《宋澤萊新著《天路拾穗》TOJ/台灣字版》

 | | | 轉寄

Tsútê 2：Kì hó pêngiú Ông Sèhun sìn "Iésu síkhì kohua̍h" ê kò͘sū

作者 Sòng Te̍klâi 2026.01.11

Tē it pō͘ Tshinggī titkiù
Tsútê 2：Kì hó pêngiú Ông Sèhun sìn "Iésu síkhì kohua̍h" ê kò͘sū

Ông Sèhun hiaⁿ pí góa tōa 1 hòe, tshaputto tī 1975 nî tsóiū goán to̍h pítshú jīnbat à.

Hit sî, góa iáu tī Tâipak kokli̍p suhoān tāiha̍k teh tha̍ktsheh, inūi tn̂gnî phòapēⁿ ê kuanhē, góa khaisí siá siósuat lâi siautháu sinsim ê thòngkhó͘. Hit sî góa tāiha̍k sì nî, siá tn̂gphiⁿ siósuat "Hùi hn̂g", jîtshiáⁿ kā siósuat tâu hō͘ tsúpian "Tâioân Bûngē" ê Tsiong Tiāutsèng siansiⁿ. Hit tongsî, “Tâioân Bûngē” sī tsi̍t pún huisiông sè ê khanbu̍t, tshaputto 50 ia̍h jîí, tongjiân bô huattō͘ khanting tn̂gphiⁿ siósuat tī téngbīn. Tsiong Tiāutsèng siansiⁿ to̍h pàithok Âng Sénghu hiaⁿ kah Ông Sèhun hiaⁿ kā kókiāⁿ tòa tńglâi SuTāi hêng góa. He sī goán siōng tsá ê jīnbat, tongsî, goán lóng iáu sī jītsa̍p hòe tshutthâu ê tshingliân lâng, tùi bûnha̍k tshiongmóa jia̍ttsêng.

Tshúāu, i itti̍t tī pò kài tsò kìtsiá, goán mā itti̍t sī tsin ū tshimkau ê pêngiú. Tī 1979 nî Bílētó sūkiāⁿ liáuāu, i ìgōa ta̍hji̍p tsèngtī kài, tsò Tâitiong tshī gīoân, iûkî sī tī 1986 nî tsóiū, i kah goán kúiê pêngiú khaisí pān "Tâioân Sinbûnhòa Tsa̍ptsì", koh khah sī tôngtsiu-kiōngtsè. Tongsî sī "Bílētó Sūkiāⁿ"po̍khuat liáuāu ê tētshit nî, koklāi hoán Kokbîntóng ê tsinging tshaputto lóng pī kuaiⁿ ji̍pkhì kaⁿlô, púnthó͘ tsèngtī ūntōng tsìnji̍p huisiông "soksat" ê kaitōaⁿ, hoántùi le̍kliōng siū tio̍h khongtsiân ê tshòtsiat. "Tâioân Sinbûnhòa Tsa̍ptsì" siūⁿ beh phahphòa kìmkhī, iânsio̍k hoánkhòng ūntōng giânlūn, thang kóng sī pō͘pō͘ gûiki, tshaputto to̍h sī kiâⁿ tī lôga̍k ê pianiân, inūi tongsî Tsiúⁿ Kingkok iáu ua̍h leh, pe̍hsik khióngpò͘ iáu bûsó͘-puttsāi. Ông Sèhun hòngtáⁿ tshutjīm goán tsa̍ptsì ê siātiúⁿ, kású tsiâⁿsi̍t jiá hō, tēit ê pī kuaiⁿ ji̍pkhì kaⁿlô ê to̍h sī i!

Tse tsiāmtshiáⁿ mài the̍h. Iáu sī lâi tâm kóa goán ê tsongkàu sìngióng, Ông Sèhun sī tī 2000 nî ê nîtshe khaisí sukhó "Iésu síkhì kohua̍h" ê būntê, tsiū ánne piànsêng Kitoktô ê lâng!

Tongsî, Ông Sèhun tú tùi li̍phuat úioân siàjīm, tsúnpī kèsio̍k kohtsài hùntsiàn 2004 nî ê li̍phuat úioân soánkí. Hit sî, A’píⁿ tsóngthóng tsò Kokka Bûnhòa Tsónghōe ê hōetiúⁿ, phèngtshiáⁿ Ông Sèhun tamjīm hù pìsutiúⁿ.

