《宋澤萊新著《天路拾穗》TOJ/台灣字版》

 | | | 轉寄

Tsútê 3：Kì hó pêngiú Ô͘ Tiôngsiông sìn "Iésu síkhì kohua̍h" ê kò͘sū

作者 Sòng Te̍klâi 2026.01.18

Tē it pō͘ Tshinggī titkiù
Tsútê 3：Kì hó pêngiú Ô͘ Tiôngsiông sìn "Iésu síkhì kohua̍h" ê kò͘sū

Ô͘ Tiôngsiông sī Tshinghôa Tāiha̍k tsusìn hē ê se̍ksū, tsitgia̍p sī tsi̍t ūi tsusìn ê kangtêngsu. I ētàng sìn "Iésu síkhì kohua̍h", sī tī góa ê ìliāu tsi gōa.

Tī 1995 ~ 1997 nî tsi kan, Ông Sèhun hiaⁿ kah góa tī tiongpō͘ pān "Tâioân sin bûnha̍k tsa̍ptsì ", tsa̍ptsì ê miâtshing sī iânsio̍k Ji̍t tī sîtāi Iûⁿ Kûi siansiⁿ tī tiongpō͘ só͘ pān ê "Tâioân sin bûnha̍k tsa̍ptsì". Goán ê bo̍ktik sī tōaliōng huatkiàn sin ê tsokka, hō͘ Tâioân bûnha̍k ê púnthó͘ hoánkhòng tsingsîn miāme̍h bē tìsú kah tn̄gtsām. Ēkìtit hit sî, góa tshōe tsin tsē bûnha̍k hēsó͘ ê tāiha̍k kàusiū, tshiáⁿ in siāukài in ê tsāiha̍k tētsú, ūi goán siá bûntsiuⁿ, bôlūn bûnha̍k tshòngtsok á sī bûnha̍k phênglūn, goán lóng ē tsīnliōng khanting. Só͘í "Tâioân sin bûnha̍k tsa̍ptsì" siàuliân hòa kah tsin līhāi, siá kó ê lâng tshaputto lóng sī jītsa̍p hòe kàu saⁿtsa̍p hòe tsi kan.

Ô͘ Tiôngsiông tongsî iáu teh tha̍ktsheh, jītsa̍p tshutthâu hòe. I sing lâi tshōe góa, bô gōa kú siá oân tn̂gphiⁿ siósuat "Tshâsuaⁿ siàuliân anhûn khik", kià lâi hō͘ góa.

Tsit phiⁿ siósuat tòa lâi hō͘ góa tsin tōa ê kámtōng.
Siósuat ê lōeiông sī biâusiá tsi̍tê siàuliân satjînhoān Tō͘ ThiⁿIóng tùi tshutsì, sêngtióng, hoāntsōe kàu síbông ê jînsing tété ê kò͘sū. Siósuat tshiongmóa tùi sèⁿmiā ê hoánséng, hiōhóe, íki̍p bûnāihô ê jînsing tsióngtsióng hoāntsōe púnsèng. Tī kui phiⁿ ê siósuat tiong, paukuat tsúkak Tō͘ ThiⁿIóng púnlâng, hoānnā khanliân tsāilāi ê lâng, bô tsi̍tê sī hēnghok ê, tsiahê ētsàn siāhōe ê Tâioân lâng lóng tà tio̍h tōa puthēng; iûkî sī Tō͘ ThiⁿIóng, i ū tōngbu̍t itpuaⁿ sianthian ê thó͘la̍t, m̄koh iâⁿ bē kòe kakī sianthian kôngpō ê sèngkeh kah phîkhì, kantaⁿ ētàng ittsài hoān m̄ tio̍h, siōng bóe sī síbông. Tse to̍h sī Huatkok siósuat tōa tsokka Émile Zola, Guy de Maupassant tsi̍t sìlâng só͘ beh piáuta̍t ê lâng ê singbu̍t ha̍k tsútê, bûnha̍k súsiōng kiòtsò "tsūjiân tsúgī" ê siósuat.

I bat tngbīn kā góa kóng, tsit phiⁿ siósuat ū kóa tsêngtsiat sī i ê sèⁿmiā kingle̍k.
Tsiahni̍h siàuliân ê siósuat ka kèngjiân ū tsiahni̍h tōa ê thàusī la̍t, ētàng hoánséng sèⁿmiā siōng kinpún ê būntê, si̍ttsāi tsin hō͘ góa kiaⁿhiâⁿ giâugî!
Tsit phiⁿ siósuat to̍h liântsài tī "Tâioân sin bûnha̍k tsa̍ptsì" téngbīn, āu lâi iû Tsiânōe tshutpánsiā tshutpán, bat tit tio̍h 1997 nî "Ông Sèhun bûnha̍k tsióng".

