《大人囡á詩》

Khui Tsi-phiò...開支票

作者 Li KhinhuaN

listen



Tūa-lâng khui tsi-phiò
大人開支票
Tsi̍t-tiunn tsi̍t-tiunn bô pó-sioh
一張一張無保惜
Tshiam-miâ tshìn-tshái gín-á sūan-jiō
簽名凊采囡仔 sūan 尿
Khui hit-hō khang-thâu tsi-phiò
開彼號空頭支票
Bô, to̍h it-ti̍t iân
無，to̍h 一直延
Lò-lò-tn̂g tik-ko-phiò
Lò-lò 長竹篙票
Gín-á bô tsi-phiò
囡仔無支票
Tsi̍t-kù ūe tsi̍t-tiunn phiò
一句話一張票
Tshian-bān m̄-thang īng tshùi pàng-jiō
千萬 m̄-thang 用嘴放尿
M̄-thang tsi̍t-kù ūe iáu sio-sio
M̄-thang 一句話 iáu 燒燒
To̍h koh húan, m̄-kiann lâng tshiò
To̍h koh 反，m̄ 驚人笑
To̍h koh thua, m̄-kiann lâng tiô
To̍h koh 拖，m̄ 驚人 tiô
Iū-koh thiàu-phiò! Iū-koh thiàu-phiò!
又 koh 跳票！又 koh 跳票！
Kā lí kái-miâ kiò
Kā 你改名叫
Kiò lí a-jiō
叫你阿尿
Ueh! A-jiō
喂！阿尿
--2003/4/29 Harvard