《宋澤萊新著《天路拾穗》TOJ/台灣字版》

 | | | 轉寄

Tsútê2：Ū phongphài ê Sènglêng kàng lo̍h lâi

作者 Sòng Te̍klâi 2025.12.07

Tē it pō͘, tshinggī titkiù 2） Ū phongphài ê Sènglêng kàng lo̍h lâi Téngbīn só͘ kóng tsiahê tōlí, lóng sī liáuāu góa tsiah bānbān'á liáukái ê; hit tongsî, góa siáⁿmi̍h mā m̄tsai. Ēkìtit tāiiok tsi̍t lépài liáuāu, koh tī ha̍khāu khòaⁿ “sèngking". Tsit pái khòaⁿ “Tshòngsè Kì”, iā to̍h sī sèngking ê siōng thâutsêng kúi kù ōe, “sèngking “ sī ánne kóng, " Goânkhíthâu, SiōngTsú tshòngtsō thiⁿ kah tē ê sî, tē sī khangkhang hūntūn, tshimian ê téngbīn o͘àm; SiōngTsú ê lêng ūnhêng tī tsúibīn." Tng góa khòaⁿ tio̍h "SiōngTsú ê lêng ūnhêng tī tsúibīn" tsit kù ōe ê sî, huisiông huaⁿhí. Hutjiân, góa ìsik tio̍h “thianlêng kòa” kahná phahm̄kiàn khì, thâukhak téng khangkhang khì à, ū tsi̍tê tsin tōa ê le̍kliōng kàng lo̍h lâi, piànsêng tsi̍tê khòaⁿ bētio̍h ê tōa "si̍tthé" khiā tī góa ê āubīn, kahná tsíiàu tshiú tsi̍t tshun kàu pōeāu, to̍h ētànḡ bong tio̍h I; m̄koh tsintsiàⁿ khì bong ê sî, koh bong bē tio̍h. I tsin koântōa, tshiongmóa jia̍tla̍t, tsèngkhì límlím. Tongsî, góa ê singkhu ū pēⁿ, tsingsîn ithiòng bô hó, m̄koh pī tsitê si̍tthé esin óakīn, suah kámkak kiâⁿlō͘ ū hong, kóngōe tsin ū phikle̍k, tsísī góa m̄tsai tsitê "si̍tthé" sī siáⁿmi̍h. Góa tsin hò͘ⁿkî, siūⁿ beh kā tsitê tsōnghóng tshòng hō͘ i tshingtshó, tsiū ánne tsiūⁿmn̂g pàihóng, hiòng "Tēhng tsūhōe só͘" ê kàuiú, "Tsin Iésu kàuhōe" ê thoântō, " Lêngniûtông " ê bo̍ksu tshéngkàu tsitê tsōnghóng, suijiân góa tsin jīntsin kóng tse sī "ua̍ttho̍k sèngking" ê kiatkó, m̄koh tāikhài in ū in ê khiànsńg kah kuitēng, tsóng sī o͘liông-se̍htoh, m̄ káⁿ tsiàⁿbīn hôetap tse sī siáⁿmi̍h. Góa kóng, "Lí khòaⁿ, I huisiông koântōa, hóejia̍t ū la̍t, tsèngkhì límlím, íking tī góa ê pōeāu khiā tsin kú à, khòaⁿ khí lâi iáu beh kèsio̍k lo̍h khì, tshaputto tī góa ê singkhu āu pòaⁿê tshiúkó͘ hn̄g ê só͘tsāi, lín ê kàuhōe ê lâng kám mā ū tsitê kinggiām?" M̄koh, in iáu sī kóng tsi̍tkóa bô kuanhē ê ōe. Siōng bóe, góa iûgoân sitbōng tńgkhì tshùni̍h. To̍h tī tē saⁿ kang ê sî, góa ìsik tio̍h bētàng ánne hō͘ I ūi góa lôkhó͘, tôngsî, inūi I khiā tī āubīn, hō͘ góa ê singua̍h m̄ káⁿ sûipiān, kiaⁿ kā I sià bīntsú, góa to̍h kîtó kóng, "Góa íking tsaiiáⁿ Lí sī siáⁿlâng, Lí to̍h sī Sènglêng! ūitio̍h beh hō͘ góa liáukái Lí ê tsûntsāi, Lí tsiū ánne tùi góa hiánhiān saⁿ kang, góa tio̍h kámsiā Lí. Khósioh góa iáu beh singua̍h lo̍h khì, ji̍tsiông singua̍h ū tsin tsē bô hongpiān, só͘í góa beh tshiáⁿ Lí līkhui, góa siūⁿ Lí ittēng liáukái góa ê ìsù." Ánne kóng oân, I kójiân siausit tī góa ê singkhu āu, koh khah ántsóaⁿ to hō͘ góa kīn kīlî kámkak bē tio̍h à. Tsitê kinggiām teh suatbêng siáⁿmi̍h leh? To̍h sī teh kā lán kóng, tng lí siongsìn "Iésu síkhì kohua̍h" liáuāu, Sènglêng to̍h ē kàng lo̍h lâi ê