Tshúāu, i tsòping, kiathun, kèsio̍k siá siósuat, tī 2002 nî, tsoánhiòng Tâigí tshòngtsok, khaisí ua̍ttho̍k Jījīpat tsuliāu, susiá sio liânsòa ê Jījīpat sūkiāⁿ siósuat, biâusu̍t Tâioân lâng siōng puthēng ê ūnmiā kah tsogū, pitla̍t tshimkāu, ū pîntsún koh ū kinkì!

Goán ê ónglâi inūi ánne piàn kah koh khah tshinbi̍t.
2004 nî tsóiū, Tân Jîntsong bo̍ksu, Ông Sèhun hiaⁿ, Sêngtik huhū tiāⁿtiāⁿ lâi goán tau tsūhōe, thàmthó Iésu ê būntê. Góa tī Gō͘ gue̍h siūsé liáuāu, koh khah tiāⁿtiāⁿ tī Tsionghòa Kheô͘ Tìn Sìngīhōe kàuhōe tshamka lépài. Tsit sî, Ô͘ Tiôngsiông mā tiāⁿtiāⁿ lâi Lo̍kkáng tshōe góa, tsiū kah Sìngīhōe ê kàuiú pítshú jīnbat. Tôngsî inūi Ô͘ Tiôngsiông sī siá siósuat ê lâng, i tsìntsêng tongjiân khòaⁿkòe úitāi siósuatka Tolstoy ê tùtsok "Hokim su", tùi Iésu bēsái kóng oântsoân bô jīnbat.

Tāikhài sī inūi ánne, i sánsing tùi sìngióng Iésu ê hò͘ⁿkî.
Góa iáu ēkìtit ū tsi̍t pái, i hn̄ghn̄g tùi Kohiông lâi kàu Lo̍kkáng tìn ê goán tau, goán kóng tio̍h sìn Iésu ê ji̍pmn̂g honghuat.

Góa kóng, "Ji̍pmn̂g ê hongsik tsin kántan, to̍h khòaⁿ lí kám ētàng siongsìn 'Iésu síkhì kohua̍h' tsit hāng tāitsì. Inūi tsit hāng tāitsì tsin oh sìn, thongsiông lán suiàu tsi̍tê hó líiû, tsiah ētàng siongsìn. Líiû ittēng tio̍h kakī khì tshōe, nāsī lí ētàng tshōe tio̍h tsi̍tê sio̍k tī kakī ê bē bái ê líiû, tngbīn kā góa kóng, he to̍h ēsái tit à."

Ô͘ Tiôngsiông kóng, "Góa tshì khòaⁿ māi!"
Tāikhài kòeliáu tsi̍t kògue̍h á sī koh khah kú, i koh lâi kàu goán tau, goán koh khaisí tâm sìn Iésu ê ji̍pmn̂g honghuat. I kóng, "Kingkòe phahpiàⁿ sukhó, góa khaktēng góa íking ētàng sìn 'Iésu síkhì kohua̍h' tsit hāng tāitsì à!"

Góa ū kóa ìgōa, to̍h mn̄g ,"Tsiahni̍h kín! Líiû sī siáⁿmi̍h?"
I kóng, "Góa sī tùi 'útiū po̍ktsà' tsitê lílūn lâi thuilūn tshut 'Iésu síkhì kohua̍h' ê khólêng sèng."

Góa tsi̍t thiaⁿ, sûisî tsaiiáⁿ i kóng ê sī siáⁿmi̍h. Suijiân góa m̄ sī líkang kho ê ha̍ksing, m̄koh tùi "útiū po̍ktsà" ê lílūn iáu siókhóa ētàng líkái.

Lán tsaiiáⁿ, "útiū po̍ktsà" ê tōa phikle̍k kuantiám ánne kóng, "Útiū sī tī kòikhì iúhān ê sîkan tsìntsêng, tùi tsi̍tê bi̍ttō͘ ke̍k tōa jîtshiáⁿ untō͘ ke̍k koân ê thàitsho͘ tsōngthài iánpiàn jî lâi; kinkì 2013 nî Planck ōetsheⁿ só͘ tit tio̍h ê siōng hó kuantshik kiatkó, útiū tōa phikle̍k kàu tsitmá 137.98 ± 0.37 ik nî, jîtshiáⁿ kingkòe puttoān ê phòngtiòng lâi kàu kin'áji̍t ê tsōngthài. Khoha̍kka bat tshik tshut bo̍ktsêng tsheⁿhē kah tsheⁿ thoân tsi kan pítshú ê kīlî tú teh puttoān tsingtōa, lóng suatbêng in tī kòikhì bat kīlî tsin kīn. "Tùi tsitê kuantiám, bu̍tlí ha̍kka to̍h tsìntsi̍tpō͘ thuitshik tshut, "tī kòikhì útiū bat tshù tī tsi̍tê bi̍ttō͘ ke̍k koân jîtshiáⁿ untō͘ ke̍k koân ê tsōngthài, tsitmá tōa hêng lia̍ptsú kasok khì tī lūisū tiâukiāⁿ hā só͘ tsìnhêng ê si̍tgiām kiatkó, mā tsin ū la̍t tsitshî tsitê lílūn. Nā bô, ū tsi̍t kang, útiū ē thêngtsí khoktiong jîtshiáⁿ khaisí siusok. Siōng bóe, só͘ū ê bu̍ttsit siusok kàu tsi̍tê bô thétsik ê tiám téngbīn, iā to̍h sī tongtsho͘ tōa phikle̍k tú khaisí tsōngthài ê hitê kîī goântiám."

