésu kóng," Góa sī phûtô tshiū, lín sī ki. Tiāⁿtiāⁿ tī Góa lāibīn ê, Góa mā siông tī i lāibīn, tsitê lâng tsiū kiat kóetsí tsētsē; inūi līkhui Góa, lín to̍h bô huattō͘ tsò siáⁿmi̍h." Só͘ūi "tiāⁿtiāⁿ tī" to̍h àmsī ūsî "bô tī". Siphian tē 51 phiⁿ 11 tsat Tabi̍t kóng, "M̄thang khìsak góa, hō͘ góa līkhui Lí ê bīn; m̄thang tùi góa siuhôe Lí ê Sènglêng." Mā ū bêngpe̍k piáusī Sènglêng ē līkhui sìntô͘ ê singkhu.

Tshòngsè Kì 6：3 kóng tio̍h SiōngTsú, kóng, "Lâng kìjiân sio̍k hia̍tkhì, Góa ê lêng to̍h bē éngoán tòa tī i lāibīn." Sūsu Kì 16 tsiuⁿ kóng tio̍h Sâmsóng pī thauthau'á tsián khì 7 tiâu huatsok liáuāu, i ê khùila̍t to̍h līkhui i, inūi "SiōngTsú íking līkhui i ā!".

Tng Sènglêng lâi kàu singkhu ê sî, tongjiân lán ētàng tittio̍h SiōngTsú ê pangtsō͘, kahná kiàn tsiàn kiàn iâⁿ, kiàn kong kiàn phòa, lán ētàng tétsiām khikho̍k tsōehêng; m̄koh ittàn Sènglêng tétsiām līkhui, lán to̍h koh hām lo̍hkhì ko͘ kun ê hùntsiàn tiong, kahná hām lo̍hkhì làm’á tē, ba̍ktsiu kimkim khòaⁿ tsōehêng, m̄tsai beh ántsóaⁿ tsiah hó.

Kìjiân ánne, lán kiùkèng tio̍h ántsóaⁿ tsiah hó leh? He to̍h sī teh siū khógiām kah bôaliān ê sî, piktshiat ǹgbāng Sènglêng ê éngtsū, tio̍hsǹg tī tshun tsi̍t kháu khùi ê sî, éngoán lóng m̄thang bēkìtit ū tsi̍t kang Sènglêng bē kohtsài līkhui góa ê singkhu, I ē éngtsū tī góa ê singkhu ni̍h, tòa lâi itsing ê pêngan, hílo̍k, kiat tshut móamóa ê Sènglêng kóetsí. Lán ánne ânân lak tiâu ǹgbāng, tsiongkîbóe ū tsi̍t kang, Sènglêng kójiân to̍h éngtsū tī góa ê singkhu ni̍h à.

Ǹgbāng, jímnāi to̍h sī lán ê tsi̍t tsióng honghuat, phiatpō͘!

Góa kí tsi̍tê lē：Tī lán ê jînsing tiong, tsóng ū tsi̍tkóa tùi lán ū intián ê lâng, in tiāⁿtiāⁿ tsiâⁿtsò lán só͘ hoâiliām ê tùisiōng, siūⁿkhí tsiahê lâng, lán ê simlāi to̍h tshiongmóa kámsiā kah unloán, tùi sèkài tshiongmóa sìnsim. M̄koh mā ū bē tsió lâng sī hō͘ lán kámkak thònghūn, thòngkhó͘ ê lâng, tsiahê lâng sionghāi góa, hō͘ góa tshinsin kámsiū tio̍h kahná hāmlo̍h tī tēga̍k itpuaⁿ ê thòngkhó͘, inūi tsiahê lâng, góa tsiū ánne sit khì tùi bíhó sèkài ê sióngsiōng, góa kámkak sèkài to̍h sī tēga̍k! Tāitsì tongjiân tsá to̍h íking kòikhì, m̄koh góa tùi tsiahê lâng tsóng sī bô huattō͘ pàng bēkìtit. Te̍kpia̍t sī hit kóa sionghāi kòe góa ê lâng, tī góa ê sèⁿmiā tiong iûgoân ū ke̍k tōa ê sèle̍k, tsi̍t siūⁿkhí in, góa to̍h thòngkhó͘ kah bē khamtit. Kitoktô ê góa, tongjiân ētàng khòtio̍h Iésu ê le̍kliōng, goânliōng hit kóa sionghāi kòe góa ê lâng, sīmtsì ētàng siōng Iésu só͘ kóng ê, goânliōng in 70 ê 7 pái; m̄koh m̄thang bēkìtit, suibóng tī goânliōng in ê sî, góa tsiāmsî kámkak khinsang, káithuat; tsóng sī góa mā tsaiiáⁿ, in iáu sī ē tńglâi góa ê náuhái. Góa tio̍hsǹg tsitmá bô beh siūⁿ in, kúi kang liáuāu iáu sī ē siūⁿ tio̍h; tio̍hsǹg ji̍tsîthâu lóng bô siūⁿ tio̍h in, tsòbāng mā ē bāng tio̍h. Hit sî, góa koh hām lo̍hkhì siûhūn kah àunáu ê tiongkan, góa khó͘ bētit thang kā in thâi sí! Góa tsóng sī hoán lâi hoán khì, goânliōng koh hoâihūn, hoâihūn koh goânliōng, bô oânkiat ê tsi̍t kang. Peteloh Hō͘su 2：22 kóng, "Ti sé tshingkhì à koh tńgkhì nòa lō͘kô͘moâi." Tsitkù ōe tongjiân sī mē lâng ê ōe, m̄koh, tùi sìn Iésu ê góa lâi kóng, khiok sī bôpí tse kohkhah siktòng.

