《CTT出頭天園地》

I-sap 寓言 22

作者 TLH

22. Lí-hîng ê Lâng kap Hîm

Nn̄g-ê lâng tsò-húe khì lí-hîng, kiânn-kùe tshiū-nâ ê sî-tsūn, tsi̍t-tsiah hîm hiông-hiông tsông--tshut--lâi. Kiânn tī thâu-tsîng hit-ê sûi peh tsiūnn tshiū-á, kā ka-kī tshàng tiàm tshiu-ue--ni̍h. Līng-gūa hit-ê bē-hù thang siám-pī, tsiū kui-sin-lâng phiann-lo̍h-khì phak tī thôo-kha.

Hîm tsông lâi kàu i sin-pinn, ànn lo̍h-khì kā phīnn-phīnn leh, kan-ta iô-thâu, “Hôonn” tsi̍t-siann, tsiū lī-khui.

Tshiū-tíng hit-ê lo̍h--lâi, kiânn úa i ê tông-phūann, tshiò-tshiò-á kā mn̄g-kóng, “Hit-tsiah Hîm--sian--sinn tàu-té tùi lí kóng sím-mi̍h?” “I kā gúa kóng, tī gûi-hiám ê sî, tsò i liu-suan ê pîng-iú, tsu̍at-tùi m̄-thang koh kap i kau-pûe.”