tsitê sūsi̍t. “Sùtô͘ Hêngtoān” bêngbêng-pe̍kpe̍k ū kìtsài, tng tsèng sùtô͘ tsùbo̍k teh bāng thiⁿténg, ba̍ksàng Iésu tsiūⁿthiⁿ ̄liáuāu, kàu "Gō͘sûntseh hit kang, in to̍h tsūtsi̍p tī tsi̍tê só͘tsāi. Hutjiân ū siaⁿim tùi thiⁿténg lo̍h lâi, kahná tsi̍t tsūn tōa hongthai sàukòe ê siaⁿim, tshiongmóa in teh tsē ê kuiê tshùthe̍h. In koh khòaⁿkìⁿ hêngtsōng tshintshiūⁿ hóeiām ê tshùitsi̍h, sòaⁿkhui, thêng lak tī múi tsi̍tê lâng ê singkhu téng. In lóng hō͘ Sènglêng tshiongmóa, àntsiàu Sènglêng só͘ sù ê tsâilêng kóngkhí pa̍ttsióng ê gígiân lâi". Tse to̍h sī sêngjīn "Iésu síkhì kohua̍h" kah "Sènglêng kànglîm" tsi kan ê ittēng tia̍tsū. Tsòikīn, tsitê lē koh huatsing tsi̍t pái, ū tsi̍t pái tsákhí, “Tâioân e bûngē" ê tsúpian Ô͘ Tiôngsiông siansiⁿ lâi kàu góa ê tshù, i tùi Tshingtāi Tsusìn giánkiùsó͘ pitgia̍p, tsitmá ho̍kbū tī Hoàn’a tiānsìn, i mā sī bo̍ktsêng Tâioân siōng iusiù ê siósuat ka tsi it. Tng i thêkhí Kitokkàu, góa to̍h kā i kóng, "Kitokkàu ê ògī tsoânpō͘ lóng lôngsok tī 'Iésu síkhì kohua̍h' téngbīn, i sī phahkhui thiantông ê tsi̍t ki sósî. Lí kám ē siongsìn Iésu síkhì kohua̍h?" I hôetap kóng, "Góa tsá to̍h siūⁿkòe à, góa ētàng siongsìn." Tongsî, pēng bô sûisî huatsing siáⁿmi̍h kîkoài ê tāitsì, m̄koh tán i tńg khì liáuāu, kàu àmsî, i huatkiàn kuiê lâng lóng piàn à, i tī tiānōe tiong kā góa kóng, "Góa huatkiàn tsitmá ê góa kah tsìntsêng ê góa oântsoân bô kângkhoán loh, huisiông thóià tsìntsêng ê kakī." Lán tsaiiáⁿ, tse to̍h sī Sènglêng khaisí tī i ê singkhu téng teh tāngkang, hō͘ i khaisí ū hóikái kingsin ê hiānsiōng, i ê kū lâng íking bānbān’á teh káipiàn, tsoánpiàn tsiâⁿtsò ū sìngióng ê lâng. Góa to̍h kà i khaisí tsò "Sènglêng ê kîtó", mā to̍h sī tī tshùi tiong liânsòa itti̍t tshingsiōng "Halélú’iah, oló Tsú Iésu" tsit kù ōe. Kiatkó, Sènglêng koh khah phongphài kàng lo̍h lâi, i sûisî kóng tshut honggiân; liáuāu, ta̍k pái lóng ētàng sú'iōng honggiân kîtó tsi̍t, nn̄g tiámtsing kú. Lí khòaⁿ, tse to̍h sī só͘ūi ê "lêng sé" ê kànglîm, tī kúi kang lāi, i m̄nā kingle̍k tio̍h "sìngióng" ê si̍ttsè, jîtshiáⁿ kingle̍k tio̍h tsi̍t tsióng "hóeiām tshùitsi̍h" ê sélé, hn̄ghn̄g tshiautshut itpuaⁿ ê tsìmlé. Sèkài siōng tsin hántit ū tsiahni̍h honghù ê biánhùi tiongtàutǹg, Iésu tsi̍tsut'á to bô póliû, tsò tsi̍tē kā tsiahni̍h tsē ê inhūi pe̍hpe̍h sù hō͘ sìn I síkhì kohua̍h ê lâng. Āu lâi góa mn̄g i, ūisiáⁿmi̍h i ētàng siongsìn Iésu síkhì kohua̍h, i kóng, "Góa sī ūniōng útiū ê po̍ktsà ê lílūn lâi kā i líkái." Tse to̍h sī teh suatbêng, jīmhô lâng siongsìn Iésu síkhì kohua̍h ê goânin sī bô kângkhoán, lí thang tshâkhó “sèngking", mā thang pîn lí ê tìhūi khì sukhó tsi̍t hôe, ti̍tkàu siūⁿ thong liáuāu, to̍h tsiâⁿtsò tsi̍tê Kitoktô, tsintsiàⁿ kántan. Halélú’iah, lán ingkai oló Tsú Iésu, tse ittshè ê kîtsik êngkng lóng kui tī I.