《宋澤萊新著《天路拾穗》TOJ/台灣字版》

 | | | 轉寄

Tsútê3： Hō͘ Iésu i hó

作者 Sòng Te̍klâi 2025.12.14

Tē it pō͘ Tshinggī titkiù
Tsútê 1, Góa ūisiáⁿmi̍h beh sélé? _3
3. Hō͘ Iésu i hó
Tútú góa kóngkòe, tongsî, góa ê singkhu ū pēⁿ. Tàuté sī siáⁿmi̍h pēⁿ leh? To̍h sī giâmtiōng ê ūi sng siuⁿkòe tsē, ūsî ē ik kàu nââu thâu ê pēⁿtsèng. Goânin sī tongsî hāubū bôêng, tsi̍t bôêng khí lâi, óngóng bô sîkan tsia̍hpn̄g, á sī kèngjiân bēkìtit tsia̍hpn̄g, sîsiông khang paktó͘ teh siōngkhò. Kā sèhàn gín'á siōngkhò 50 hun tsing liáuāu, to̍h huatkiàn ūisng ik khí lâi, kuiê nââu lóng sio koh thiàⁿ khí lâi. Āu lâi kèngjiân tùi simtsōng ê pō͘ūi thiàⁿ khí, itti̍t thiàⁿ kàu khatsiah sim, kahná hō͘ tsi̍t ki lāi to tu̍h thàngkòe, thiàⁿ kah kuiê simtsêng lóng sok khí lâi; thiàⁿ ê sîkan lóng tsin tn̂g, iākan ittàn huattsok, tiāⁿtiāⁿ sī kui mê teh thiàⁿ.
Inūi tú khaisí bē liáukái tse sī siáⁿmi̍h pēⁿ, tsóng sī kùtsāi i thiàⁿ. Ū tsin tsē pêngiú tsaiiáⁿ góa tiāⁿtiāⁿ ū ke̍klia̍t ê thiàⁿ, kinkì thiàⁿ ê tiám kéngkò kóng, góa khólêng íking hoān tio̍h simtsōng pēⁿ. Ū tsi̍t pái, ēkìtit sī jua̍hthiⁿ ê tiongtàu sî, góa tī jī lâu tshehpâng khòaⁿ tsheh, thiàⁿ koh khaisí à, iûgoân sī tùi simtsōng thiàⁿ kàu khatsiah sim, tìsú ho͘khip mā piàn kah khùnlân khí lâi, kuiê lâng lóng tio̍h kiu tsò tsi̍t oân. Góa giú khui í'á, tsē tī liângliâng ê tēpán, liáuāu sihsih-tsùn hō͘ kakī tó lo̍h lâi, siūⁿ beh hō͘ thiàⁿ kiámkhin, siōng bóe kahná sī khùn khì à. Tī būbū bô bêng ê ìsik tiong, góa kámkak kuiê singkhu pī thuh koân tī tēpán ê téngbīn, liáuāu sī tsi̍t ki tshiútsiúⁿ tī khatsiah sim khau tio̍h, kā khatsiahphiaⁿ kuiê khau khang, to̍h tshintshiūⁿ lán ēng thng hia'á kā tsi̍tê kue'á ê bah khau tshingkhì, kantaⁿ lâu kue'á phôe. Sîkan ingkai m̄ sī tsin tn̂g, kantaⁿ ēkìtit góa hutjiân tshingtshéⁿ, tōa kiò,"Iésu!"（inūi góa ti̍tkak tsaiiáⁿ he sī Iésu ê tshiú ）, góa tùi tēpán tsi̍tē'á khísin, huatkiàn thiàⁿ íking thêngtsí, kah bô thiàⁿ ê sî kângkhoán; góa kámkak tsin kiaⁿhiâⁿ giâugî, simlāi itti̍t teh mn̄g,"Ántsóaⁿ ē ánne?" Góa it sî tsi kan iáu m̄tsai kakī íking kah "Sù Hokim Su" ni̍h ê hōantsiá kângkhoán, kingle̍k tsi̍t tiûⁿ Iésu ê i pēⁿ.