Ô͘ Tiôngsiông to̍h sī tùi tsitê útiū phòngtiòng siusok ê lílūn, lâi líkái Iésu ētàng síkhì kohua̍h ê hiānsiōng; iā to̍h sī kóng Iésu ê sí to̍h tshintshiūⁿ útiū ê siusok, á kohua̍h ná tshintshiūⁿ útiū ê kohtsài phòngtiòng kângkhoán. Tsit tsióng khòaⁿhuat huisiông hôngkuan, tī khoha̍k téngbīn mā sī ū kin ū kì.

Tng i kóng i ētàng sìn "Iésu síkhì kohua̍h" ê sî, sī tī góa ê khehthiaⁿ ni̍h, tongsî góa pēng bô huatkiàn i ū kohiūⁿ ê khoán. Góa simlāi siūⁿ, "Tse khólêng tsísī i só͘ tsò ê tsi̍t tsióng ū tshùbī ê thuilūn jîí, tāikhài bē tìsú kah ū siáⁿmi̍h kiatkó!" Liáuāu bô gōa kú, i kòsî, khísin sáitshia tńgkhì Kohiông à.

Tī i tńg kàu tshù liáuāu, i khà tiānōe lâi.
I kóng, tī i tńgkhì tshù ê lō͘tô͘ tiong, i kámkak kakī tsin bô tùitâng; i hutjiân tùi kakī kámkak ū kóa tsheⁿso͘, khaisí tùi tsìntsêng ê kakī thóià khí lâi.

Tsìntsêng góa siókhóa tsaiiáⁿ, Ô͘ Tiôngsiông suijiân siàuliân, m̄koh tī i ê jînsing tiong ū tsin tsē tiōngtāi ê siongthiàⁿ kinggiām, tī i ê sinsim téngbīn, i bô huattō͘ tùi pa̍tlâng kóng tshut, pa̍tlâng thâubóe itti̍t lóng m̄tsai. M̄koh, i ê siósuat lóng teh suatbêng, tsiahê siongthiàⁿ kinggiām kiámtshái huisiông tîmtāng.

I kóng i khaisí thóià kakī, tāikhài sī teh tsí i bat inūi tsiahê tōa siongthiàⁿ bô huattō͘ goânliōng bó͘ tsi̍tkóa lâng ê tshimtshim ê siûhūn.

Lán tsaiiáⁿ, tī tsitê sèkài siōng, tsin tsió lâng ētàng thóià kakī. Nāsī bó͘ lâng khaisí thóià kakī, he ittēng sī íking khòaⁿ tshut kakī sèⁿmiā tiong ê kēlō͘ kah tshògō͘; tio̍hsǹg ítsêng siū tio̍h pa̍tlâng ê tōa sionghāi, m̄koh i íking ū pānhuat kaktshat tio̍h i mā tio̍h hū tsi̍tpòaⁿ ê tsikjīm. Ánne, i beh kèsio̍k hūn tùihong, mā piàn kah ū kóa khùnlân lah.

Kójiân, Ô͘ Tiôngsiông kóng, SiōngTsú ài i hòngkhì tùi bó͘ lâng ê tshim siû tōa hūn, tuikiû tsi̍tê sin ê tsūngó͘. Tng i bē giàn hòngkhì ê sî, SiōngTsú to̍h hō͘ i aple̍k, hō͘ i bô huattō͘ thesî. I kah SiōngTsú tsi kan khaisí piàⁿ tshiúbóe.

I kóng, tī tàutsing ê tiongkan, i kámkak bô lâng hó óakhò; m̄koh, i bêngpe̍k thiaⁿ tio̍h Iésu kā i kóng, "Lí sī ántsóaⁿ m̄ lâi óakhò Góa!"

Tsit tiûⁿ tsingtàu kiámtshái sī huisiông kiklia̍t, ētàng iôtāng i kinpún ê sèⁿmiā. Góa sī gōalâng, jîtshiáⁿ bô oântsoân tshingtshó.

