《CTT出頭天園地》

I-sap 寓言 １

作者 TLH

1. Gû-tiâu Lāi ê Káu
　Tsi̍t-tsiah káu ūi-tio̍h beh tshūe tsi̍t-ê khùn-tiong-tàu ê sóo-tsāi, tsiū thiàu-ji̍p-khì gû-tiâu lāi, tó tī sio-lō sóng-khùai ê tiū-tsháu tui khùn.

　Kùe bô jūa-kú, gû ê-poo ê khang-khùe tsò-suah, tńg-khì gû-tiâu siūnn beh tsia̍h tsháu. Tsit-tsiah káu tng teh hó khùn, khì hōo gû tshá--tshénn, tsin siū-khì, tsiū peh-khí-lâi tùi gû it-ti̍t pūi. Gû nā kiânn úa, káu tsiū siūnn beh kā i kā.

　Tsùe-āu, gû koo-put-tsiong tsiū hòng-khì tsia̍h tsháu, uat--tshut--khì. I iân-lōo kiânn iân-lōo ngāu-ngāu-liām kóng, “Ka-kī khùn bē hó-sè, koh kùai--gúa, m̄ hōo gúa tsia̍h tsháu!”

　Ài, lâng nā bô huat-tōo tit-tio̍h búan-tsiok, tshiâng-tsāi lóng ē ùan-thàn pa̍t-lâng!