Inūi tsiôngsū tsèngtī sī huisiông sinkhó͘ ê tāitsì, te̍kpia̍t ohtit pībián tio̍h kaupôe limtsiú. Tongsî, góa khòaⁿ tshut i ê sinsim tsōnghóng kah ítsêng ū kóa bô kângkhoán, íking hām lo̍hkhì tsi̍tê huisiông tshámtām ê tsōnghóng ni̍h. Lâng khòaⁿ khí lâi sī sán ê, bīnsik inūi tn̂gnî limtsiú, khòaⁿ khí lâi "la̍h n̂g" bē khamtit.

Tsìntsêng, i sī tsi̍tê huisiông khiânsêng ê lāu Hu̍tkàu tô͘. I sèhàn ê sî to̍h tiāⁿtiāⁿ kah i ê lāubú tshutji̍p Tâitiong ê "Hu̍tkàu Liânsiā" lé Pu̍t thiaⁿ king, āu lâi iû Lí Pénglâm kisū ūi i kíhêng kui’I ê gîsik, tsiâⁿtsò tsèngsik ê Hu̍tkàu tô͘, huathō "Hūikhîn", tsiâⁿtsò TāiSēng Hu̍tkàu ê sìntô͘.

I kui’i TāiSēng Hu̍tkàu ê goânin sī, tsū sèhàn tshinba̍k khòaⁿ tio̍h jînsè seⁿ lāu pēⁿ sí ê bôpiⁿ thòngkhó͘, ǹgbāng tsià tio̍h tsôngpài Sikkhiamô͘nî, lâi káitû i tùi síbông ê kiaⁿhiâⁿ.

Ông Sèhun tùi TāiSēng Hu̍tkàu ê sìngióng huisiông jia̍tsim, tī i ê siang tshiúoán téngbīn, lâu lo̍hlâi pī lo̍kthih só͘ sio tshut lâi ê tsi̍t tshoàn kàipa; tûliáu tse ígōa, i tī kakī ê tshù ni̍h, to̍h sī gīoân ho̍kbū tshù ê piahtó͘ téng ū kòa tsi̍t pak tsin tōa ê Omîtôhu̍t siōng, lâi piáusī bûtsīn ê kiongkèng.

1989 nî tsóiū, góa kah tsin tsē ê pêngiú tso͘sêng "Kinpún（SióSêng）Hu̍tkàu thoânthé", sinthé le̍khêng goânsí Hu̍tkàu ê "Ngó͘im kuantshat siuhēng huat", goán múi lâng kā kakī tāmpo̍h’á kú só͘ kuantshat ê simtik ēng ji̍tkì siá lo̍h lâi, tsi̍tsut'á to bô tshìntshái. Ông Sèhun sûisî kaji̍p goán ê thoânthé. Ū tsi̍t pái, Ông Sèhun tī tshan toh tsia̍hpn̄g gia̍p tshài ê sî, hutjiân huatkiàn i ê “Góa" phahm̄kiàn khì, iā to̍h sī sinsim kah bānmi̍h suijiân kah kòikhì kângkhoán tsiàusiông tsûntsāi, thang kóng to̍h sī tī kakī ê sinsim kah gōatsāi útiū tiong tshōe bē tio̍h kòikhì só͘ kámsiū ê hitê “Góa"; tsiū ánne, i tétsiām tsèngji̍p "bô góa" tiong ū kúi kang kú, "bô bêng" sûisî tétsiām pī sàu kah kngkngkng, tit tio̍h goânsí Hu̍tkàu só͘ kóng ê "sutôhoân kó ". Hit sî, i iáu tī tsèngtôaⁿ téngbīn tsin ua̍htāng, m̄koh, bô lâng ētàng khòaⁿ tshut tsitê tsèngtī jînbu̍t sī tsi̍t ūi Hu̍tkàu sutôhoân kó ê Sèng tsiá.

"Bô góa" ê théngō͘, khoàisok tòa lâi i tùi "Samhuat ìn" ê jīnti, káitû i tùi Omîtôhu̍t ê tsua̍ttùi sìngióng, tùi TāiSēng Hu̍tkàu ê pètuan hutjiân ū tshimkhik ê bêngpe̍k, sûisî liáukái "TāiSēng Hu̍tkàu ê Pu̍t" pēng m̄ sī "Sikkhiamô͘nî Pu̍t". I thiàuthuat TāiSēng Hu̍tkàu ê bêbū, kiâⁿ ji̍pkhì kah Sikkhiamô͘nî púnlâng kângkhoán ê kéngkài tiong.