Tsit sî, hām lo̍hkhì khó͘kéng ê góa kaitong tio̍h ántsóaⁿ? Tsia kantaⁿ ū tsi̍ttiâu lō͘, to̍h sī piktshiat ǹgbāng Sènglêng éngtsū tī góa ê singkhu, tsi̍t sî'á to m̄thang līkhui góa. Halélú'iah! Kàu Sènglêng éngtsū ê hit sî, góa to̍h bānbān'á thuatlī tsōeliām kah tsōehêng ê khúnpa̍k, tsi̍t pái pí tsi̍t pái koh khah tsìnpō͘! Inūi, suijiân kiaⁿ o͘ ê góa ta̍k kang lóng ē tú tio̍h o͘àm mê, m̄koh tsíiàu góa ētàng éngoán la̍k ū tsi̍t tiámtiám’á ê kng, khòtio̍h i éngoán ê tsiòkng, to̍h ētàng hō͘ o͘àm éngoán bē kīnóa sinpiⁿ, to̍h bô koh kiaⁿ siáⁿmi̍h o͘àm mê ê khúnpa̍k loh!

Tûliáu téngbīn só͘ kóng ê ǹgbāng ígōa, lán iáu ū siáⁿmi̍h thang tsò ê leh?

Tsi̍tê honghuat sī tha̍k king. Te̍kpia̍t sī tùi sèngking ni̍h ê Páulô susìn ittēng tio̍h tiāⁿtiāⁿ tha̍k. Tshiūⁿ Lômá su tē 7 tsiuⁿ, hit tsióng Sènglêng ê lu̍t kah tsōe ê lu̍t ê kautsiàn tsōnghóng, to̍h sī lí só͘ beh tsìnji̍p ê Sènglêng éngtsū ê tsho͘pō͘ tsōnghóng. Kású lí ê siuióng ētàng tsìn tsi̍t pō͘, tùi tē 7 tsiuⁿ kiâⁿ ji̍p khì tē 8 tsiuⁿ ê sî, to̍h puttikliáu. Hit sî, Sènglêng ê lu̍t to̍h ētàng oântsoân tsèho̍k tsōe ê lu̍t; tsit sîtsūn iā to̍h sī SiōngTsú teh beh tsià tio̍h Sènglêng kā I éngsing bē sí ê sèⁿmiā siúⁿsù hō͘ lí ê tiāuthâu!

Lēnggōa iáu ū tsi̍tê honghuat sī ke kah lāu tsiânpòe kóngōe. Tsin tsē itsing khiânsêng sìn Iésu ê lāutōalâng, lóng ū Sènglêng éngtsū ê kinggiām, lí ittēng tio̍h tshōe in kóngōe. Siàuliân ê Kitoktô tsóng sī kah'ì tsi̍t tōatui lâng tsūtsi̍p tsòhóe, taptshùikó͘ kóng tshiò, tiongkan khiok bô jīmhô tsi̍t ūi lāutōalâng, tse to̍h ē hō͘ lí tsia̍h tōa khui! Ētàng Sènglêng éngtsū thongsiông lóng sī itsing khiânsêng sìn Iésu ê kiatkó, kantaⁿ ū tshōe tsiahê lāu tsiânpòe tâm, lí tsiah ē tsìnpō͘, jîtshiáⁿ ētàng hō͘ lí thêtsá tsìnji̍p Sènglêng éngtsū ê sînsèng kinggiām ê tiongkan!

──2014, 07, 08 tah tī "Kitokkàu Thongsìn"
──2017, 09, 29 lio̍k káisiá