Āu lâi góa siūⁿ, tī tōa thiàⁿ ê sî pēng bô kîtó Iésu lâi i pēⁿ, ūisiáⁿmi̍h ē ū tsitê kiatkó, bānbān'á tsiah siūⁿ tio̍h, góa tùi bat khòaⁿkìⁿ Iésu ê hit kiāⁿ sū bô bēkìtit, jîtshiáⁿ sîsî-khikkhik lóng ē tshuthiān tī góa ê náuhái; iáu ū hit sî Sènglêng tī ji̍tsiông singua̍h tiong iûgoân tsin kiônglia̍t teh ūnhêng tī góa ê sinpiⁿ, suibóng góa kîtó Sènglêng līkhui góa, m̄koh I pēng bô līkhui góa gōa hn̄g! Góa ê pēⁿ kám íking oântsoân hósè? Kîsi̍t bô. Āu lâi i koh huattsok, ū kúinā pái iûgoân tsin giâmtiōng, hō͘ góa tsin thòngkhó͘. Góa to̍h siūⁿ, sī m̄ sī góa ingkai kîtó kiû Iésu lâi i pēⁿ leh? Tsitê siūⁿhuat hō͘ góa hó͘ⁿtēng, tsúiàu goânin tsāi tī góa iáu m̄tsai tse sī siáⁿmi̍h pēⁿ, singua̍h si̍pkoàn mā bô káipiàn, tshiūⁿkóng góa iáu liânsòa tsia̍h sīn kiattsio̍h ê io̍h'á, singua̍h siuⁿkòe bôêng, simtsêng utbūn …… tsióngtsióng insò͘ lóng ē hō͘ pēⁿ koh giâ; nāsī Iésu koh tsi̍t pái lâi i pēⁿ, ē tsi̍t pái iáu ē koh huat, éngoán bē thêng. Inūi ánne, góa kîtó Iésu kóng góa beh tshâbêng tse sī siáⁿmi̍h pēⁿ, jîtshiáⁿ góa beh khaisí tshōe io̍h'á, kiû Iésu lâi pangbâng. Kójiân kúi kang íāu, góa tī tsi̍t hūn pòtsóa téngbīn ê kiānkhong nôa ni̍h tshōe tio̍h tsitê tsèngthâu ê sūsu̍t, goânlâi tsísī ūisng siuⁿkòe tsē ê tsèngthâu, góa tsiū ánne to̍h khì bé "Ūiling", tsíiàu thiàⁿ khí lâi tsi̍t tsia̍h, to̍h bē thiàⁿ à. Tsit hāng tāitsì sī teh suatbêng siáⁿmi̍h? I kā lán kóng, tng SiōngTsú siūⁿ beh kiùtsō͘ lí ê sî, tio̍hsǹg lí bô kîtó, I mā ē kiù lí, tio̍hsǹg lí pháiⁿsè lôhoân I, kiû I līkhui, I iáu sī ē lâi tsiàukò͘ lí, tiāmtiām tī sinpiⁿ teh pósiú lí, pēng bô līkhui lí siuⁿ hn̄g. Tôngsî, góa mā tio̍h thêtshéⁿ tsi̍tkóa kantaⁿ óakhò sînjiah i pēⁿ, khiok bô phahpiàⁿ tshâbêng pēⁿin teh tshōe iio̍h ê lâng, tshianbān m̄thang lia̍htsún SiōngTsú i lí tsi̍t pái to̍h ētàng oântsoân hósè, inūi lí ê singua̍h bô káipiàn, lí ê pēⁿ koh huat sī lânbián, tse m̄thang koài SiōngTsú, kantaⁿ ētàng koài lí kakī. Nāsī lí ittsài kiû SiōngTsú lâi tīliâu lí, to̍h piànsêng bōngkiû, SiōngTsú pēng m̄ sī lí ê lô͘po̍k, I bô múipái lóng ūi lí i pēⁿ ê gībū. Lí siōng hó kîtó I hō͘ lí tshōe tio̍h io̍h, kā pēⁿ i hó, tôngsî tio̍h siàbián só͘ū ê siûte̍k, sīmtsì sàng lémi̍h hō͘ bat hō͘ lí hūn kòe ê lâng, hō͘ singua̍h kah simtsêng piànsêng khailóng, tsit tsióng tsiah hûha̍p "thiⁿ tsō͘ tsūtsō͘" ê tōlí, pēⁿ mā tsiah ētàng tsi̍t pê tsia̍h kàu tangbóe. Kású m̄ phahpiàⁿ, SiōngTsú mā bô pānhuat. Góa iáu ū hō͘ SiōngTsú i pēⁿ ê lē íki̍p kîtó tshōe io̍h ê sū lē, tī tsia bô beh kóng.