M̄koh, Sikkhiamô͘nî ê "bô góa" kéngkài kám tsiū ánne káitû i só͘ū ê thòngkhó͘ kah kiaⁿhiâⁿ? Tapàn sī, bô! Hit sî, i sîsiông kā góa kóng, "bô góa" ê kéngkài sī tsiāmsî ê, ūtangsî'á tsiah ē tshuthiān, hit sî to̍h sī tsingsîn huisiông tshingbêng ê sî; m̄koh bô tshuthiān ê sî, “Góa" koh tshingtshó sánsing tshut lâi, tsōnghóng iáu sī tsin hāi.

Ông Sèhun ê tsitê khùnkéng, góa mā kingle̍k kòe; m̄koh, inūi 1990 nî tsóiū góa bānbān tsoánpiàn sìngióng ê honghiòng, tī sìn "Iésu síkhì kohua̍h" liáuāu, bô hó ê tsōnghóng káisiān bē tsió. Góa ê tsōnghóng sūsi̍t siōng pí i khah hó tsin tsē.

Góa iáu ēkìtit, 2000 nî goán bat tī kiàntio̍k ka Ông Tēngkok khuahkhuah ê Koksèng hiong ê tshù ni̍h kìⁿbīn. Hit sî, góa tùi I "la̍hn̂g" ê bīnsik khòaⁿ tshut i ê khùnlân. I kóng i iûgoân puttoān limtsiú, kantaⁿ iáu huisiông khiânsêng pài Omîtôhu̍t, sīmtsì sī tsáu piàn tsoân Tâioân ê biōsī khì pài kok tsióng ngó͘siōng, sīmtsì iáu siūⁿ beh kā Gîlân ê tsi̍t tsun "kim Mátsó͘" tshiáⁿ tńglâi tshù ni̍h kiònghōng, m̄koh i iáu sī puttoān limtsiú, bô huattō͘ kìmtsua̍t tùi kakī ê pháiⁿ si̍pkoàn, jú pài ngó͘siōng tsiú to̍h lim jú hiông, sinsim ê tsōnghóng jú lâi jú bē khamtit!

Góa tsaiiáⁿ, i huisiông hoânló limtsiú ē hō͘ i sitkhì sèⁿmiā!

Tongsî, góa to̍h tùi i kóng, "Ánne lah! Putjû tha̍k "sèngking" khòaⁿ māi, kái sìn Iésu khòaⁿ māi, bô ittēng tsōnghóng to̍h ē káipiàn."
I kóng, “Góa bô sèngking."

Góa kóng, “Góa kià hō͘ lí!"
Tsiū ánne, 2000 nî Tsiaⁿ Gue̍h, góa kā tsi̍t pún "sèngking" kià khì i ê tshù ni̍h.

I tha̍k “sèngking” liáuāu, bētàng bêngpe̍k lāibīn ê ìsù.
Tsiū ánne mn̄g góa kóng, "Ántsóaⁿ sìn Iésu?" Góa kóng, "Tsin kántan, tio̍h khòaⁿ lí kám ētàng siongsìn 'Iésu síkhì kohua̍h'. Kinkì “sèngking” kìtsài, Iésu sing pī tèngsí tī si̍pjīkè téng, bûntô͘ kā i tshú lo̍h lâi, tsòng tī hûnbōng ni̍h, m̄koh saⁿ kang liáuāu, i koh ua̍h khí lâi. Lí sing tha̍k “sèngking” ê “Sù Hokim Su” khòaⁿ māi, tsi̍t khòaⁿ kohtsài khòaⁿ, tshìkhòaⁿ kám ētàng tshōe tio̍h siongsìn I síkhì kohua̍h ê líiû, jîtshiáⁿ kā líiû kā góa kóng, he to̍h ēsái tit à!"

Góa koh kā Ia̍p Kongbêng bo̍ksu ê tsi̍t thò "kṳàu tsinlí" ê tsheh mā kià hō͘ i.

Tsi̍t kò gōa gue̍h liáuāu, i kā góa kóng, “Góa oântsoân ētàng sìn Iésu síkhì kohua̍h!"