M̄koh, hiānsiōng hiánsī, tùi i kóng i sìn Iésu síkhì kohua̍h, bô kàu tsi̍t kang, Sènglêng íking tī i ê sèⁿmiā tiong tāngkang, khaisí ài i jīntsōe, hóikái, hòngkhì hit kóa ētàng tìsú i sí ê tōa oànhūn, i só͘ tit tio̍h ê inhūi sī hiahni̍h tōa!

Tûliáu tse ígōa, góa kiò i khoàisok liām " Halélú’iah " tsit sì jī, i mā tsin iông’ī kóng tshut honggiân（tsi̍t tsióng ētàng kah SiōngTsú kauthong ê lênggí）.

Ô͘ Tiôngsiông hit sî khaktēng sī oântsoân káitsong sìn Iésu à, jîtshiáⁿ khaisí kiâⁿ ji̍p Sènglêng kah i tôngtsāi ê tsōnghóng tiong.

Bô gōa kú, i to̍h tī Tsionghòa koān Kheô͘ tìn ê Sìngīhōe siūsé à.
Sòatsiap, Sènglêng koh hō͘ i tsin tsē ê inhūi.

Tiongkan ū tsi̍tê inhūi sī, i ētàng thiaⁿkìⁿ SiōngTsú ê siaⁿim, iā to̍h sī ētàng tī singua̍h tiong thiaⁿ tio̍h SiōngTsú hō͘ i ê ōegí.

Lēnggōa, i koh ū tsin tsē ê ībāng. I bat kā góa kóng, "Ū tsi̍t pái, góa tùi SiōngTsú kîtó kóng, góa kám titkiù à?" Tī ībāng tiong SiōngTsú to̍h kā i khǹg tī tsi̍t tiâu hôliû ê koân ê só͘tsāi, liáuāu, tsi̍t tsūn tōatsúi kòe lâi, kā i tshiong lo̍h khì, i khoàisok sūn lâu lo̍h khì, tshiongkòe kúiê tsó͘tòng i ê siâok kuankhá, siōng bóe anún lâi kàu tsi̍tê pêⁿtē ê tshītiûⁿ.

Tsitê ībāng īkò i tsionglâi tiāⁿtio̍h ētàng lâi kàu sin thiⁿ sin tē.

2015 nînî té, i ê siósuat tsóng sêngkó tit tio̍h tē saⁿtsa̍p peh kài ê Gô͘ Samliân bûnha̍k tsióng, ētàng í tsiahni̍h siàuliân to̍h tit tio̍h púnthó͘ siōng tōa koh te̍kpia̍t ê bûnha̍k êngkng, kású bô sîn ê inhūi sī tsin oh tsò kàu. Liáuāu, i tī tsi̍t tiûⁿ ìgōa ê simhiat koán ê pēⁿtsèng tiong, khoàisok tô kòe tsi̍t kiap, anún bô sū; liāusióng tse mā sī lēnggōa tsi̍tê SiōngTsú ê inhūi. Tsiahê kîtsik, lóng suatbêng SiōngTsú kah i tôngtsāi ê sūsi̍t.

2017 nî tsêng pòaⁿ nî, góa bat kā i kóng, "Sènglêng ētàng lāitsū tī lán ê hingpak ni̍h, bô koh līkhui. "I sûisî huatkiàn Sènglêng kójiân to̍h lāitsū tī i ê singkhu ni̍h, i íking piànsêng Sènglêng ê tiān.

2017 nî Tshit gue̍h, i tī i ê FB téngbīn PO tshut i siá ê tsi̍t siú Tâigí si kiòtsò 〈phongphài ê hái〉, lāibīn ū kúi tsōa siá kóng：

"Hōaⁿ piⁿ huehtông ê hio̍h'á tshintshiūⁿ khuesìⁿ
Kimsik ê tiàuting’á hue tsi̍t pha tsi̍t pha kòa tī tshiū téng
Tiám to̍h háipêngsòaⁿ ōaⁿsin ê tsháihûn
He sī sin ê lênghûn tī tsahng siausit khì
Liáuāu tùi háité phû tsiūⁿ tsúibīn"

Tī tsia, lán tsùì tio̍h i kóng, "sin ê lênghûn tī tso̍hji̍t sitkhì, āu lâi koh tùi háité phû tsiūⁿ tsúibīn." tsitkù ōe. Só͘ūi "sin ê lênghûn" to̍h sī "sin ê sèⁿmiā", tsitê sin sèⁿmiā to̍h sī "Góa sī alfa, Góa sī omega, Góa sī tsho͘, Góa sī tsiong" ê Iésu ê sèⁿmiā.

Tsióngtsióng tsiahê tāitsì sī gōani̍h'á sînkî! Ánne khòaⁿ khí lâi, lânglâng lóng ingkai tio̍h ū tsi̍tê sìn "Iésu síkhì kohua̍h" ê hó líiû!

──2017, 08, 01 tī Lo̍kkáng