Góa to̍h mn̄g, "Sī ántsóaⁿ?"
I kóng, “Góa khòaⁿ tio̍h “Sùtô͘ Hêngtoān” tē it tsiuⁿ, Iésu teh beh singthian ê sî, bat huanhù bûntô͘ kóng, ' Mài līkhui Êlúsalèm …… kòe bô kúi ji̍t, lín ài tī Sènglêng ni̍h siū tsìm …… Sènglêng kànglîm tī lín ê singkhu téng, lín to̍h ittēng ē tit tio̍h lêngle̍k, jîtshiáⁿ ài tī Êlúsalèm, Iûthài tsoân tē, Samálīa, ti̍tkàu tēke̍k, tsò góa ê kiàntsèngjîn. ' Lí siūⁿ khòaⁿ māi leh, nāsī Iésu m̄ sī SiōngTsú, I ántsóaⁿ ētàng tsaiiáⁿ Kitokkàu bīlâi ē thoân kàu sèkài kok tē? Tio̍hsǹg tsitmá ê lâmpak ke̍k, tsíiàu ū lâng, lóng ū lâng sìn I. Kìjiân I sī SiōngTsú, ántsóaⁿ bô huattō͘ kiò kakī síkhì kohua̍h?!"

Ông Sèhun tsiū ánne sìn "Iésu síkhì kohua̍h" tsit hāng tāitsì, líiû tônghông!

Góa púnlâi lia̍htsún Ông Sèhun ê sìngióng tsísī kháuthâu ê, tāikhài bē tshintshiūⁿ góa ánne siu tio̍h hāukó. Siáⁿlâng tsaiiáⁿ, tsi̍t tōaⁿ sîkan íāu, i khaisí ū ībāng, Sènglêng íntshōa bāng tiong ê i se̍h kho͘’á tī khongtiong pue, sinsim kámsiū tio̍h bôpí ê khoàilo̍k khinsang. Siōng līhāi ê sī, Sènglêng khaisí kā i koánkà, kā hóesio tēga̍k ê mn̂g phahkhui, hō͘ i khòaⁿ tio̍h sin hām hóesio tēga̍k ê lâng ê thòngkhó͘, jîtshiáⁿ giâmlē kā i kéngkò, nāsī kèsio̍k limtsiú, tsionglâi tiāⁿtio̍h ē hām lo̍hkhì hóesio tēga̍k tiong khì hō͘ hóe sio. Ông Sèhun siū tio̍h kéngkò, suijiân iáu sī ohtit kàitû tsiú giàn, m̄koh limtsiú ê hêngûi sûisî siuliám bē tsió.

2004 nî Gō͘ gue̍h, i kah i ê khantshiú, nn̄gê kiáⁿjî, ti̍t’á, ti̍t simpū, tsòhóe tī Tâitiong tshī Tāilí Sìngī kàuhōe siūsé, tsiâⁿtsò tsèngsik ê Kitoktô.

Tī hit nî ê nîbóe, Tâitiong tshī li̍phuat úioân ê kēngsoán huisiông kiklia̍t, Ông Sèhun tshamka kēngsoán, inūi phàihē ê būntê, Ông Sèhun hām lo̍hkhì khó͘tsiàn, kó͘kè nāsī ētàng tòngsóan, khólêng sī tòthâu sǹg ê tsi̍t, nn̄g miâ, tsōnghóng hō͘ lâng tsin kankhó͘ sim. M̄koh Sènglêng hō͘ Ông Sèhun tsi̍tê ībāng, kóng i ē í tējī miâ tòngsóan, tāike lóng jīnûi bô khólêng. M̄koh phiò khui tshut lâi liáuāu, i kójiân í tējī miâ tòngsóan, só͘ū ê lâng lóng liāusióng bē kàu.

Ông Sèhun só͘ niásiū ê ê Sènglêng insù sī hiahni̍h bênghián, tsiū ánne singkhu tsōnghóng káisiān tsin tsē. I tī kokhōe li̍phuat úioân ê pānkongsik piahténg khǹg tsi̍tê tōa si̍pjīkè, lâi piáusī tùi Iésu ê tsunkèng kah kámsiā.

Tsiū ánne, tsin tsē lâng lóng lâi tshéngkàu i ê sìngióng kinggiām, i mā íntshōa tsin tsē lâng khì siūsé.

M̄koh, i ê tsiúkông ê tsōehêng kám ū oântsoân káitû? Tapàn sī, iáubōe!

Tsitê goânin sī, Sènglêng iáubōe oântsoân tòa tī i ê singkhu ni̍h tsi̍t sîkhik to bē līkhui.

Ūi tio̍h bô ài hō͘ kakī ê tsiúkông ê tsōehêng kèsio̍k, i āu lâi tshōe tio̍h ētàng káisiān i ê hêngûi ê N̂g Kimtiân bo̍ksu, tòe N̂g bo̍ksu ha̍ksi̍p “sèngking” ê tōlí. N̂g bo̍ksu tshutsin tī sèngkiat kàuhōe, tùi sìntô͘ ê hêngûi iaukiû huisiông giâm, i ētàng hō͘ Ông Sèhun koh khah tōa ê khoànkài, te̍kpia̍t kautài i tio̍h tsù’ì “sèngking” ni̍h “Iâkop Su” ê lōeiông, tī hêngûi siōng kìmtsí kiâⁿ ok, lâi bánkiù kakī ê lêngmiā. Ông Sèhun kintòe lāu bo̍ksu ê kàutō, tsin ū sêngtsiū; te̍kpia̍t sī kúinā pái khì Êlúsalèm tiâusèng, āu lâi tshutpán "Tùi Saikáng kàu Êlúsalèm" tsit pún tiōngiàu ê sutsik.

2017 nî tsit nî, góa kā i kóng Sènglêng ētàng úntēng éng tsū tī tsi̍tê lâng ê singkhu ni̍h, hō͘ lâng tit tio̍h thiatté sántû tsōehêng ê tōa le̍kliōng. I "simsim-sioìn" tsiàu ánne tsò, kójiân huatkiàn Sènglêng lāi tsū tī i ê hingpak ni̍h, bô koh līkhui. I ittsài kuantshat, hutjiân huatkiàn hitê bih tī i lōetsāi ê "ài limtsiú ê góa" siausit khì à, kái tsiú piàn kah tsin iông’ī, tsiū ánne to̍h bô koh siū tio̍h tsiú giàn ê khòngtsè. Tsit sî, Sènglêng íking tī i ê lōetsāi tsò tsúlâng, lâng íking piànsêng "Sènglêng ê tiān", i beh kohtsài sûipiān limtsiú íking bô gōa khólêng ā; sīmtsì i beh tit tio̍h Iésu ê “Góa sī alfa, Góa sī omega, Góa sī tsho͘, Góa sī tsiong" ê sèⁿmiā, íking kahná sī tohténg ni kam à.

Ísiōng to̍h sī Ông Sèhun ê sìn "Iésu síkhì kohua̍h" ê kò͘sū.
Ông Sèhun thang kóng sī góa itsing ê hó pêngiú, pítshú huisiông se̍ksāi, iûkî sī tī sìngióng siōng, pítshú thêhê, hō͘siong ha̍ksi̍p, siūik tsin tōa.

I ê tsongkàu thianhūn kah insù lóng pí góa khah koân, siōng tōa ê te̍ktiám sī i hêngtōng kókuat koh ūla̍t. Tsánî i ēng sìtsa̍pgō͘ kang ê sîkan to̍h ētàng tsìnji̍p "bô góa" tiong, bô tshintshiūⁿ góa tio̍h khò tsēngtsē tshamsiân tsin tsē nî tsiah ētàng tùi "bô góa" ū kóa líkái. Āu lâi i mā sī iōngkong sìtsa̍p gō͘ kang, to̍h ētàng káitsong sìn "Iésu síkhì kohua̍h", só͘ tit tio̍h ê sio̍klêng insù mā pí góa khah tōa, iûkî sī Sènglêng kànglîm tī i singkhu téng, sûisî tio̍ktshiú káisiān i ê tsiúkông ê pháiⁿ si̍pkoàn; bô tshintshiūⁿ góa tsioktsiok hùisî 23 nî, Sènglêng tsiah khaisí lāi tsū tī góa ê singkhu, hō͘ góa liáukái kakī sī tsōeok kui singkhu ê lâng. Tsióngtsióng tsiahê lóng hō͘ góa tsūthàn putjû.

M̄koh, m̄kóan ántsóaⁿ kóng, goán lóng koktsū ū tsi̍t thò sìn "Iésu síkhì kohua̍h" ê kàugia̍h líiû, goán to̍h ittēng ētàng kiâⁿ tī SiōngTsú ê tsiokhok tiong, tse sī éngoán bô piàn ê. Ánne kóng khí lâi, lí ná ē bô beh sìn "Iésu síkhì kohua̍h" ê tsi̍t thò líiû leh?

──2017, 08, 11 tah tī "Kitokkàu Thongsìn"